កម្ពុជានឹងបង្កើតមានចម្ការដាំដើមឫស្សី និងផ្ដៅធំបង្អស់ រហូតខ្ទង់ម៉ឺនហិចតានាពេលខាងមុខ

2019-06-29 07:59:54
ចំនួនមតិ 0 | ចំនួនចែករំលែក 0

ចន្លោះមិនឃើញ

រាជរដ្ឋាភិបាលនឹងផ្ដល់ដីសម្បទានជាងបួនម៉ឺនហិចតាដល់សហគមន៍សម្រាប់ដាំឫស្សី និងផ្ដៅនៅពេលខាងមុខ ខណៈសេចក្ដីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀង ស្តីពីការបង្កើតអង្គការបណ្តាញអន្តរជាតិសម្រាប់ឫស្សី និងផ្ដៅត្រូវបានព្រឹទ្ធសភាអនុម័តទាំងស្រុង ហើយកាលពីថ្ងៃទី២៥ ខែមិថុនានេះ។

ឯកឧត្ដម ម៉ម ប៊ុននាង អ្នកនាំពាក្យព្រឹទ្ធសភាបានឲ្យដឹងថា រាជរដ្ឋាភិបាល នឹងផ្តល់ឱកាសដល់សហគមន៍ដាំនូវដើមឫស្សី និងផ្ដៅនៅទីតាំងណាមួយ ដែលបានដកហូតពីក្រុមហ៊ុនឯកជន និងដី ដែលត្រូវបានគេកាប់ព្រៃអស់នាពេលកន្លងទៅ ហើយការដាំដើមឫស្សី និងផ្ដៅនេះ នឹងផ្តល់ការងារជាច្រើនដល់ប្រជាពលរដ្ឋនៅតាមសហគមន៍។

ឯកឧត្ដម ម៉ម ប៊ុននាង បានបន្ថែមថា ការដាំដើមឫស្សី និងផ្ដៅ នេះ នឹងយកទៅធ្វើជាផលិតផលផ្សេងៗសម្រាប់យកទៅលក់នៅ ក្នុងទីផ្សារអន្តរជាតិ ហើយវានឹងពង្រីកវិសាលភាពការងារដល់ប្រជាពលរដ្ឋខ្មែរកាន់តែច្រើនបន្ថែមទៀតផងដែរ។

ឯកឧត្ដម ម៉ុង ឫទ្ធី ប្រធានគណ:កម្មការទី០៣ នៃព្រឹទ្ធសភាបានអានសេចក្ដីថ្លែងហេតុ និងបានឱ្យដឹងថាតាមរយៈកិច្ចព្រមព្រាងនេះកម្ពុជានឹងទទួលបាន÷

ទី១-កិច្ចសហប្រតិបត្តិការអន្តរជាតិមួយដ៏ល្អដើម្បីពង្រឹងសមត្ថភាពក្នុងការដាំដុះ ថែរក្សា ការពារ ប្រមូលផល និងធ្វើការកែច្នៃ ក្នុងទិសដៅអភិវឌ្ឍធនធានឫស្សី និងផ្ដៅប្រកបដោយនិរន្តរភាព។
ទី២- ថែរក្សា និងអភិរក្សវប្បធម៌ដ៏ប្រពៃ នៃការប្រើប្រាស់ធនធានឫស្សី និងផ្តៅដ៏មានតម្លៃផ្នែកសេដ្ឋកិច្ចសម្រាប់ប្រជាពលរដ្ឋ ដែលពឹងអាស្រ័យលើផល និងអនុផលឫស្សី និងផ្ដៅទាំងក្នុងពេលបច្ចុប្បន្ន ក៏ដូចជាពេលអនាគត។

ឯកឧត្ដម វេង សាខុន រដ្ឋមន្ត្រីក្រសួងកសិកម្មបានថ្លែងអំណរគុណដល់ រាជរដ្ឋាភិបាល និង ថ្នាក់ដឹកនាំព្រឹទ្ធសភា ដែលបានពិនិត្យ និងអនុម័តយល់ព្រមលើសេចក្ដីព្រាងច្បាប់ស្ដីពីការបង្កើតអង្គការបណ្ដាញអន្តរជាតិសម្រាប់ឫស្សី និងផ្ដៅ ពិសេសដើម្បីឱ្យព្រះរាជាណាចក្រកម្ពុជាបានចូលជាសមាជិកពេញសិទ្ធិនៃអង្គការបណ្ដាញអន្តរជាតិសម្រាប់ឫស្សី និងផ្ដៅនាពេលនេះ។

នៅក្នុងសេចក្ដីព្រាងច្បាប់នេះ មាន២២មាត្រា ដែលគ្របដណ្ដប់ ដោយខ្លឹមសារពិស្ដារ រួមមានដូចជា ៖

ទី១. ប្រវត្តិ នៃអង្គការបណ្ដាញអន្តរជាតិឫស្សី និងផ្ដៅ
ទី២. គោលនយោបាយ និងផែនការយុទ្ធសាស្ត្រ
ទី៣. លក្ខន្តិក នៃការចូលជាសមាជិក
ទី៤. ការត្រៀមលក្ខណៈគ្រប់គ្រាន់មុនចូលជាសមាជិក
ទី៥. អត្ថប្រយោជន៍នៃការចូលជាសមាជិក។

បើតាមសេចក្ដីប្រកាសព័ត៌មានរបស់ក្រុមផលិតករ និងសហគមន៍អនុផលព្រៃឈើ ដែលបានចេញផ្សាយកាលពីពេលថ្មីៗនេះ បានឱ្យដឹងថា បច្ចុប្បន្នមានពលរដ្ឋ ប្រមាណ៦៨ភាគរយ នៃគ្រួសារជនបទនៅទូទាំងប្រទេស គឺបានពឹងអាស្រ័យលើធនធានព្រៃឈើ ក្នុងនោះមានដូចជាការប្រមូលផលពីព្រៃឫស្សី ផ្ដៅ ទឹកឃ្មុំ ជ័រទឹក និងដើមទ្រាំងជាដើម៕

អត្ថបទ៖ សុផល