ឡុង ជិន វ៉ៃខ្សែក្រវាត់ប្រាក់ ISI PALM សប្តាហ៍នេះអាចប៉ះ ឡៅ ចិត្រា វគ្គខ្សែក្រវាត់មាស
- 2019-06-14 02:04:15
- ចំនួនមតិ 0 | ចំនួនចែករំលែក 0
ឡុង ជិន វ៉ៃខ្សែក្រវាត់ប្រាក់ ISI PALM សប្តាហ៍នេះអាចប៉ះ ឡៅ ចិត្រា វគ្គខ្សែក្រវាត់មាស
ចន្លោះមិនឃើញ
ក្រោយរកឃើញម្ចាស់ខ្សែក្រវាត់ប្រាក់ ISI PALM វគ្គទី១ ពេលនេះ «អធិរាជគុនខ្មែរ ISI PALM» បន្តដំណើរស្វែងរកម្ចាស់ខ្សែក្រវាត់ប្រាក់វគ្គទី២ដែលរឹតតែគួរឲ្យចាប់អារម្មណ៍ខ្លាំងដោយបេក្ខភាពលេចធ្លោ ឡុង ជិន ត្រូវតតាំងជាមួយអ្នកប្រដាល់ថៃ ផាន់លិទ្ធ ខេសាយិម។
ឡុង ជិន ជាជើងខ្លាំងវ័យក្មេងម្នាក់ដែលអង្រួនសង្វៀនគុនខ្មែរខ្លាំងមួយរយៈពេលចុងក្រោយនេះ។ ក្រោយពេលឡើងជើងខ្លាំង រូបគេជួបសុទ្ធតែអ្នកប្រដាល់ឆ្លងដែនមកពីក្រៅប្រទេស។ ការបង្ហាញខ្លួនលើកនេះ រូបគេត្រូវបានអ្នកតាមដានប្រដាល់គុនខ្មែរជឿថា អាចនឹងឈានដល់វគ្គផ្តាច់ព្រ័ត្រដណ្តើមខ្សែក្រវាត់ប្រាក់ «អធិរាជគុនខ្មែរ ISI PALM» នេះ។ ប្រសិនបើរូបគេអាចដណ្តើមបានខ្សែក្រវាត់ប្រាក់នោះ រូបគេនឹងក្លាយជាបេក្ខភាពម្នាក់ដើម្បីប្រកួតដណ្តើមខ្សែក្រវាត់មាសដែលមានជើងខ្លាំងវ័យក្មេង ឡៅ ចិត្រា ជាម្ចាស់ខ្សែក្រវាត់ប្រាក់ជុំទី១។
មិនត្រឹមតែគូវគ្គជម្រុះខ្សែក្រវាត់ប្រាក់ខាងលើគួរឲ្យចាប់អារម្មណ៍ប៉ុណ្ណោះទេ ប៉ុន្តែសង្វៀន«អធិរាជគុនខ្មែរ ISI PALM» វេលាម៉ោង១២ ថ្ងៃអាទិត្យ ទី១៦ ខែមិថុនានៅទូរទស្សន៍ PNN ក៏មានគូអន្តរជាតិសំខាន់មិនអាចរំលឹងបានដែរ។ ជើងខ្លាំងមាឌល្អិត ហ៊ីម សេរី ត្រូវប៉ះអ្នកលេងឆ្លងដែនថៃ សេកសាន ស. ភិតប៊ុនមី។ ជាមួយគ្នានេះពន្លកគុនខ្មែរ វី គឹមសៀង ទទួលកូនខ្លាមកពីថៃ អារ៉ាន់លេក ខណៈអ្នកស្នងគុនខ្មែរ វ័ន ថៃដេ ប៉ះ កូននាគថៃ យ៉កលេកភិត។
អ្នកគាំទ្រ«អធិរាជគុនខ្មែរ ISI PALM» ដឹងហើយថា ឡៅ ចិត្រា កំពុងឈរចាំវគ្គប្រកួតដណ្តើមខ្សែក្រវាត់មាស បន្ទាប់ពីទទួលបានខ្សែក្រវាត់ប្រាក់កាលពីថ្ងៃទី៩ ខែមិថុនា តាមរយៈការផ្តួលកីឡាករថៃ កងស្យាម តាមរយៈរន្ទៈជើង និងកណ្តាប់ដៃនៅទឹកទី២។ ថ្ងៃជាមួយគ្នានោះ វ៉ាន់ វឿន ក៏ទទួលបានជ័យជម្នះលើកីឡាករថៃ យ៉តចក្រគ្រិន៕
គូប្រកួតសប្តាហ៍នេះ
ខាងក្រោមជាសកម្មភាពប្រកួតកាលពីសប្តាហ៍មុន
អត្ថបទពាក់ព័ន្ធ