ក្រុមអភិរក្សរកឃើញពងក្រពើត្រីពីរសំបុកនៅដើមសប្តាហ៍នេះ

2019-06-14 08:53:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអភិរក្សនៃរដ្ឋបាលជលផល អង្គការដៃគូបានរកឃើញសំបុកពងក្រពើត្រីចំនួនពីរនៅតាមដងព្រែកស្រែអំបិល ខេត្តកោះកុងកាលពីដើមសប្ដាហ៍នេះ។

នៅលើទំព័រហ្វេសប៊ុករបស់អង្គការWCS នារសៀលនេះ បានសរសេរថាអង្គការខ្លួន រួមជាមួយក្រុមអភិរក្សនៃរដ្ឋបាលជលផល និងក្រុមការពារសំបុកក្នុងមូលដ្ឋានបានរកឃើញសំបុកក្រពើត្រីចំនួនពីរមានពងសរុប៤៨ពង។

(រូបភាព៖ WCS)

ការរកឃើញនេះគឺនៅត្រពាំងចំនួនពីរ តាមប្រព័ន្ធដងព្រែក ស្រែអំបិល ក្នុងខេត្តកោះកុង។ ប្រភពខាងលើបន្តថា៖ សត្វក្រពើត្រី ឬហៅតាមឈ្មោះវិទ្យាសាស្ត្រថា Crocodylus siamensis ត្រូវបានកត់ត្រានៅក្នុងបញ្ជីក្រហមរបស់អង្គការ IUCNជាប្រភេទសត្វដែលកំពុងរងការគំរាមកំហែងជិតផុតពូជ ដោយសារចំនួនរបស់វានៅទូទាំងពិភពលោកកំពុងធ្លាក់ចុះយ៉ាងខ្លាំង»។

ប្រភពដដែលឲ្យដឹងទៀតថា៖ «ប្រភេទក្រពើត្រីនេះ មានរស់នៅក្នុងប្រទេសកម្ពុជា ឡាវ ថៃ វៀតណាម និងទំនងជាអាចមាននៅក្នុងប្រទេសម៉ាឡេស៊ី មីយ៉ាន់ម៉ារ និងឥណ្ឌូណេស៊ីដែរ។ តាមការប៉ាន់ស្មាន នៅកម្ពុជា មានក្រពើត្រីនេះក្នុងវ័យជំទង់ប្រហែលចន្លោះពី១០០ ទៅ ៣០០ក្បាល ដែលបង្ហាញថាកម្ពុជាគឺជាទីជម្រកដ៏សំខាន់បំផុតសម្រាប់ប្រភេទសត្វក្រពើត្រីនេះ»៕

អត្ថបទ៖ ទូច សុខា