សហព័ន្ធកីឡាសិស្ស និស្សិត ប្រជុំបូកសរុបការងារឆ្នាំចាស់ និងលើកទិសដៅ៧ចំណុចឆ្នាំថ្មី

2019-05-23 07:17:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាសិស្ស និស្សិត បានធ្វើសន្និបាតបូកសរុបការងារឆ្នាំចាស់ និងលើកទិសដៅសំខាន់ៗសម្រាប់អាណត្តិថ្មីព្រឹកមិញនេះនៅឯមជ្ឈមណ្ឌលហ្វឹកហ្វឺនកីឡាថ្មី ដោយអធិបតីភាពឯកឧត្ដម ស សុខា។

រូបភាពអគ្គនាយដ្ឋានកីឡា

ឯកឧត្ដម ស សុខា ប្រធានសហព័ន្ធសិស្ស និស្សិត និងជារដ្ឋលេខាធិការនៃក្រសួងអប់រំ បានឲ្យដឹងថា គាំទ្រចំពោះការលើកឡើងពីទិសដៅអនុវត្តការងារបន្តសម្រាប់អាណត្តិថ្មីនេះ ដែលក្នុងនោះមាន៖

- ពង្រីក និងពង្រឹងសមាគមសិស្ស និស្សិត តាមគ្រឹះស្ថានសិក្សាចូលជាសមាជិកឲ្យបានច្រើន។

- ស្នើគ្រឹះស្ថានឧត្ដមសិក្សា មន្ទីរអប់រំ យកចិត្តទុកដាក់ និងជំរុញសមាគមកីឡាសិស្ស និស្សិតឲ្យធ្វើការហ្វឹកហាត់កីឡាក្រៅម៉ោង និងចូលរួមប្រកួតប្រជែងឲ្យបានផុលផុស។

- ស្នើគ្រឹះស្ថានឧត្ដមសិក្សា មន្ទីរអប់រំ ពង្រឹងការជ្រើសរើសកីឡាករ កីឡាការិនី ឲ្យសមស្របទៅនិងបច្ចេកទេសក្នុងការចូលរួមប្រកួតប្រជែងកម្មវិធីសិស្ស និស្សិត។

- សហការជាមួយសហព័ន្ធកីឡាជាតិបង្កើតវគ្គបណ្ដុះបណ្ដាលមន្ត្រីជំនាញតាមគ្រឹះស្ថានសិក្សា។

- កៀរគរសប្បុរសជន និងដៃគូឯកជន ដើម្បីជួយគាំទ្រសកម្មភាពកីឡាសិស្ស និស្សិត។

- ពង្រឹងគុណភាព និងប្រសិទ្ធភាពនៃការប្រកួតកីឡាសិស្ស និស្សិតថ្នាក់ជាតិ។

- លើកទឹកចិត្តគ្រឹះស្ថានសិក្សាដែលធ្វើសកម្មភាពកីឡា និងជម្រើសរើសគ្រឹះស្ថានឆ្នើមឲ្យទៅចូលរួមការប្រកួតសិស្ស និស្សិតលក្ខណៈអន្តរជាតិ។

រូបភាពអគ្គនាយដ្ឋានកីឡា

ប្រធានសហព័ន្ធខាងលើ ក៏ស្តតលើបញ្ហាប្រឈមនាពេលកន្លងមកនេះចំនួន៤ផងដែរ ទី១ សូមឲ្យសមាជិករបស់សហព័ន្ធទាំងអស់បន្តជួយផ្សព្វផ្សាយ ដើម្បីឲ្យមានសមាជិកកាន់តែច្រើនពីគ្រឹះស្ថានរដ្ឋ និងឯកជន។ ព្រោះបច្ចុប្បន្ននេះនៅមានចំនួនតិចមែនទែន។ ទី២ សូមចាត់តាំងការហ្វឹកហាត់ក្រៅម៉ោងសិក្សាឲ្យបានត្រឹមត្រូវ និងផ្សព្វផ្សាយឲ្យទូលំទូលាយ បង្កើតឲ្យមានក្លឹបផ្សេងៗដើម្បីជ្រើសរើសបានអ្នកមានសមត្ថភាព។ ទី៣ សូមជ្រើសរើសកីឡាករ កីឡាការិនីឲ្យមានតម្លាភាព គុណភាព ដើម្បីកុំឲ្យកីឡាករមានសមត្ថភាពពិតបាក់ទឹកចិត្ត។ ទី៤ មន្ត្រីសហព័ន្ធត្រូវមានរបាយការណ៍ច្បាស់លាស់ ដើម្បីស្នើទៅសហព័ន្ធកីឡាជាតិនានាបង្កើតឲ្យមានវគ្គសិក្សាខ្លីៗដើម្បីពង្រឹងបន្ថែម។

រូបភាពអគ្គនាយដ្ឋានកីឡា

រំលឹកដែរថា កម្មវិធីសន្និបាតបូកសរុបការងារ និងលើកទិសដៅអនុវត្តអាណត្តិថ្មីរបស់សហព័ន្ធកីឡាសិស្ស និស្សិត នេះធ្វើឡើងកាលពីព្រឹកមិញនៅមជ្ឈមណ្ឌលហ្វឹកហ្វឺនកីឡាថ្មីជាប់ពហុកីឡដ្ឋានជាតិ។ ក្រោមអធិបតីភាពឯកឧត្ដម ស សុខា ប្រធានសហព័ន្ធ មន្ត្រីក្រសួងអប់រំ យុវជន និងកីឡាមួយចំនួន រួមទាំងលោកគ្រូ អ្នកគ្រូមកពីបណ្ដាលខេត្តមួយចំនួនផងដែរ៕

អត្ថបទ៖ នួន ស៊ីណា