សហព័ន្ធសម្រេចយកបឹងតាមោក ធ្វើជាកន្លែងប្រកួតកីឡាទឹក២ប្រភេទនៅស៊ីហ្គេម
- 2019-06-05 07:38:24
- ចំនួនមតិ 0 | ចំនួនចែករំលែក 0
សហព័ន្ធសម្រេចយកបឹងតាមោក ធ្វើជាកន្លែងប្រកួតកីឡាទឹក២ប្រភេទនៅស៊ីហ្គេម
ចន្លោះមិនឃើញ
បឹងតាមោក ដែលស្ថិតក្នុងរាជធានីភ្នំពេញ ត្រូវបានសហព័ន្ធកីឡាទូកកានូ និងរ៉ូអ៊ីងកម្ពុជា យកធ្វើជាវារីកីឡដ្ឋានសម្រាប់ការប្រកួតកីឡាប្រភេទនេះ ទាំងថ្នាក់ជាតិ និងអន្តរជាតិ។ នេះបើតាមការបញ្ជាក់របស់លោក មាស សារិន អនុប្រធានអចិន្ត្រៃយ៍សហព័ន្ធកីឡាទូកកានូ និងរ៉ូអ៊ីងកម្ពុជា ដែលបានថ្លែងទៅកាន់អ្នកកាសែតបន្ទាប់ពីចប់កិច្ចប្រជុំគណៈកម្មាធិការប្រតិបត្តិលើកទី៤ ឆ្នាំ២០១៩-២០២៣ កាលពីព្រឹកថ្ងៃទី៥ ខែមិថុនា ឆ្នាំ២០១៩ នៅទីស្តីការក្រសួងមហាផ្ទៃ។ កិច្ចប្រជុំនេះ ធ្វើឡើងក្រោមអធិបតីភាពសម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា។
លោកបានបញ្ជាក់ថា ការយកបឹងតាមោក ធ្វើជាវារីកីឡដ្ឋាន គឺជាការប្រសើរបំផុតពោលគឺវាជារមណីយដ្ឋានសម្រាប់ការកម្សាន្តផង និងជាទីកន្លែងដែលនៅជិតក្រុងផង។
លោកអនុប្រធានបន្តថា ជាផែនការយុទ្ធសាស្រ្តនៅឆ្នាំ២០១៩ ទីកន្លែងនេះ នឹងត្រូវប្រកួតកម្រិតថ្នាក់ជាតិ ហើយនៅឆ្នាំ២០២០ នឹងត្រូវបើកប្រកួតសាកល្បងបច្ចេកទេសជាមួយប្រទេសក្នុងតំបន់ ដើម្បីវាស់កម្រិតសមត្ថភាព។ មិនតែប៉ុណ្ណោះ វានឹងត្រូវធ្វើជាកន្លែងប្រកួតសម្រាប់ព្រឹត្តិការណ៍ស៊ីហ្គេមឆ្នាំ២០២៣ផងដែរ។
ជាមួយគ្នានេះ លោក មាស សារិន ក៏បានលើកឡើងដែរថា៖ «ចង់បានកម្លាំងមួយជាកម្លាំងចលករដើម្បីឲ្យសហព័ន្ធកីឡាទូកកានូ និងរ៉ូអ៊ីងកម្ពុជាឆ្ពោះទៅមុខ ពីព្រោះការកកើតតាំងពីឆ្នាំ១៩៩៨ រហូតមកដល់ពេលនេះ ច្រើនឆ្នាំមកហើយ ដោយយើងធ្វើដំណើរយឺតបំផុតដោយសារបញ្ហាកង្វះខាត ដែលជាហេតុមិនអាចធ្វើការវិវឌ្ឍបាន ហើយបើមានការគាំទ្រពេញទំហឹងបែបនេះ បច្ចេកទេសយើងក៏ទៅមុខដែរ។ ហើយនៅថ្ងៃនេះ ទទួលបានការគាំទ្រពីសម្តេចក្រឡាហោម ស ខេង និងសមាជិកទាំងអស់ គឺយើងមានវិធីដើម្បីរកថវិកាទ្រទ្រង់សកម្មភាពកីឡារបស់យើងឲ្យមាននិរន្តភាព»៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
