ត្បូងឃ្មុំឈ្នះពាន Hun Sen Cup ថ្នាក់ខេត្តដោយកំណត់ត្រាមិនចាញ់សោះ

2019-05-29 12:59:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសខេត្តត្បូងឃ្មុំបានក្លាយជាជើងឯកពានរង្វាន់សម្តេចតេជោ ហ៊ុន សែន (Hun Sen Cup)ថ្នាក់ខេត្តប្រចាំឆ្នាំ២០១៩ បន្ទាប់ពីទទួលបានជ័យជម្នះលើក្រុមខេត្តជម្រើសសៀមរាបដោយលទ្ធផល ១-០ ក្នុងវគ្គផ្តាច់ព្រ័ត្រ ខណៈចំណាត់ថ្នាក់លេខ៣បានទៅក្រុមខេត្តរតនគីរី។

ក្រុមខេត្តត្បូងឃ្មុំ

ការប្រកួតវគ្គផ្តាច់ព្រ័ត្ររវាងក្រុមខេត្តសៀមរាប និងខេត្តត្បូងឃ្មុំជួរចិត្តយ៉ាងខ្លាំងនៅវគ្គទី១ដោយក្រុមនីមួយៗសុទ្ធតែមានឱកាសវាយសម្រុកគ្នាទៅវិញទៅមក ប៉ុន្តែគ្មានគ្រាប់បាល់កើតឡើង។ អ្វីដែលជារឿងមិនល្អសម្រាប់ខេត្តសៀមរាបគឺកីឡាករម្នាក់ទទួលបានកាតក្រហមចេញពីទីលានដែលត្រូវលេង១០នាក់ប៉ុណ្ណោះទល់នឹងខេត្តត្បូងឃ្មុំ១១នាក់។

នៅវគ្គទី២ដោយមានអំណោយផលសមាជិកច្រើនជាង ខេត្តត្បូងឃ្មុំបានទម្លាយសំណាញ់ទីរបស់ខេត្តសៀមរាបបានសម្រេចដើម្បីនាំមុខ ១-០ នៅដើមវគ្គទី២។ បន្ទាប់ពីត្រូវបានដៃគូនាំមុខ ខេត្តសៀមរាបបានព្យាយាមដាក់សម្ពាធខ្លាំង ខណៈខេត្តត្បូងឃ្មុំបានប្រឹងការពារ និងវាយបកវិញប្រកបដោយគ្រោះថ្នាក់។ យ៉ាងណាលទ្ធផល ១-០ រក្សារហូតដល់ចប់ការប្រកួត។

ក្រុមខេត្តសៀមរាប

ដូច្នេះក្រុមជើងឯកថ្នាក់ខេត្តបានទៅក្រុមខេត្តត្បូងឃ្មុំ ហើយខេត្តសៀមរាបទទួលបានចំណាត់ថ្នាក់លេខ២។ ចំពោះចំណាត់ថ្នាក់លេខ៣បានទៅក្រុមខេត្តរតនគីរី បន្ទាប់ពីទទួលបានជ័យជម្នះលើក្រុមខេត្តកោះកុងដោយលទ្ធផល ៣-១។

អ្វីដែលគួរឲ្យចាប់អារម្មណ៍ទៀត ត្បូងឃ្មុំរក្សាកំណត់ត្រាដ៏អស្ចារ្យដោយមិនស្គាល់ពាក្យថា បរាជ័យសោះតាំងពីប្រកួតវគ្គសន្សំពិន្ទុ និងជម្រុះតាំងពីដំបូងរហូតក្លាយជាជើងឯកថ្នាក់ខេត្តនេះ។ ៣ក្រុមមកពីខេត្តគឺ ត្បូងឃ្មុំ សៀមរាប និងរតនគីរីបានឡើងទៅជុំផ្តាច់ព្រ័ត្រថ្នាក់ជាតិដែលត្រូវជួបក្រុមអាជីពដែលលេងលីគកំពូលកម្ពុជា៕

ប្រាក់រង្វាន់

លេខ១៖ ខេត្តត្បូងឃ្មុំ ទទួលបាន ១៥លានរៀល
លេខ២៖ ខេត្តសៀមរាប ទទួលបាន ៧,៥លានរៀល
លេខ៣៖ ខេត្តរតនគីរី ទទួលបាន ៥លានរៀល
កីឡាករល្អជាងគេ៖ សំអាត រ៉ាវី របស់ខេត្តត្បូងឃ្មុំ ទទួលបានប្រាក់៥០ម៉ឺនរៀល
អ្នកចាំទីល្អជាងគេ៖ សំអាត រ៉ាវី របស់ខេត្តត្បូងឃ្មុំ ទទួលបានប្រាក់៥០ម៉ឺនរៀល
កីឡាកររកបានគ្រាប់បាល់ច្រើនជាងគេ៖ ម៉ាត់ អ៉ីហ្សា របស់ខេត្តកុងកោះ ទទួលបានប្រាក់ ៥០ម៉ឺនរៀល
គ្រូបង្វឹកល្អជាងគេ៖ ផល រស្មីពេជ្រ របស់ខេត្តត្បូងឃ្មុំ ទទួលបាន ៥០ម៉ឺនរៀល