លោក Felix ថា កីឡាករដែលជ្រើសរើសសុទ្ធតែមានឆន្ទៈខ្ពស់ដើម្បីជាតិទាំងអស់

2019-06-05 05:06:27
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Felix គ្រូបង្វឹកជម្រើសជាតិកម្ពុជាបកស្រាយ និងពន្យល់ពីក្រុមបាល់ទាត់ជម្រើសជាតិកម្ពុជាដែលលោកបានកោះហៅដើម្បីប្រកួតជាមួយក្រុមជម្រើសជាតិប៉ាគីស្ថាន ល្ងាចថ្ងៃទី៦ ខែមិថុនា ខាងមុខនេះក្នុងព្រឹត្តិការណ៍ជម្រុះ World Cup 2022 និង Asian Cup 2023 ជុំទី១នៅតំបន់អាស៊ី។

លោក Felix

ក្នុងសន្និសីទសារព័ត៌មានមិញនេះ លោកបាននិយាយថា កីឡាករបាល់ទាត់គឺត្រូវការលេងជាក្រុម ដូច្នេះលោកត្រូវការជ្រើសរើសកីឡាករដែលលេងជាក្រុម។ កីឡាករទាំង២៦នាក់ដែលលោកបានជ្រើសរើសសុទ្ធតែមានឆន្ទៈខ្ពស់ទាំងអស់ដើម្បីជាតិ។ កីឡាករខ្លះមិនសូវបានលេងលីគ ប៉ុន្តែពួកគេទើបតែមិនបានលេងប្រហែលជាពីរបីប្រកួតប៉ុណ្ណោះ ក្រុមការងាររបស់លោកបានតាមដានយូរហើយ និងបានទំនាក់ទំនងច្បាស់លាស់ជាមួយថ្នាក់ដឹកនាំក្លឹបដើម្បីពិនិត្យមើលពីគុណភាព អត្តចរឹក និងវិន័យទើបបានជាសម្រេចជ្រើសរើសយកពួកគេ។

បើនិយាយពីកីឡាករ ដាវ នីម របស់គីរីវង់សុខសែនជ័យត្រូវបានលោកគ្រូបង្វឹកជនជាតិអាហ្សង់ទីនបានលើកឡើងថា រូបគេជាកីឡាករដែលមានបច្ចេកទេសល្អ ល្បឿនលឿន និងកម្លាំងស៊ុហ្វក៏ល្អ។ រូបគេសក្តិសមជាប់ជម្រើសជាតិដើម្បីសិក្សារៀនសូត្របន្ថែមទៀតក្នុងក្រុមជម្រើសជាតិ។ កីឡាកររូបនេះអាចលេងបានទាំងតំបន់ប្រយុទ្ធ និងបម្រើស្លាប។

ក្រុមកម្ពុជាហ្វឹកហាត់

អ្វីដែលគួរឲ្យភ្ញាក់ផ្អើលគឺលោក Felix បាននិយាយថា រាល់ការប្រកួតគ្រប់កម្មវិធីទាំងអស់ពោលគឺទាំងកម្រិតយុវជន និងក្រុមធំតាំងពីមុនៗមកគឺដើម្បីធ្វើតេស្តទាំងអស់។ ការធ្វើតេស្តនេះគឺដើម្បីធ្វើឲ្យក្រុមជម្រើសជាតិកម្ពុជាល្អប្រសើរ និងរីកចម្រើន។

លោកជឿជាក់ និងមានទំនុកចិត្តខ្ពស់លើកីឡាករទាំង២៦នាក់ដែលលោកបានច្រើន ហើយថ្ងៃស្អែកពួកគេនឹងផ្តល់ភាពសប្បាយរីករាយដល់អ្នកគាំទ្រ៕

អត្ថបទ៖ ជាន ចាន់រ៉ា