ធ្លាយចេញលក្ខណៈសម្បត្តិកាមេរ៉ាទាំងបីគ្រាប់លើ iPhone 11

2019-05-26 03:03:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្បិតថាយូរខែទៀតទើប iPhone ស៊េរីថ្មី និង iOS 13 ប្រកាសចេញជាផ្លូវការ ប៉ុន្តែប្រភពចំនួនពីរបានចែករំលែកដំណឹងសំខាន់ៗមួយចំនួនអំពី iPhone ជំនាន់ថ្មី និងប្រព័ន្ធប្រតិបត្តិការជំនាន់ចុងក្រោយផងដែរ។

ចាប់ផ្ដើមជាមួយ iPhone 11 គឺវាដូចគ្នានឹងដំណឹងលេចចេញកន្លងមកដែរ ដោយ iPhone ស៊េរីថ្មីទាំងគូមានបំពាក់អេក្រង់ OLED ទំហំ ៥,៨ អ៊ីញ និង ទំហំ ៦,៥ អ៊ីញ។ គួរសោកស្ដាយនោះគឺស្នាមឆាកនៅមិនផ្លាស់ប្ដូរទំហំនោះឡើយ។

យ៉ាងណាក្ដីប្រភពបានលើកឡើងថាមុខងារ FaceID នឹងមានសមត្ថភាពខ្លាំងជាងមុនលើការដោះសោ។ ឧទាហរណ៍ដូចជាអាចចំណាំផ្ទៃមុខបានក្នុងទំហំធំទូលាយជាងមុន។ រន្ធបំពងសំឡេងបែប Stereo ក៏នឹងមានសមត្ថភាពប្រសើរជាងមុខផងដែរ។

អំពីកាមេរ៉ាវិញ iPhone ឆ្នាំ ២០១៩ នឹងមានបំពាក់កាមេរ៉ា ៣ នៅខាងក្រោយ មួយជាកាមេរ៉ាធម្មតា, មួយជាកាមេរ៉ា Zoom និងមួយទៀតជាកាមេរ៉ា Ultra-Wide។ កាមេរ៉ាទីបីនេះដើមឡើយត្រូវមានមុខងាររក្សាលំនឹង OIS ប៉ុន្តែ Apple បានសម្រេចទុកប្រើលើ iPhone ឆ្នាំ ២០២០។ ដូចនេះមុខងារ OIS នឹងមានតែនៅលើកាមេរ៉ាមេ និងកាមេរ៉ា Zoom ប៉ុណ្ណោះ។

ចំពោះកាមេរ៉ា Wide-Angle វិញ អាចផ្ដិតយករូបភាពក្នុងទំហំ ១២០ ដឺក្រេ។ ទំហំនេះមិនធំជាងគេណាស់ណាឡើយ ប៉ុន្តែក៏មិនតូចជាងកាមេរ៉ារបស់គូប្រជែងផ្សេងទៀតដែរ។ គួរចាប់អារម្មណ៍នោះគឺ ភ្លើង LED នៅខាងក្រោយនឹងមិនឡើងទំហំនោះទេ ប៉ុន្តែនឹងអាចជះពន្លឺបានភ្លឺ និង ធំជាងមុន។ ចំណែកឯកម្រាស់នៃកាមេរ៉ានឹងស្ដើងជាងមុន មិនលៀនខ្លាំងដូចមុនឡើយ។

ចំពោះ iOS 13 វិញគឺនឹងមានបន្ថែមមុខងារថ្មីដែលស្រដៀងនឹង Dark Mode ហើយមានសមត្ថភាពចាត់ចែង RAM ល្អប្រសើរជាងមុន។ ចំណែកការ Jailbreak ក៏នឹងពិបាកជាងមុនផងដែរ ជាមួយការពង្រឹងប្រព័ន្ធការពារថ្មី៕

ប្រភព៖ GSMarena ប្រែសម្រួល៖ សុខហេង