សរសើរ ឈោកឆៃ លេង៦៣,៥ក៏បាន ៦៧ក៏បាន ទើបឈ្នះអ្នកលេងគុនខ្មែរម្នាក់ទៀតហើយ

2019-05-06 06:19:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈោកឆៃ ឬជួបអោប ឈ្នះទៀតហើយ ប៉ុន្តែសប្ដាហ៍មុននេះវ៉ៃទម្ងន់ ៦៧គីឡូក្រាម ប៉ះ ឆៃ សារ៉ា មិនសូវផុយដូចកាលប៉ះ ឡុង សំណាង និង ចាន់ ប៊ុនហឿន ឡើយ។

សារ៉ា(ក្រហម) ឈោកឆៃ(ខៀវ)

ជើងខ្លាំងថៃ ឈោកឆៃ បន្តឈ្នះទៀតហើយកាលពីថ្ងៃសៅរ៍ ទី៤ ឧសភា ២០១៩ ក្នុងកម្មវិធីប្រដាល់សង្វៀន TV5 ជាមួយអ្នកលេងគុនខ្មែរ ឆៃ សារ៉ា។ គូនេះមិនសូវមិនសូវជាជក់ចិត្តប៉ុន្មានទេ ដោយសារ សារ៉ា មានកម្លាំងគួរសម និងចេញស្នៀតរបស់ខ្លួនមុនរហូត ជាហេតុធ្វើឲ្យ ឈោកឆៃ លំបាកខ្លះៗដែរ។ យ៉ាងណាមិញ អ្នកទាំងពីរនាក់នេះមិនហ៊ានប្ដូរគ្នានោះដែរ ពោលគឺវ៉ៃតាមដំណើររហូតដល់ចប់ការប្រកួត។

សារ៉ា(ក្រហម) ឈោកឆៃ(ខៀវ)

សិស្សគុនមកពីសមាគមក្រសួងការពារជាតិខាងលើនេះ នៅតែចាញ់អោប ឈោកឆៃ ដូចអ្នកលេងគុនខ្មែរមួយចំនួនៗពីមុនៗដែរ ខណៈពេលអោបម្ដងៗមិនអាចធ្វើអ្វីកីឡាករថៃរូបនេះបានឡើយ បានត្រឹមបិទ ឬបែរគូថដាក់គេប៉ុណ្ណោះ។ ឈោកឆៃ មានប្រៀបជាង សារ៉ា ត្រង់នៅរឹងជាង ហើយបានវ៉ៃជង្គង់ជាហូរហែ ចំណែកអ្នកប្រដាល់កម្ពុជាវិញ ចេញកណ្ដាប់ដៃ និងទាត់មួយៗ ប៉ុន្តែមិនអាចធ្វើអ្វីជើងខ្លាំងថៃខាងលើនេះមិនបានឡើយ។

ឈោកឆៃ ពេលឈ្នះ ឆៃ សារ៉ា

ឆៃ សារ៉ា ចាញ់ពិន្ទុកីឡាករ ឈោកឆៃ នាជំនួបមិត្តភាពអន្តរជាតិសង្វៀន TV5 កាលពីថ្ងៃសៅរ៍ ទី៤ ឧសភា ២០១៩ កន្លងទៅនេះ។ ៣ប្រកួតចុងក្រោយរបស់កីឡាករថៃរូបនេះ គឺឈ្នះ ចាន់ ប៊ុនហឿន ឡុង សំណាង(ទម្ងន់៦៣,៥គីឡូក្រាម) ខណៈឈ្នះ ឆៃ សារ៉ា លើប្រភេទទម្ងន់ ៦៧គីឡូក្រាម៕

អត្ថបទ៖ នួន ស៊ីណា