កីឡាកររៀមច្បងល្បី៨នាក់នេះនៅតែសកម្មលើសមរភូមិលីគកម្ពុជា

2019-05-09 23:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករបាល់ទាត់កម្ពុជារៀមច្បងជាច្រើននាក់បានឃ្លាតឆ្ងាយពីសមរភូមិបាល់ទាត់ដោយសារវ័យកាន់តែច្រើន កម្លាំងកាន់តែធ្លាក់ចុះ។ ស្របពេលកីឡាករវ័យក្មេងជាច្រើនបានកំពុងលេចធ្លោដែលនេះជាធម្មជាតិនៃការប្រែប្រួល។

យ៉ាងណា កីឡាកររៀមច្បងជាច្រើននាក់នៅតែមានមុខលេងក្នុងលីគបាល់ទាត់កំពូលកម្ពុជា ហើយរដូវដល់ឆ្នាំ២០១៩នេះក៏នៅតែមានមុខស្ទើរគ្រប់ការប្រកួតទៀតផង។ ថ្ងៃនេះសូមបង្ហាញមុខកីឡាករបាល់ទាត់កម្ពុជា៨រូបដែលនៅតែសកម្មភាព និងបង្ហាញមុខលើទីលាននៃលីគកំពូលកម្ពុជារហូតដល់សព្វថ្ងៃនេះ។

១-ខ្សែការពារវិសាខា ទៀង ទីនី

ទៀង ទីនី (ស្តាំទី១)ជាប្រធានក្រុម

ខ្សែការពារចាស់ វស្សា ទៀង ទីនី បានលេងឲ្យក្លឹបធំៗនៅកម្ពុជាស្ទើរទាំងអស់ហើយ បើគិតចាប់តាំងពីឆ្នាំ២០០៦មក។ ទោះជាវ័យកាន់តែច្រើន ប៉ុន្តែរូបគេនៅតែជាខ្សែការពារដ៏សំខាន់របស់វិសាខាដែលតែងតែជាប់ជម្រើស១១នាក់ដំបូង។ គិតរហូតដល់ពេលនេះរូបគេបានប្រឡូកក្នុងលីគកម្ពុជាជាង១០ឆ្នាំហើយ។

ខេមរាកីឡា ឆ្នាំ២០០៦-២០០៧
ណាហ្គាខប ឆ្នាំ២០០៧-២០០៨
ភ្នំពេញក្រោន ឆ្នាំ២០០៨-២០១២
ណាហ្គាវើល ឆ្នាំ២០១២-២០១៦
ខេមបូឌាន ថាយហ្គឺរ ឆ្នាំ២០១៦-២០១៧
វិសាខា ឆ្នាំ២០១៧-បច្ចប្បន្ន

២-ខ្សែបម្រើណាហ្គាវើល គួច សុកុម្ភៈ

កីឡាករប្រជាប្រិយ គួច សុកុម្ភៈ ឆ្លងកាត់ក្លឹបអាជីព៣ហើយក្នុងលីគកំពូលកម្ពុជាគិតចាប់តាំងពីឆ្នាំ២០០៥ ប៉ុន្តែរូបគេនៅតែជាខ្សែបម្រើដ៏ល្អរបស់ក្លឹបណាហ្គាវើលដែលជាទ្រនំចុងក្រោយ។ រហូតដល់ពេលនេះកីឡាករចិត្តធ្ងន់មកពីខេត្តកំពង់ធំលេងក្នុងលីគកម្ពុជាបានប្រមាណ១៤ឆ្នាំហើយ។

ខេមរាកីឡា ឆ្នាំ២០០៥-២០១០
ភ្នំពេញក្រោន ឆ្នាំ២០១០-២០១៥
ណាហ្គាវើល ឆ្នាំ២០១៥-បច្ចុប្បន្ន

៣-ខ្សែបម្រើណាហ្គាវើល ឃីម បូរី

និយាយពីខ្សែបម្រើការពារ ឃីម បូរី វិញក៏ជោកជាំខ្លាំងក្នុងលីគបាល់ទាត់កំពូលកម្ពុជា និងធ្លាប់ចេញទៅលេងនៅក្រៅប្រទេសថែមទៀត។ ជារឿយៗនៅឆ្នាំ២០១៩នេះ រូបគេក៏ស្ថិតនៅក្នុងក្រសែភ្នែករបស់គ្រូបង្វឹកលោក មាស ចាន់ណាដែរ។ គិតចាប់តាំងពីឆ្នាំ២០០៦មក បូរីប្រឡូកក្នុងលីគកម្ពុជាបាន១៣ឆ្នាំហើយ។

