សុំសរសើរ! ទោះរវល់ការងារសិល្បៈក៏ រតនៈពិសិដ្ឋ ខំឆ្លៀតរកជំនួយជួយមន្ទីរពេទ្យគន្ធបុប្ជាដែរ

2019-05-27 10:22:15
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្តែង និងជាម៉ូដែលរូបសង្ហា រតនៈ ពិសិដ្ឋមិនថាក្នុងការងារសិល្បៈ ឬការងារសង្គម តែងតែមានវត្តមានអញ្ជើញចូលរួមយ៉ាងសកម្ម។

ដោយឡែកកាលពីថ្ងៃទី២៦ ខែឧសភា ឆ្នាំ២០១៩ លោកបានចូលរួមក្នុងកម្មវិធីជិះកង់សប្បុរសធម៌ ស្វែងរកថវិកា ដើម្បីមន្ទីរពេទ្យគន្ធបុប្ផា ដែលកំពុងត្រូវការការចូលរួមជាចាំបាច់ សម្រាប់ការជួយសង្គ្រោះជីវិតកុមាររាប់ពាន់អ្នកជារៀងរាល់ថ្ងៃ។

ជាក់ស្តែង វត្តមានជិះកង់រកជំនួយសប្បុរសធម៌សម្រាប់មន្ទីរពេទ្យគន្ធាបុប្ជានៅឯខេត្តសៀមរាបក្នុងកម្មវិធីមួយឈ្មោះ "តោះ! នាំគ្នាជិះកង់ដើម្បីសហគមន៍លើកទី៦" តារារូបសង្ហាររូបនេះបានរៀបរាប់ប្រាប់ Sabay ថា លោកពិតជារីករាយខ្លាំងបំផុតក្នុងការចូលរួមកម្មវិធីឆ្នាំនេះ។ ពិតជាកាន់តែពិសេសថែមទៀតដោយមានការគាំទ្រ និងចូលរួមយ៉ាងច្រើនកុះករពីសំណាក់អ្នកជិះកង់ច្រើនជាងបណ្ដាឆ្នាំមុនៗ ថែមទាំងទទួលបានការឧបត្ថម្ភជាច្រើនពីស្ថាប័ន និងក្រុមហ៊ុនផ្សេងៗទៀតផងដែរ។ គួរឲ្យកត់សម្គាល់អ្វីដែលកាន់តែរំភើបទៅទៀតនោះ គឺសំបុត្រចូលរួមត្រូវបានលក់អស់តាំងពីថ្ងៃចាប់បើកលក់ក្នុងសប្ដាហ៍ដំបូង តម្លៃ ១៥ ដុល្លារ ហើយចំនួនក៏បន្តកើនឡើងជាលំដាប់ ដែលនេះត្រូវបានបង្កើនទឹកចិត្តដល់ក្រុមការងារ និងការផ្តល់ឲ្យលោកចូលរួមពីលោក គឹម ប៊ុនថាន់ ស្ថាបនិកនៃសមាគមអ្នកជិះកង់ផងដែរ។

តារាដដែលបន្តទៀតថា គ្រប់គ្នារំពឹងទុកយ៉ាងមុតមាំថា កម្មវិធីនេះនឹងក្លាយជាព្រឹត្តិការណ៍នៃសកម្មភាពមនុស្សធម៌ប្រចាំឆ្នាំ ដើម្បីមោទកភាពរបស់សង្គមជាតិ។ ជាព្រឹត្តិការណ៍បង្កើតភាពកក់ក្ដៅជូនប្រជាពលរដ្ឋ និងកុមារកម្ពុជាទូទាំងប្រទេស ហើយលោកផ្ទាល់ក៏មានមោទកភាពចំពោះការចូលរួមក្នុងកម្មវិធីសប្បុរសធម៌ដ៏ធំមួយនេះដែរ។

គួររំលឹកដែរថា បើតាមសម្តីលោក គឹម ប៊ុនថាន់ ស្ថាបនិកនៃសមាគមអ្នកជិះកង់ ឆ្នាំដំបូងនៃកម្មវិធីជិះកង់ដើម្បីសហគមន៍ បានធ្វើឡើងនៅក្នុងខែឧសភា ឆ្នាំ២០១៤ ដែលក្នុងឆ្នាំដំបូងនោះមានអ្នកជិះកង់ចូលរួមតែ ២០០នាក់ប៉ុណ្ណោះ ក្រោមការចូលរួមពីសំណាក់ក្រុមហ៊ុននានាចំនួន ២៣ក្រុមហ៊ុន ប្រមូលមូលនិធិសប្បុរសពីអ្នកចូលរួមបានចំនួនតែជាង ២៥០០ដុល្លារប៉ុណ្ណោះ។ ការរៀបចំកម្មវិធីនេះត្រូវបានទទួល ការចូលរួមកើនឡើងជារៀងរាល់ឆ្នាំ។ ឆ្នាំ២០១៨ កន្លងទៅដែលជាការរៀបចំឆ្នាំទី៥ នៃសកម្មភាពជិះកង់ដើម្បីសហគមន៍ ដែលរៀបចំឡើងសមាគមអ្នកជិះកង់ខេត្តសៀមរាប ទទួលបានអ្នកចូលរួម ៨៥៩នាក់ មានបណ្ដាក្រុមហ៊ុននានាចំនួន ២៦ក្រុមហ៊ុនបានចូលរួមឧបត្ថម្ភ និងទទួលបានមូលនិធិសប្បុរសជិត ២៥ ០០០ដុល្លារសម្រាប់បរិច្ចាគជូនមន្ទីរពេទ្យកុមារគន្ធបុប្ផានិងលើកទី ៦នៅសៀមរាបនេះ នៅខេត្តសៀមរាបដដែល ទទួលបានអ្នកចូលរួមចំនួន ៩៦៤នាក់ និងអង្គភាពពាក់ពន្ធខេត្តចំនួន ១០០នាក់បន្ថែមទៀតផងដែលតែតួលេខថវិកាចំនួនទឹកប្រាក់សរុបមិនទាន់ទទួលបានច្បាស់នៅឡើយព្រោះកំពុងបូកសរុបកាត់ចំណាយផ្សេងក្នុងកម្មវិធី តែការប្រគល់ជូនទឹកប្រាក់ដល់មន្ទីរពេទ្យគន្ធាបុប្ផាគឺធ្វើនៅថ្ងៃទី១ខែមិដុនាឆ្នាំ២០១៩៕