កិច្ចសម្ភាសន៍ដ៏កម្ររបស់ Bruce Lee មុនពេលគាត់ល្បីល្បាញ (វីដេអូ)

2019-05-18 08:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការសម្ភាសន៍ដ៏កម្រមួយរបស់តារាកុងហ៊្វូល្បីល្បាញប្រ៊ូស លី (Bruce Lee) ឬ លី ស៊ាវឡុងត្រូវបានចេញផ្សាយកាលពីពេលថ្មីៗ គឺជាវីដេអូសម្ភាសន៍មុនពេលដែលសិល្បករក្បាច់គុនរូបនេះត្រូវបានមនុស្សទូទាំងពិភពលោកបានស្គាល់។

វីដេអូឃ្លីបដែលចេញផ្សាយដោយមជ្ឈមណ្ឌលប្រវត្តិសាស្ត្រ Sacramento បង្ហាញថា Lee ត្រូវបានសម្ភាសន៍ដោយលោកហារី ម៉ាទីន (Harry Martin) ដែលត្រូវបានគេចាត់ទុកថាជាអ្នកសារព័ត៌មានល្បីល្បាញរបស់អាមេរិកអំឡុងឆ្នាំ ១៩៦៦។ នេះបើយោងតាម South China Morning Post ។

បុរសវ័យ២៥ឆ្នាំដែលក្រោយមកក្លាយទៅជាតារាកុងហ៊្វូដ៏ល្បីល្បាញ នៅពេលលោកកំពុងថតកុនរឿង "The Green Hornet" សម្រាប់រឿងភាគរបស់ស្ថានីយទូរទស្សន៍។

“បុរសចម្លែកដែលកំពុងធាក់កង់នោះជានរណា? ខ្ញុំគិតថាគាត់ឈ្មោះ Lee។ មើលទៅស្រដៀង Kato (តួកុនល្បីរបស់អាមេរិកជំនាន់នោះ)”។ Martin និង អ្នកសារព័ត៌មានម្នាក់ទៀតជជែកគ្នានៅពេល Lee កំពុងធាក់កង់សំដៅមកពួកគេ។

“ត្រូវការអីឲ្យខ្ញុំជួយ?” Lee និយាយទាំងសំណើចពេលគាត់ចុះពីកង់។ អ្នកសារព័ត៌មាននិយាយថា "មានអ្នកហាត់កុងហ៊្វូជាច្រើននៅម្តុំនេះ"។

ពួកគេសួរ Lee ថា "តើកុងហ៊្វូជាអ្វី?” គាត់ឆ្លើយថា "បាទ កុងហ៊្វូគឺជាទម្រង់ក្បាច់គុនមួយរបស់ចិន។ សិល្បៈក្បាច់គុននេះដូចការ៉ាតេ និង ជីជីតស៊ូជាដើម"។

បន្ទាប់មក Marin សួរទៀតថាគាត់ជាអ្នកសានហ្រ្វាន់ស៊ីស្កូ (San Francisco) ឬ? លីឆ្លើយថាឪពុកម្តាយរបស់គាត់មកពីហុងកុង តែគាត់បានកើតនៅសានហ្រ្វាន់ស៊ីស្កូ (បន្ទាប់ពីឪពុកម្តាយរបស់គាត់ដែលជាអ្នកលេងហ៊ីបានធ្វើចំណាកស្រុកមកដល់អាមេរិក)។

ក្រោយមក Marin សួរទៀតថាគាត់មានបើកសាលាការ៉ាតេនៅ Sacramento ឬ សានហ្រ្វាន់ស៊ីស្កូឬទេ តែលីឆ្លើយថាគាត់មានសាលាគុនមួយនៅ អូកឡិន។

អ្នកសារព័ត៌មានអាមេរិកក៏បានបន្តសួរគ្រូក្បាច់គុនកុងហ៊្វូទៀតថា អ្វីជាភាពខុសគ្នារវាងការ៉ាតេ និង កុងហ៊្វូ។ លោកឆ្លើយថា "បាទ ភាពខុសគ្នាដ៏ធំខ្ញុំបាននិយាយនៅសាលារៀនរបស់ខ្ញុំ នោះគឺ ការវាយលុក"។

ម៉ាទីននិយាយបែបកំប្លែងថា "អីចឹងវានឹងវាយលុកលោកទៀតហើយ"?

“ខ្ញុំនឹងវាយលុក ហើយការពារក្នុងពេលដំណាលគ្នា" Lee បានឆ្លើយតបនៅពេលដែលកាមេរ៉ាអូសទៅកង់របស់គាត់ដែលបិទឈ្មោះ Bruce Lee៕

អាន៖ មកស្គាល់ប្រទេសពីរដែលបង្កើតច្បាប់មិនឲ្យប្រារព្ធអាពាហ៍ពិពាហ៍ឡូយឆាយពេក

អាន៖ កាត់៧ថ្ងៃ កម្ពុជានឹងឲ្យលេខ១ទៅស្រីលង្កាវិញជាប្រទេសមានថ្ងៃឈប់សម្រាកច្រើនបំផុត

ប្រភព៖ nextshark ប្រែសម្រួល៖ សុខ លាងហ៊ត