ឆាប់ៗនេះ បញ្ហាកកស្ទះនៅម្តុំក្បាលថ្នល់ នឹងត្រូវកាត់បន្ថយ ក្រោយស្ពានមួយខ្សែសាងសង់រួច
- 2019-06-19 04:03:17
- ចំនួនមតិ 0 | ចំនួនចែករំលែក 0
ឆាប់ៗនេះ បញ្ហាកកស្ទះនៅម្តុំក្បាលថ្នល់ នឹងត្រូវកាត់បន្ថយ ក្រោយស្ពានមួយខ្សែសាងសង់រួច
ចន្លោះមិនឃើញ
ស្ពានមួយខ្សែពីមហាវិថីព្រះមុនីវង្ស បត់ឆ្វេងឆ្ពោះទៅមហាវិថីព្រះនរោត្តម នឹងត្រូវសាងសង់ ក្នុងពេលឆាប់ៗ។ នេះបើតាមប្រសាសន៍របស់លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនបានថ្លែងប្រាប់ Sabay។
លោកបានបន្ថែមថា បន្ទាប់ពីដោះស្រាយផលប៉ះពាល់បណ្ដាញក្រោមដីរួច ការដ្ឋានបានចាប់ផ្តើមខួងគ្រឹះស្ពានកាលពីដើមខែមិថុនានេះ ដោយនឹងសាងសង់ស្ពាន១ខ្សែពីមហាវិថីព្រះមុនីវង្សបត់ឆ្វេងឆ្ពោះទៅមហាវិថីព្រះនរោត្ដម។ ស្ពាននេះនឹងត្រូវចំណាយពេលសាងសង់រយៈពេល៧ខែ អាចឱ្យអ្នកដំណើរឆ្លងកាត់បាន។ ដោយមើលឃើញ បញ្ហាកកស្ទះចរាចរនៅតែកើតមាន នៅតំបន់ស្ពានអាកាសក្បាលថ្នល់នោះ អាជ្ញាធររាជធានីភ្នំពេញ បានសម្រេច ស្ថាបនាស្ពានអាកាសក្បាលថ្នល់ បន្ថែមទៀត ដើម្បីកែលំអ និងដោះស្រាយបញ្ហាចរាចរឲ្យកាន់តែមានភាពរលូនដូចស្ពានអាកាស និងផ្លូវក្រោមដីស្ទឹងមានជ័យនោះ ពិធីនេះបើកការដ្ឋានសាងសង់ស្ពាននេះបានប្រព្រឹត្ត នៅថ្ងៃទី ០៤ធ្នូ ២០១៦ កន្លងមក។
លោក ប៉ា សុជាតិវង្ស ដែលពេលនោះជាអភិបាលរាជធានីភ្នំពេញ បានឱ្យដឹងថា អាជ្ញាធរនឹងចំណាយថវិកា ៤លានដុល្លារ ដើម្បីស្ថាបនាបន្ថែមស្ពានអាកាស និងជួយកែ សម្រួលឲ្យទូលាយ នៅតំបន់ក្បាលថ្នល់ឲ្យកាន់តែមានភាពល្អប្រសើរឡើង។ ប៉ុន្តែគម្រោងនេះហាក់មានភាពយឺតយ៉ាវ បន្ទាប់ពីមហាវិថីសម្តេចតេជោ(ផ្លូវ ៦០ម៉ែត្រ) បានដាក់ឱ្យដំណើរការ ស្ថានភាពចរាចរណ៍នៅតំបន់ក្បាលថ្នល់កាន់តែមានការកកស្ទះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញធ្លាប់បានពន្យល់ប្រាប់ Sabay ថា ភាពយឺតយ៉ាវដោយសារតែខាងសាលារាជធានីកំពុងកែសម្រួលផ្នែកខ្លះនៃគម្រោង និងថាកំពុងដោះស្រាយផលប៉ះពាល់ខ្លះៗជាមួយប្រជាពលរដ្ឋ ទើបបណ្ដាលឱ្យមានភាពយឺតយ៉ាវ។ សាលារាជធានីក៏មាន គម្រោងសង់ស្ពានអាកាសថ្មីមួយទៀតត្រង់ចំណុចប្រសព្វផ្លូវ៦០ម៉ែត្រ ផ្លូវព្រះមុនីវង្ស និងផ្លូវ២៧១ ដែលនៅមិនឆ្ងាយប៉ុន្មានពីស្ពានអាកាសក្បាលថ្នល់។ លោកបន្ថែមថា “ខ្ញុំអាចនិយាយបានថា គម្រោងនេះអាចមានភាពយឺតយ៉ាវ មិនហើយដូចការគ្រោងទុកពីមុនទេ ប៉ុន្តែសាលារាជធានីនឹងនៅតែបន្តការសាងសងដដែលទេ”។
រំលឹកអំឡុងបើកការដ្ឋានសាងសង់ កាលពីឆ្នាំ២០១៦ គម្រោងស្ពានអាកាស ដែលរដ្ឋបាលរាជធានីភ្នំពេញជ្រើសយក នោះមានចំនួន០៣ ខ្សែ គឺ ទី១.ស្ពានស្របពីលើមហាវិថីព្រះនរោត្តមបត់ឆ្វេង ឡើងភ្ពាប់ទៅស្ពានព្រះមុនីវង្សថ្មី ទី២.តភ្ជាប់ពីស្ពានព្រះមុនីវង្សចាស់បត់កោងស្តាំឡើងទៅចាក់អង្រែ ទី៣.ផ្លូវស្របពីលើមហាវិថីព្រះមុនីវង្សបត់ទៅនរោត្តម រួចបត់ស្តាំឡើងស្ពានវិញ ។
បើដូចអ្វីដែលបានលើកឡើង ដោយលោក សាំ ពិសិដ្ឋ មានន័យថា គម្រោងនេះចាប់ផ្ដើមសាងសង់ស្ពានមួយខ្សែពីមហាវិថីព្រះមុនីវង្ស បត់ឆ្វេងឆ្ពោះទៅមហាវិថីព្រះនរោត្តមមុនគេ ។ គម្រោងនេះ ទទួលស្ថាបនាដោយក្រុមហ៊ុនOCIC កោះពេជ្រ៕