មន្ត្រីមួយចំនួនលាលែង បញ្ចប់ និងផ្ទេរភារកិច្ចទាក់ទងហេតុការណ៍រលំអគារនៅក្រុងព្រះសីហនុ
- 2019-06-25 02:44:58
- ចំនួនមតិ 0 | ចំនួនចែករំលែក 0
មន្ត្រីមួយចំនួនលាលែង បញ្ចប់ និងផ្ទេរភារកិច្ចទាក់ទងហេតុការណ៍រលំអគារនៅក្រុងព្រះសីហនុ
ចន្លោះមិនឃើញ
ក្នុងហេតុការណ៍បាក់រលំអគារកម្ពស់ប្រាំពីរជាន់នៅក្រុងព្រះសីហនុកាលពីព្រឹកព្រលឹមថ្ងៃទី២២ ខែមិថុនា កន្លងមកនេះបណ្ដាលឲ្យមានអ្នកសា្លប់ចំនួន២៨នាក់ និងរងរបួស២៦នាក់។ នេះបើតាមសេចក្ដីប្រកាសព័ត៌មានរបស់រដ្ឋបាលខេត្តព្រះសីហនុកាលពីយប់មិញ។
ទាក់ទងនឹងហេតុការណ៍នេះមន្ត្រីមួយចំនួនត្រូវបានដកដំណែង ផ្ទេរភារកិច្ច និងសុំលាងលែង។ អភិបាលខេត្តព្រះសីហនុឯកឧត្តម យន្ត មីន បានសម្ដែងការសោកស្តាយចំពោះហេតុការណ៍នេះ ដោយបានទទួលកំហុសនិងសុំលាលែងពីតំណែងជាអភិបាលខេត្ត និងត្រូវផ្ទេរភារកិច្ចមកបម្រើការនៅទីស្ដីការក្រសួងមហាផ្ទៃ ដើម្បីទទួលភារកិច្ចថ្មី។
សម្រាប់តំណែងអភិបាលខេត្តព្រះសីហនុត្រូវជំនួសដោយឯកឧត្តម គួច ចំរើន ដែលត្រូវផ្ទេរភារកិច្ចពីអភិបាលខេត្តកំពង់ចាម មកជាអភិបាលខេត្តព្រះសីហនុវិញ។ នេះបើតាមព្រះរាជក្រឹត្យចុះថ្ងៃទី២៤ ខែមិថុនា។
ដោយឡែកអភិបាលខេត្តព្រះវិហារ ឯកឧត្តម អ៊ុន ចាន់ដា ត្រូវផ្ទេរមកកាន់តំណែងជាអភិបាលខេត្តកំពង់ចាមវិញ និងតំណែងអភិបាលខេត្តព្រះវិហារត្រូវជំនួសដោយអភិបាលរងខេត្តស្វាយរៀងម្នាក់វិញ។
ជាមួយគ្នានេះដែរឯកឧត្តម ញឹម វណ្ណដា ត្រូវបញ្ចប់តំណែងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជំនួសវិញដោយឯកឧត្តម គន់ គីម។ ទោះយ៉ាងនាឯកឧត្តម ញឹម វណ្ណដា ត្រូវបានតែងតាំង និងផ្ដល់តំណែងជាទីប្រឹក្សារាជរដ្ឋាភិបាលឋានៈស្មើទេសរដ្ឋមន្ត្រី។
គួរបញ្ជាក់ថាអ្នកស្លាប់ក្នុងហេតុការណ៍នេះនឹងទទួលបានថវិកាមិនតិចជាងប្រាំមួយម៉ឺនដុល្លារ និងអ្នករងរបួសនឹងទទួលបានថវិកាជាងមួយម៉ឺនដុល្លារ៕