ក្មេងស្រីសំណាង៥នាក់ គ្រូ១នាក់ត្រូវទូតអាមេរិកយកទៅទស្សនកិច្ចសិក្សាកីឡានៅ USA

2019-05-31 07:33:06
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនតីខ្មែរ៥នាក់ និងគ្រូបង្វឹកនារី១នាក់ត្រូវបានស្ថានទូតអាមេរិកប្រចាំនៅប្រទេសកម្ពុជា និងមូលនិធីកុមារកម្ពុជា (CCF)ជ្រើសរើសយកទៅទស្សនកិច្ចសិក្សាផ្នែកកីឡាបាល់ទាត់នៅសហរដ្ឋអាមេរិករយៈពេល២សប្តាហ៍។

លោក Neeson និងលោក Anderson

ក្នុងពិធីអបអរសាទរ និងជូនដំណើរកាលពីល្ងាចថ្ងៃទី៣០ ខែឧសភា នៅអង្គការ CCF ដែលមានវត្តមានតំណាងស្ថានទូតអាមេរិក ឪពុកម្តាយ សាច់ញាតិ និងតំណាងអង្គការ លោក Gary Anderson អនុប្រធានទូតស្តីទីបានបង្ហាញចំណាប់អារម្មណ៍ថា លោករីករាយដែលនៅរដូវក្តៅនេះ សិស្ស៥នាក់ និងគ្រូម្នាក់មកពីមូលនិធីកុមារកម្ពុជានឹងធ្វើដំណើរទៅកាន់រដ្ឋ New Jersey និង New York ដើម្បីចូលរួមបោះជំរំកីឡាបាល់ទាត់នារីដែលមានរយៈពេល២សប្តាហ៍។

ជាមួយគ្នានេះ លោកក៏បានអរគុណដល់ដៃគូគឺមូលនិធិ ASA Foundation និងក្រុម CCFដែលបានរៀបចំឲ្យកើតមានកម្មវិធី«ការលើកកម្ពស់សមត្ថភាពរបស់យុវជនតាមរយៈកីឡា»កាលពីឆ្នាំ២០១៨ និងជ្រើសរើសបានកីឡាការិនីឆ្នើមទាំង៥នាក់។

លោក Scoth Neeson

ស្ថាបនិកអង្គការលោក Scoth Neeson បាននិយាយថា ការខិតខំប្រឹងប្រែងរបស់ប្អូនបានធ្វើឲ្យប្អូនទទួលបានជោគជ័យមួយចំហ៊ាននេះ។ អ្នកទាំង៥នាក់ និងគ្រូបង្វឹក១នាក់គឺជាមនុស្សដែលទទួលបានជោគជ័យដោយភាពស្ងាត់ស្ងៀម។ លោកពិតជាភ្ញាក់ផ្អើលដែលសិស្សទាំង៥នាក់នេះធ្វើបានល្អឥតខ្ចោះទាំងការសិក្សានៅសាលា និងបាល់ទាត់នៅលើទីលានដែលផ្សាភ្ជាប់នូវវិន័យ ភាពជាអ្នកដឹកនាំ និងការរៀបចំខ្លួនប្រាណ។

រូបថតជុំគ្នាក្នុងពិធីជូនដំណើរ

ចំពោះគ្រូបង្ហាត់ លក្ខិណា បានឲ្យដឹងថា កត្តាដែលសិស្សទាំង៥នាក់ត្រូវបានជ្រើសរើសគឺទី១ ពួកគាត់រៀនពូកែនៅសាលារៀន។ ទី២ ពួកគាត់ទៅហ្វឹកហាត់ទៀងទាត់ គោរពពេលវេលាបានល្អឥតខ្ចោះ។ ទី៣ ការហ្វឹកហាត់របស់ពួកគាត់ល្អ និងចំណុចសំខាន់មួយគឺកម្មវិធីនេះផ្តោតលើការលើកកម្ពស់ស្ត្រី ដូច្នេះហើយបានជាជ្រើសរើសយកតែនារីទាំងអស់។

សូមទស្សនាវីដេអូ

យុវតី ឈឺន សុជាតា អាយុ១៧ឆ្នាំបានរៀបរាប់ថា តាំងពីតូចមកនាងចូលចិត្តលេងបាល់ទាត់។ នៅពេលគ្រូអត់ប្រៀប នាងនាំគ្នាលេងបាល់ទាត់ជាមួយប្រុសៗ។ ឱកាសទៅសហរដ្ឋអាមេរិកនេះនាងមិនស្មានថា កើតមានចំពោះរូបនាងសោះ ប៉ុន្តែពេលចូលរួមកម្មវិធីបាល់ទាត់«ការលើកកម្ពស់សមត្ថភាពរបស់យុវជនតាមរយៈកីឡា»កាលពីឆ្នាំ២០១៨ នាងមានវត្តមានរហូត ខិតខំរៀនសូត្រពីរបៀបលេង កាន់វិន័យបានល្អ ព្រមទាំងរៀនទទួលបានលទ្ធផលល្អនៅសាលាដែលជាហេតុធ្វើឲ្យអ្នកគ្រប់គ្រងជ្រើសរើស។

គ្រូបង្ហាត់បាល់ទាត់ លក្ខិណា

កាលពីឆ្នាំ២០១៨ ស្ថានទូតអាមេរិក និងអង្គការជាដៃគូបានរៀបចំកម្មវិធី«ការលើកកម្ពស់សមត្ថភាពរបស់យុវជនតាមរយៈកីឡា»ដែលមានសិស្សានិសិស្សជិត១០០នាក់ចូលរួមដែលផ្តោតលើការលើកកម្ពស់សមត្ថភាពយុវជនតាមរយៈកីឡា និងជាផ្នែកសំខាន់ចំាបាច់នៃការអប់រំ។ កម្មវិធីហ្វឹកហាត់បាល់ទាត់រយៈពេល៦ខែនេះហើយដែលអ្នកគ្រប់គ្រងតាមដាន និងយកចិត្តទុកដាក់ពិនិត្យរហូតដល់សិស្សឆ្នើម៥នាក់ត្រូវបានជ្រើសរើស និងបញ្ជូនទៅទស្សនកិច្ចសិក្សាផ្នែកកីឡានៅអាមេរិកដែលខាងស្ថានទូតទទួលបន្ទុកលើការចំណាយទាំងស្រុង។

យុវតីទំាង៥នាក់ដែលបានទៅអាមេរិក

តាមការគ្រោងទុក យុវតីទាំង៥នាក់ និងគ្រូបង្វឹកត្រូវដល់ Hingstown, New Jersey និង New York City ដែលមានយុវជនមកប្រទេសជាច្រើនទៀតដើម្បីចូលរួមសកម្មភាព ការបោះជំរំហ្វឹកហាត់បាល់ទាត់ ប្រជុំលក្ខណៈអាជីព សិក្ខាសាលា ទស្សនាកន្លែងកីឡា ឱកាសស្ម័គ្រចិត្ត សកម្មភាពវប្បធម៌ និងបដិសណ្ឋារកិច្ចជាដើម។ យុវទាំង៥នាក់គឺ អ៊ុន ម៉ាណែត អាយុ១៦ឆ្នាំ, រ៉ាន់ រតនា អាយុ១៥ឆ្នាំ កុន ញ៉ាញ់ អាយុ១៥ឆ្នាំ ហឿម ផាត់ អាយុ១៥ឆ្នាំ និង ឈឺន សុជាតា អាយុ១៧ឆ្នាំ៕