ចង់បំបែកចម្ងល់រឿងអង្ករខ្មៅ អ្នកស្រាវជ្រាវខ្មែរអំពាវនាវរកជំនួយ៥០០០ដុល្លារ
- 2019-06-06 05:42:47
- ចំនួនមតិ 0 | ចំនួនចែករំលែក 0
ចង់បំបែកចម្ងល់រឿងអង្ករខ្មៅ អ្នកស្រាវជ្រាវខ្មែរអំពាវនាវរកជំនួយ៥០០០ដុល្លារ
ចន្លោះមិនឃើញ
អ្នកស្រាវជ្រាវផ្នែកបុរាណវិទ្យាខ្មែរមួយក្រុមកំពុងអំពាវនាវរកថវិកាចំនួនប្រាំពាន់ដុល្លារដើម្បីបំបែកចម្ងល់ទាក់ទងនឹងអង្ករខ្មៅដែលរកឃើញនៅខេត្តស្ទឹងត្រែង និងជាប់ពាក់ព័ន្ធទៅនឹងជំនឿជាច្រើន។
លោកសាស្រ្តាចារ្យផ្នែកបុរាណវិទ្យា ធុយ ចាន់ធួន បានសរសេរលើទំព័រហ្វេសប៊ុករបស់លោកកាលពីម្សិលមិញថាអង្ករខ្មៅនេះត្រូវបានរកឃើញនៅទួលមួយក្នុងភូមិកាំងតេជោ ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង និងថាប្រជាពលរដ្ឋនៅទីនោះបានដឹងពីវត្តមានអង្ករខ្មៅនេះខ្លះតាំងពីឆ្នាំ១៩៤០ និងខ្លះបានដឹងថាមាននៅឆ្នាំ១៩៨០។
លោកសាស្រ្តាចារ្យសរសេរបន្តថានៅទីទួលនោះមានបន្សល់ទុកនៅឥដ្ឋជាច្រើនដុំ ដែលទំនងជាទីប្រាសាទបុរាណ បើ ទោះបីមិនមានឃើញផ្ដែ ឬសរសេរពេជ្យនៅទីនោះក្ដី។ លោកបន្ថែមថា៖ «សណ្ឋានរូបអង្ករខ្មៅខ្ញុំបានពិនិត្យហើយរើសយកគ្រាប់ដែលធំជាងគេយកមកធ្វើការពិនិត្យផ្ទាល់ភ្នែក ដោយប្រើខ្នាតម៉ាទ្រិច និងអង្ករលើក្រដាសមីលីម៉ែត្រជាជំនួយ ឃើញថាគ្រាប់អង្ករខ្មៅធំជាងគេនេះមានរាងមូលទ្រវែងទំហំប្រមាណបណ្ដោយ៦ ម.ម. ទទឹង២.ម.ម. ខ្ញុំបានប្រើកែវពង្រីក (Magnify glass) នេះជាគ្រាប់អង្ករពិតៗ ព្រោះមានទម្រង់ឆ្នូតៗតាមសសៃនៃស្រទាប់គ្រាប់ស្រូវ។ វាជាគ្រាប់អង្ករសុទ្ធ ដែលមានទំហំ ធំ តូច ខុសៗគ្នានៅលាយឡំជាមួយគ្នា»។
ប្រភពដដែលបន្តថាអង្ករខ្មៅនេះត្រូវបានអ្នកស្រុកជឿថាជាវត្ថុស័ក្ដសិទ្ធិ ជួយឲ្យអ្នកដែលមានអង្ករនេះសុខសប្បាយ រកស៊ីមានបាន និងគ្មានជំងឺជាដើម។ លោកសាស្រ្តាចារ្យបានជួបអ្នកដែលមានអង្ករខ្មៅនេះ ហើយអ្នកទាំងនោះបាននិយាយដូចនេះ។
បើនិយាយពីសិលាចារឹកខ្មែរវិញលោកថាអ្នកជំនាញសិលាចារឹកបានលើកឡើងថាមាននិយាយពីអង្ករខ្មៅនេះដែរ។ លោកសរសេរបន្តថា៖ «នៅក្នុងសិលាចារឹកស្ដុកកក់ធំ មាននិយាយអំពីព្រំប្រទល់ដីមួយកន្លែងដែលលាតសន្ធឹងទៅដល់ «ក្រលាដុតស្រូវ» (ក្រលាតុតស្រូ) ដែលយើងអាចយល់បានថាទីជាក្រលាដុតស្រូវនោះពុំមែនជាទីតាំងមានទំហំតូចជាធម្មតាឬជាទីតាំងដែលគេធ្វើចល័តនោះឡើយ។ ដូច្នេះយើងឃើញថា «ដុតស្រូវ» (អង្ករខ្មៅ) នេះគឺជាកិច្ចពិធីដែលគេធ្វើក្នុងកាលវេលាសន្មតិណាមួយ»។
ដើម្បីស្រាយនូវចម្ងល់ និងបញ្ជាក់ពីកាលវេលានៃវត្តមានអង្ករខ្មៅនេះលោកសាស្រ្តាចារ្យ និងក្រុមការងារបានអំពាវនាវរកថវិកាដើម្បីយកសំណាកអង្ករនេះទៅពិសោធន៍កាបូន១៤នៅប្រទេសអាល្លឺម៉ង់ ដែលត្រូវចំណាយថវិកាប្រាំពាន់ដុល្លារ។
លោកសរសេរយ៉ាងនេះថា៖ «ដើម្បីបំបាត់ចម្ងល់ និងដើម្បីដឹងពីអាយុកាលពិតរបស់អង្កខ្មៅនេះ យើងត្រូវយកទៅវិភាគតាមវិទ្យុសកម្មសេ១៤ (C14)។ ដើម្បីវិភាគបានយើងខ្ញុំត្រូវការថវិកាចំនួន៥០០០ដុល្លា អាមេរិក ត្រូវធ្វើចំនួន៥សំណាក ដោយត្រូវផ្ញើសំណាកនេះទៅប្រទេសអាល្លឺម៉ង់ដើម្បីពិសោធន៍។ បាទសូមអំពាវនាវដល់បងប្អូនជនរួមជាតិ មេត្តាជួយតាមការគួរ ស្វាគមន៍ចាប់តាំងពី១ដុល្លាឡើងទៅ»៕