ស្វែងយល់ពីរបៀបឈ្មួញនាំចូលឡានមួយទឹកពីអាមេរិក មកលក់ព្រាតពេញស្រុកខ្មែរ
- 2019-05-20 03:54:06
- ចំនួនមតិ 0 | ចំនួនចែករំលែក 0
ស្វែងយល់ពីរបៀបឈ្មួញនាំចូលឡានមួយទឹកពីអាមេរិក មកលក់ព្រាតពេញស្រុកខ្មែរ
ចន្លោះមិនឃើញ
ឡានមួយទឹកដែលអ្នកឃើញមានលក់នៅលើទីផ្សារ ភាគច្រើនត្រូវបានឈ្មួញនាំចេញពីសហរដ្ឋអាមេរិក ដែលជាទីផ្សារឡានមួយទឹកដ៏ធំសម្រាប់តំបន់អាស៊ី។
មុនពេលនាំយកមកលក់ ឈ្មួញទាំងនេះត្រូវធ្វើម្ដេចខ្លះ? ត្រូវដឹកជញ្ជួនបែបណា?
លោក ឌី ពិសិទ្ធ ធ្វើការនៅក្រុមហ៊ុនឆែកឡានមួយទឹក Autocheck Cambodia បានប្រាប់ Sabay ថា មុនពេលនាំរថយន្តមួយទឹកពីអាមេរិកមកលក់បាន ត្រូវចំណាយពេលយូរទាំងការទិញ និងដឹកជញ្ជួន។
លោកបន្តថា ឡានមួយទឹកមួយនៅអាមេរិក ត្រូវបានបែងចែកជា ៤ ប្រភេទសម្រាប់ឈ្មួញទិញយកមកលក់បន្តគឺ៖
ប្រភេទឡានមួយទឹកលក់នៅតាមឃ្លាំង៖ ជាប្រភេទឡានដែលអ្នកទិញអាចរកបាននៅតាមឃ្លាំងលក់មួយទឹក ដែលនៅមានស្ថានភាពស្អាត គុណភាពល្អ។ ឡានប្រភេទនេះច្រើននៅមានតម្លៃថ្លៃគួរសម ព្រោះជាឡានមួយទឹកដែលចេញពីក្រុមហ៊ុនផ្ទាល់។
ប្រភេទឡានមួយទឹកចេញពីអ្នកប្រើប្រាស់៖ ឡានប្រភេទនេះឈ្មួញអាចរកទិញតពីអ្នកប្រើប្រាស់នៅតាមផ្ទះនៅមានស្ថានភាពស្អាត និងគុណភាពល្អផងដែរដោយសារអ្នកប្រើប្រាស់មួយចំនួន ច្រើនប្ដូរស៊េរីថ្មីនិងលក់ចេញទៅឲ្យឈ្មួញដែលមានអ្នកស្គាល់ និងយកមកលក់បន្ត។
ប្រភេទឡានមួយទឹកដេញថ្លៃ៖ ជាឡានមួយទឹកដែលមានសភាពខូចខាតតិចតួច ដោយសារបុក ឬបញ្ហាណាមួយ ដែលធ្វើការដាក់បង្ហាញឲ្យអ្នកទិញ ឈ្មួញធ្វើការដេញថ្លៃយក។ ឡានមួយទឹកប្រភេទនេះពុំសូវមានស្ថានភាពស្អាតទេ តែនៅមានគុណភាពល្អអាចនៅប្រើប្រាស់បាន ដោយតែត្រូវយកមកធ្វើបន្ថែមត្រង់ចំណុចខូចខាតណាមួយប៉ុណ្ណោះ។
ប្រភេទឡានជជុះ ឬ លក់លៃឡុង៖ ឡានប្រភេទនេះមិនចាំបាច់ធ្វើការដេញថ្លៃទេ ព្រោះជាប្រភេទឡានដែលមានលក្ខណៈខូចខាតខ្លាំង ភាពច្រើនជាឡានដែលក្រុមហ៊ុនធានារាប់រងកាត់ចេញពីអ្នកប្រើប្រាស់នៅពេលមានបញ្ហាបុកធ្ងន់ធ្ងរ ឬ ជាប្រភេទឡានលិចទឹក។ ឡានប្រភេទនេះពុំសូវមានឈ្មួញទិញយកមកលក់ឡើយ ព្រោះត្រូវចំណាយប្រាក់ច្រើនដើម្បីជួសជុល និងពុំសូវមានគុណភាព។
ក្រោយទិញបាន ត្រូវធ្វើម៉េចទៀត?
ក្នុងដំណាក់កាលនេះ លោក ងិន សុភាព ជាអ្នកធ្លាប់មានបទពិសោធន៍នាំឡានមួយទឹកមកលក់ប្រាប់ថា បន្ទាប់ពីទិញបាន ត្រូវធ្វើការដឹកជញ្ជួនតាមកប៉ាល់។
ការដឹកជញ្ជូនតាមកប៉ាល់ ត្រូវចំណាយពេលប្រហែលមួយខែ (អាចយូរជាងនេះ ឬ លឿនជាងនេះ) អាស្រ័យទៅលើកប៉ាល់ដែលត្រូវទម្លាក់ទំនិញនៅប្រទេសផ្សេងទៀត។
រថយន្តដែលដឹកជញ្ជូនគឺត្រូវរក្សាទុកក្នុងទូកុងតឺន័រ ក្នុងមួយកុងតឺន័រអាចរក្សាទុករថយន្តបានច្រើនបំផុត ៣-៤ គ្រឿងដោយដាក់ប្រជ្រៀតគ្នា។ ប៉ុន្តែប្រសិនបើរថយន្តណាមានតម្លៃថ្លៃ និងមានទំហំធំគេអាចរក្សាទុកបាន ១-២ គ្រឿងប៉ុណ្ណោះ ខ្លាចប៉ះទង្គិចគ្នាធ្វើឲ្យខាតលើសដើម។
ដោយឡែកចំពោះកម្រៃលើការដឹកជញ្ជូនវិញមានចន្លោះពី ៣ ០០០ ដុល្លារ ទៅ ៤ ០០០ ដុល្លារ ក្នុងមួយទូ ដោយមិនគិតបញ្ចូលការចំណាយលើពន្ធនាំចូលបន្ថែម ទើបធ្វើឲ្យរថយន្តដែលដាក់លក់នៅលើទីផ្សារមានតម្លៃថ្លៃជាងប្រទេសដែលនាំចូល៕