ក្រសួងការពារជាតិ ឆ្នាំ ២០០៦-២០១០
Sisaket FC ឆ្នាំ២០១០-២០១១
ភ្នំពេញក្រោន ឆ្នាំ២០១១-២០១៥
ណាហ្គាវើល ២០១៥-បច្ចុប្បន្ន

៤-ខ្សែការពារបឹងកេត ស៊ុន សុវណ្ណរិទ្ធី

សមាជិករបស់បឹងកេតបច្ចុប្បន្ន ស៊ុន សុវណ្ណរិទ្ធី នៅតែជាខ្សែការពារដ៏សំខាន់ដែលបង្ហាញខ្លួនស្ទើរគ្រប់ការប្រកួត។ អាយុ៣៤ឆ្នាំហើយ ប៉ុន្តែកីឡាកររូបនេះនៅតែលេងបានយ៉ាងល្អ និងជាប់ជម្រើស១១នាក់ដំបូងរហូតរបស់លោកគ្រូ ហៅ សុជាតិ។

ណាហ្គាខប ឆ្នាំ២០០៨-២០១០
ភ្នំពេញក្រោន ឆ្នាំ២០១០-២០១១
ណាហ្គាវើល ឆ្នាំ២០១២-២០១៦
បឹងកេត ឆ្នាំ២០១៧-បច្ចុប្បន្ន

៥-អ្នកចាំទីណាហ្គាវើល ស៊ូ យ៉ាទី

ក្នុងនាមជាអ្នកចាំទី ស៊ូ យ៉ាទី បានលេងឲ្យក្លឹបអាជីព៥ដែលសុទ្ធតែជាក្លឹបធំៗក្នុងលីគបាល់ទាត់កំពូលកម្ពុជា។ សព្វថ្ងៃនេះរូបគេជាជម្រើសទី១របស់ក្លឹបណាហ្គាវើលរហូតដល់។

បៀលប្រាយយូណាយធីត ឆ្នាំ២០០៦-២០០៧
ក្រសួងការពារជាតិ ឆ្នាំ២០០៩-២០១៣
ភ្នំពេញក្រោន ឆ្នាំ២០១៣-២០១៥
បឹងកេត ឆ្នាំ២០១៥-២០១៨
ណាហ្គាវើល ឆ្នាំ២០១៨-បច្ចុប្បន្ន

៦-ខ្សែប្រយុទ្ធក្រសួងការពារជាតិ ភួង សុខសាណា

ទោះជាវ័យកាន់តែច្រើន និងបានរងរបួសដែលឃ្លាតឆ្ងាយពីទីលានច្រើនខែកាលពីប៉ុន្មានឆ្នាំមុន ប៉ុន្តែសព្វថ្ងៃ ភួង សុខសាណា នៅតែមានមុខឲ្យក្រសួងការពារជាតិរហូត។ ខ្សែប្រយុទ្ធរូបនេះគិតចាប់តាំងពីឆ្នាំ២០០៥មកលេងឲ្យក្រសួងការពារជាតិរហូត។

ក្រសួងការពារជាតិ ឆ្នាំ២០០៥-បច្ចុប្បន្ន

៧-ខ្សែបម្រើការពារក្រសួងការពារជាតិ ឈិន ឈឿន

ខ្សែបម្រើការពារមាឌល្អិត ឈិន ឈឿន ក៏មិនខុសពីរៀមច្បង ភួង សុខសាណាឡើយគិតចាប់ពីឆ្នាំ២០១០មកលេងឲ្យក្រសួងការពារជាតិរហូត។ រដូវកាល២០១៩នេះ រូបគេនៅតែជាសមាជិកសំខាន់របស់លោកគ្រូ ភា សុភ័ត្ត្រារហូត។

ក្រសួងការពារជាតិ ឆ្នាំ២០១០ ដល់បច្ចុប្បន្ន

៨-ខ្សែការពារអគ្គស្នងការដ្ឋាននគរបាលជាតិ សាយ ពិសិដ្ឋ

ខ្សែការពារមកតំបន់អារិយក្សត្រ សាយ ពិសិដ្ឋ ក៏ជាកីឡាកររៀមច្បងដែលមានមុខលើទីលានលីគកម្ពុជាមិនដាច់ដែរសម្រាប់ក្លឹបអគ្គស្នងការដ្ឋាននគរបាលជាតិ។ រហូតដល់បច្ចុប្បន្ននេះ រូបគេលេងក្លឹបតែពីរប៉ុណ្ណោះគឺឆ្លាមសមុទ្រ និងអគ្គស្នងការដ្ឋាននគរបាលជាតិ។