ម្ចាស់លំនៅឋាននៅភ្នំពេញត្អូញរឿង ប្រមូលសំរាមយឺតយ៉ាងខ្លាំងតាំងពីក្រោយចូលឆ្នាំមក
- 2019-04-29 09:10:39
- ចំនួនមតិ 0 | ចំនួនចែករំលែក 0
ម្ចាស់លំនៅឋាននៅភ្នំពេញត្អូញរឿង ប្រមូលសំរាមយឺតយ៉ាងខ្លាំងតាំងពីក្រោយចូលឆ្នាំមក
ចន្លោះមិនឃើញ
នៅតាមចិញ្ចើមផ្លូវជាច្រើននៅរាជធានីភ្នំពេញ ក្នុងនោះមានក្បែរផ្សារអូរឫស្សី ផ្សារបឹងព្រលិតម្ដុំផ្សារដើមគរតាមបណ្ដោយផ្លូវព្រះមុនីរ៉េត ម្ដុំបុរីមួយចំនួនក្នុងសង្កាត់ស្ទឹងមានជ័យ ខណ្ឌមានជ័យរាជធានីភ្នំពេញ តាំងពីចុងសប្ដាហ៍មុន ប្រជាពលរដ្ឋរអ៊ូថា ការប្រមូលសំរាមហាក់មានភាពរយឺតយ៉ាវ ជាហេតុធ្វើឱ្យភាយក្លិនមិនស្អុយ និងប៉ះពាល់ដល់សណ្ដាប់សាធារណៈជាខ្លាំង។
លោក យី សម្បត្តិ ប្រជាពលរដ្ឋរស់នៅម្ដុំផ្សារបឹងព្រលិតថា ការប្រមូលសំរាមនៅមិនទាន់បានដូចធម្មតាទេចាប់តាំងពីក្រោយចូលឆ្នាំថ្មីមក ជាហេតុធ្វើឱ្យមានក្លិនមិនល្អ និងបាត់បង់សោភ័ណភាព។ លោកបានសំណូមពរដល់អាជ្ញាធរពិសេសក្រុមហ៊ុនស៊ិនទ្រី បង្កើនការទទួលខុសត្រូវប្រមូលសំរាមឱ្យបានទាន់ពេល ព្រោះបង្កឱ្យប៉ះពាល់ខ្លាំងដល់អារម្មណ៍ប្រជាពលរដ្ឋ។ ចំណែកលោក ហ៊ុន សោភ័ណ្ឌ ប្រជាពលរដ្ឋរស់នៅសង្កាត់ចង្រែក្រោមខណ្ឌមានជ័យឱ្យដឹងដែរថា ការប្រមូលសំរាមពិតជាមានភាពយឺតយ៉ាវ និងរអាក់រអួលប្រាកដមែនចាប់តាំងពីក្រោយបុណ្យចូលឆ្នាំខ្មែរមក។ លោកបានដាក់ការសង្ស័យថា បុគ្គលិកក្រុមហ៊ុនស៊ិនទ្រី អាចធ្វើបាតុកម្ម ដោយស្ងប់ស្ងាត់ទើបមិនមកប្រមូលសំរាមបានទាន់ពេល។
រយៈពេលចុងក្រោយបុគ្គលិកក្រុមហ៊ុនស៊ិនទ្រី តែងធ្វើបាតុកម្មជាញឹកញាប់ ដើម្បីទាមទារនូវអត្ថប្រយោជន៍ផ្សេង ជាហេតុធ្វើឱ្យសំរាមមានការកកស្ទះច្រើន។
ទាក់ទងនឹងបញ្ហានេះ លោក ម៉េត មាសភក្តី អ្នកនាំពាក្យសាលារាជធានីភ្នំពេញបានឱ្យដឹងថា បុគ្គលិកក្រុមហ៊ុនមិនមានធ្វើបាតុកម្មឡើយ ប៉ុន្តែលោកថា បរិមាណសំរាមបានកើនឡើងច្រើនតាំងពីថ្ងៃបុណ្យចូលឆ្នាំថ្មីមក។ ក្នុងឱកាសបុណ្យចូលឆ្នាំថ្មីកន្លងបុគ្គលិកក្រុមហ៊ុនស៊ិនទ្រី ត្រូវបានអនុញ្ញាតឱ្យឈប់សម្រាកដូចគ្នាទៅនឹងបុគ្គលិកនៅតាមសហគ្រាសឯកជនដទៃទៀតដែរ។
“អញ្ចឹងរាល់ពេលយើងមានបុណ្យទានធំដុំ ឈប់សម្រាកយូរហ្នឹង…ច្រើនតែមានការគរសំរាមច្រើនដូច្នេះ។ អញ្ចឹងទោះបីជាបុគ្គលិកក្រុមហ៊ុនស៊ិនទ្រីគាត់មកបម្រើការងារជាប្រក្រតីឡើងវិញហើយក៏លទ្ធភាពប្រមូលប្រចាំថ្ងៃវាទាមទារពេលវេលា ដើម្បីប្រមូលគ្រប់ជ្រុងជ្រោងទាំងអស់។ ដូច្នេះសុំមានការយោគយល់អធ្យាស្រ័យបញ្ហាហ្នឹង”។
លោកបានបន្ថែមថា សាលារាជធានីភ្នំពេញកំពុងចាត់វិធានការ គ្រប់ខណ្ឌបានបញ្ចេញកំលាំង មធ្យោបាយបន្ថែមដើម្បីប្រមូលសំរាម ហើយសង្ឃឹមថា ឆាប់ៗនេះ នឹងដោះស្រាយអស់ហើយ។
តំណាងក្រុមហ៊ុនស៊ិនទ្រី មិនអាចសុំការអធិប្បាយបានទេ ជុំវិញបញ្ហានេះ។ យោងតាមរបាយការណ៍ បរិមាណសំរាមនៅភ្នំពេញមានប្រមាណ ៣ ០០០ តោន ក្នុងមួយថ្ងៃ៕