Apple Watch ស៊េរីក្រោយ អាចនឹងមានបង្កប់កាមេរ៉ាមកជាមួយដែរ

2019-06-26 04:11:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អនាគតនាឡិកាដៃឆ្លាតវៃរបស់ក្រុមហ៊ុន Apple គឺ Apple Watch 5 អាចនឹងមានបង្កប់កាមេរ៉ាមកជាមួយ ព្រមទាំងមានមុខងារថ្មីៗបន្ថែមទៀតដែលមាននៅក្នុង WatchOS 6 ។

យោងតាមប្រភពព័ត៌មានពី 9to5Mac បានឲ្យដឹងថា ក្រុមហ៊ុន Apple បាននឹងកំពុងរិះរកវិធីច្នៃប្រឌិតនាឡិកាប្រចាំត្រកូលឲ្យកាន់តែឆ្លាតជាងមុនទៀត។ បើរាប់ត្រួសៗមានដូចជា ការរចនារូបរាងនៅដដែល តែ Apple ចាប់ដៃជាមួយក្រុមហ៊ុនជប៉ុនជើងចាស់ផ្នែកផលិតអេក្រង់ OLED ដើម្បីឲ្យគុណភាពអេក្រង់លើនាឡិកាដៃកាន់តែប្រសើរ។

ចំណែកឯប៉ាតង់ផលិត Apple Watch 5 នោះក៏ត្រូវបានទម្លាយឲ្យដឹងរួចហើយ។ នាឡិកានោះទំនងជា នឹងមានកាមេរ៉ាទាំងមុខនិងក្រោយ អាចឲ្យអ្នកប្រើប្រាស់ចាប់យកសកម្មភាពជាវីដេអូ និងរូបភាព ឬ(Swich) បំលាស់ប្ដូរបទពិសោធន៍ទៅមើលលើអេក្រង់នាឡិកាតែម្ដង។

ដោយឡែកលក្ខណៈសម្បត្តិលើកាមេរ៉ា Apple Watch 5 នោះមានកម្រិតប៉ុណ្ណា ទំហំប៉ុន្មានមេហ្គាភិចសែល គេនៅមិនទាន់ដឹងច្បាស់នៅឡើយទេ សូមរង់ចាំមើលបន្តទៀត។

សម្រាប់តម្លៃ Apple Watch 5 វិញត្រូវអ្នកវិភាគមួយចំនួនធំបានឲ្យដឹង អាចនឹងមានតម្លៃខ្ពស់គួរសម ប្រភេទសេរ៉ាមិចថ្មីតម្លៃចាប់ផ្ដើមពី ១២៩៩ ដុល្លារ និងមានការប្រែប្រួលតម្លៃទៅតាមប្រភេទផ្សេងៗដូចជា cellular ថ្លៃជាងប្រភេទ GPS ១០០ ដុល្លារទៀតជាដើម៕