អគ្គិសនីកម្ពុជាស្រាយចម្ងល់អ៊ុំស្រីម្នាក់រិះគន់ខ្លាំងៗ រឿងភ្លើងដាច់ញឹកតែគីឡូវ៉ាត់ម៉ោងកាន់តែឡើង

2019-05-11 07:52:35
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គិសនីកម្ពុជា បានចុះត្រួតពិនិត្យផ្ទះរបស់អ៊ុំស្រីម្នាក់ បន្ទាប់ពីមានការថតបង្ហោះវីដេអូនៅលើបណ្ដាញសង្គមហ្វេសបុក ដោយបានចោទថា ការប្រើប្រាស់ភ្លើងនៅផ្ទះរបស់គាត់បានកើនឡើងដែលខុសពីធម្មតា ប៉ុន្ដែក្រោយពីត្រួតពិនិត្យឃើញថា អ្វីៗមិនខុសប្រក្រតីនោះឡើយ។

រូបភាព ព្រីនស្រ្គីន ចេញពីវីដេអូ នៃមន្រ្តីអាជ្ញាធរអគ្គិសនីកម្ពុជា ចុះត្រួតពិនិត្យប្រជាពលរដ្ឋដែលត្អូញត្អែរប្រើប្រាស់ភ្លើងឡើងខុសប្រក្រតី

គេនៅចាំបានថា វីដេអូឃ្លីបមួយត្រូវបានបង្ហោះនៅលើបណ្ដាញសង្គមហ្វេសបុក ដែលធ្វើឲ្យមានការចាប់អារម្មណ៍ខ្លាំង កាលពីថ្ងៃទី ០៩ ខែឧសភា ឆ្នាំ២០១៩កន្លងទៅ គឺជាវីដេអូប្រជាពលរដ្ឋឈ្មោះ សុខ សាន្ត រស់នៅភូមិ១៤ សង្កាត់បឹងកក់២ ខណ្ឌទួលគោក បានបង្ហោះវីដេអូត្អូញត្អែរយ៉ាងខ្លាំងថា ការប្រើប្រាស់អគ្គិសនីនៅផ្ទះគាត់បានកើនឡើងខ្លាំង ដែលធម្មតាប្រើអស់ជាង ៣២ម៉ឺនរៀលក្នុង១ខែ បានកើនឡើងដល់ ៤៩ម៉ឺន ៨ពាន់រៀល ដែលរស់នៅតែ២នាក់ម៉ែកូន ប្រាក់ខែកូន ២០០ដុល្លារ បង់ភ្លើងអស់ ១៥០ដុល្លារ និងអំពាវនាវឲ្យជួយរកយុត្តិធម៌ ឲ្យគាត់ផង ម៉េចបានអស់ច្រើនយ៉ាងនេះ?

ឆ្លើយតបនឹងការត្អូញត្អែរខាងលើ អាជ្ញាធរអគ្គសិនីកម្ពុជា បានសរសេរនៅលើបណ្ដាញសង្គមរបស់ខ្លួនថា ដោយយល់ឃើញថា ការត្អូញត្អែរនេះមានលក្ខណៈស្រួចស្រាល រស់នៅ២នាក់ម៉ែកូន ម៉េចបានភ្លើងអស់ច្រើនយ៉ាងនេះ កាលពីថ្ងៃទី ១០ ឧសភា ២០១៩ អាជ្ញាធរអគ្គិសនីកម្ពុជាបានសហការជាមួយអគ្គិសនីកម្ពុជាចុះទៅដល់ទីតាំងខាងលើ ដើម្បីធ្វើការផ្ទៀងផ្ទាត់នាឡិកាស្ទង់អគ្គិសនី (កុងទ័រ), ត្រួតពិនិត្យខ្សែបណ្តាញ ក្នុងផ្ទះ និងខ្សែបណ្តាញ ពីប្រអប់កុងទ័រ មកផ្ទះជាដើម ។

លទ្ធផលនៃការចុះពិនិត្យ មានដូចជា៖

១. ខ្សែបណ្តាញ ក្នុងផ្ទះ និងខ្សែពីប្រអប់កុងទ័រមកផ្ទះ ល្អ មិនមានចំណុចឆ្លង។
២ .លទ្ឋផលនៃការផ្ទៀងផ្ទាត់កុងទ័រ គឺដើរត្រឹមត្រូវតាមស្តង់ដា លំអៀង 0.21%
៣ . ឧបករណ៍ប្រើប្រាស់ក្នុងផ្ទះ របស់គាត់រួមមានម៉ាស៊ីនត្រជាក់កម្លាំង ១,៥សេះ ចំនួន២គ្រឿង ទូរទឹកកកទំហំ ២ ជាន់ ចំនួន១គ្រឿង ឆ្នាំងដាំបាយ កង្ហារ២គ្រឿង ទូរទស្សន៍១គ្រឿង និងអំពូលមួយចំនួនទៀត។ បន្ទាប់ពីក្រុមការងារយើងខ្ញុំបានចុះពិនិត្យជាក់ស្តែងឃើញថា កុងទ័រដើរត្រឹមត្រូវ និង ឧបករណ៍ប្រើប្រាស់នៅផ្ទះគាត់មានដល់ទៅម៉ាស៊ីនត្រជាក់ ១,៥សេះ ២គ្រឿង និងទូរទឹកកក៕

សូមទស្សនាវីដេអូ

អត្ថបទ៖ ប៊ិន ប៊ុណ្ណា