២ចំណុចដែល ឈោកឆៃ ផ្ដួល ឡុង សំណាង ចាន់ ប៊ុនហឿន ឲ្យសន្លប់ផុយៗ

2019-04-30 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនថៃ ឈោកឆៃ ប៉ុន្មានប្រកួតចុងក្រោយនេះផ្ដួលកីឡាករឆ្នើមវ័យក្មេងរបស់កម្ពុជាឲ្យសន្លប់មុនបញ្ចប់ទឹកទី៥តែម្ដង ពោលមាន ចាន់ ប៊ុនហឿន និង ឡុង សំណាង។ កត្តាចម្បង២ដែលជើងខ្លាំងថៃខាងលើនេះអាចផ្ដួល សំណាង និង ប៊ុនហឿន ផុយៗនោះគឺ៖

កីឡាករ ឡុង សំណាង

**ទី១ ទម្ងន់** ចំណុចនេះមានន័យថា ឈោកឆៃ ជាកីឡាករលេងទម្ងន់ ៦៥ ឬ ៦៧គីឡូក្រាម ដូច្នេះនៅពេលអ្នកលេងគុនថៃរូបនេះទម្លាក់ចុះមក គឺមានប្រៀបជាងដៃគូដែលលេងទម្ងន់ពិតប្រាកដ ៦៣,៥គីឡូក្រាម។ អ្នកតាមដានប្រដាល់មួយចំនួនដឹងច្បាស់ហើយថាកីឡាករថៃ ពូកែធ្វើទម្ងន់ខ្លាំងណាស់ ៤-៥គីឡូក្រាម ពួកគេអាចធ្វើបាន បន្ទាប់ពីថ្លឹងរួចគេញាំអាហារ ឬប៊ូវកម្លាំងរួចហើយនោះ កម្លាំងនឹងឡើងវិញទៅតាមនិងដែរ នេះហើយជាហេតុមានប្រៀបជាង។ កាលណាកម្លាំងខ្លាំងជាង ជាហេតុធ្វើឲ្យ ឈោកឆៃ អាចចាប់កាច់វ៉ៃជង្គង់រហូតដៃគូសន្លប់បាន។

កីឡាករ ចាន់ ប៊ុនហឿន

ទី២ បទពិសោធ ចំណុចនេះក៏ជាហេតុផលដែល ឈោកឆៃ ផ្ដួល សំណាង និង ប៊ុនហឿន ផងដែរ បើទោះជាទម្ងន់ត្រូវគ្នាក៏ដោយ ប៉ុន្តែបទពិសោធនៅខ្ចី ក៏មិនអាចទប់ទល់និងគេបានដូចគ្នា។ អ្នកទស្សនាប្រដាល់ដឹងច្បាស់ហើយថា ឈោកឆៃ ជាអ្នកប្រដាល់មានបទពិសោធចាស់វស្សាជាង សំណាង និង ប៊ុនហឿន។ អ្នកប្រដាល់ថៃរូបនេះធ្លាប់ប៉ះ មឿន សុខហ៊ុន និង ឡៅ ចន្រ្ទា ផល សោភ័ណ្ឌ ពីមុនមក ដូច្នេះបទពិសោធ និងសមត្ថភាពមិនធម្មតានោះទេ។ ចំណែក ចាន់ ប៊ុនហឿន និង ឡុង សំណាង របស់កម្ពុជាទើបតែឡើងខ្លាំង១ឆ្នាំជាងនោះទេ ដូច្នេះនៅពេលនេះមិនទាន់សមស្របអាចជួប ឈោកឆៃ នោះឡើយ អាចនិយាយបានថាសន្សំបទពិសោធបន្តិចទៀត។ ដូចនេះហើយការចាប់គូប្រកួតនេះសំខាន់ណាស់ មិនអាចចេះតែចាប់ឲ្យតែមានកម្មវិធីប្រកួតនោះឡើយ ជាហេតុធ្វើឲ្យលទ្ធផលចាញ់ឈ្នះដាច់ ឬសន្លប់បែបនេះ ម្យ៉ាងអាចធ្វើឲ្យបាក់កីឡាករទៀតផង។

កីឡាករថៃ ឈោកឆៃ

ឧទាហរណ៍ជាក់ស្ដែង កីឡាករ ឡៅ ចិត្រា ធ្លាប់បានលើកឡើងថា នៅពេលប្រកួតជាមួយកីឡាករដែលគេទម្លាក់ទម្ងន់មក គឺពិបាកវ៉ៃខ្លាំង វ៉ៃដៃគូមិនសូវឈឺនោះឡើយ ព្រោះគេធំជាងហើយវ៉ៃបកមកវិញគឺចង់យ៉ាប់។ ហេតុនេះហើយ ទើប ចិត្រា សម្រេចមកលេងទម្ងន់ត្រឹម ៦០កីឡូក្រាមវិញ។ ចំពោះ ឃីម ឌីម៉ា ក៏ធ្លាប់លើកឡើងនាពេលកន្លងមកដែរថា នៅពេលវ៉ៃជាមួយកីឡាករធ្ងន់ជាង គឺពិបាកវ៉ៃ ទម្រាំវ៉ៃឈ្នះក៏ចង់យ៉ាប់ដែរ។

វីដេអូ ឡុង សំណាង ប៉ះ ឈោកឆៃ៖

វិដេអូ ចាន់ ប៊ុនហឿន ប៉ះ ឈោកឆៃ៖

ឈោកឆៃ ពេលប៉ះ ចន្រ្ទា

រំលឹកដែរថា កីឡាករថៃ ឈោកឆៃ ផ្ដួល ឡុង សំណាង ឲ្យសន្លប់ក្នុងទឹកទី២ នៅសង្វៀន CNC កាលពីថ្ងៃទី២៧ មេសា ២០១៩។ ចំណែក ចាន់ ប៊ុនហឿន ក៏ធ្លាប់សន្លប់ក្នុងទឹកទី៣ ផងដែរកាលពីថ្ងៃទី៥ ខែមេសា ២០១៩ នៅសង្វៀនបាយ័ន៕

អត្ថបទ៖ នួន ស៊ីណា