អង្គការធំៗចុះអនុស្សារណៈយោគយល់ ធ្វើឲ្យប្រសើរឡើងនូវសេវាសាធារណៈ
- 2019-07-02 07:50:42
- ចំនួនមតិ 0 | ចំនួនចែករំលែក 0
អង្គការធំៗចុះអនុស្សារណៈយោគយល់ ធ្វើឲ្យប្រសើរឡើងនូវសេវាសាធារណៈ
ចន្លោះមិនឃើញ
អង្គការទស្សនៈពិភពលោក និងអង្គការវឌ្ឍនភាព រួមជាមួយអង្គការចំនួន ១១ ផ្សេងទៀតរៀបចំពិធីចុះអនុស្សារណៈយោគយល់ក្នុងការអនុវត្តគម្រោងគណនេយ្យភាពសង្គមដើម្បីធ្វើឲ្យប្រសើរឡើងនូវសេវាសាធារណៈ ក្រោមការគាំទ្រថវិកាដោយ សហភាពអ៊ឺរុប និងអង្គការទស្សនៈពិភពលោកប្រចាំប្រទេសអាល្លឺម៉ង់ ដែលរំពឹងថានឹងផ្តល់ អត្ថប្រយោជន៍ដល់ប្រជាពលរដ្ឋ ជាង ២,៨លាននាក់ តាមរយៈការធ្វើឲ្យប្រសើរឡើងនូវសេវាសាធារណៈ នៅក្នុងឃុំចំនួន ២៩២ឃុំ សាលាបឋមសិក្សាចំនួន ៥៧១សាលា និងមណ្ឌលសុខភាពចំនួន ២១៦កន្លែង នៅក្នុងខេត្តចំនួន៥ ក្នុងប្រទេសកម្ពុជា។
ពិធីចុះអនុស្សារណៈយោគយល់នេះ ប្រារព្ធឡើងក្រោមអធិបតីយភាព ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជា ប្រធានគណៈកម្មាធិការគ្រប់គ្រង ការអនុវត្តផែនការយុទ្ឋសាស្រ្តគណនេយ្យភាពសង្គម និងលោកស្រី Francesca Ciccomartino តំណាសហភាពអ៊ឺរ៉ុបប្រចាំនៅកម្ពុជា រួមជាមួយការចូលរួមរបស់ហត្ថលេខីតំណាងអង្គការទាំង ១១អង្គការ មន្ត្រីរដ្ឋាភិបាល អង្គការដៃគូអភិវឌ្ឍន៍ ម្ចាស់ជំនួយ និងអ្នកសម្របសម្រួលគណនេយ្យភាពសហគមន៍ស័្មគ្រចិត្ត (CAFs)។
កម្មវត្ថុនៃអនុស្សារណៈយោគយល់នេះ គឺដើម្បីជួយដល់អង្គការដៃគូទាំងអស់ឲ្យបំពេញការងាររួមគ្នាក្នុងគោលបំណង ធ្វើឲ្យមាន ភាពប្រសើរឡើងនូវសេវាសាធារណៈ ដែលត្រូវផ្តល់ដោយរាជរដ្ឋាភិបាល(អ្នកផ្តល់សេវា) ជូនដល់ ប្រជាពលរដ្ឋកម្ពុជាគ្រប់រូប (អ្នកទទួលសេវា) នៅតាមតំបន់គោលដៅរបស់អង្គការទាំងអស់នៅទូទាំងប្រទេស។
លោក ឡេង វីរៈ នាយកប្រតិបត្តិនៃអង្គការទស្សនៈកម្ពុជាបានមានប្រសាសន៍ថា៖ «អង្គការទស្សនៈពិភពលោក បានចូលរួម គាំទ្រដល់ ការអនុវត្តផែនការយុទ្ឋសាស្រ្តគណនេយ្យភាពសង្គម នៃរាជរដ្ឋាភិបាលកម្ពុជា ចាប់តាំងពី ឆ្នាំ២០១៥ មក។ ការគាំទ្រនេះបានចូលរួមចំណែកក្នុងការជួយឲ្យគុណភាពនៃការផ្គត់ផ្គង់សេវាកម្មសាធារណៈ មានភាពប្រសើឡើង ពោលគឺ សេវានៅតាមមណ្ឌលសុខភាព សាលាបឋមសិក្សា និងសេវារដ្ឋបាលឃុំ ដែលវាបានផ្តល់អត្ថប្រយោជន៍ទៅដល់ ប្រជាពលរដ្ឋកម្ពុជាជិត ២លាននាក់ នៅក្នុងឆ្នាំ២០១៨។»
ឯកឧត្តម ងី ច័ន្ទ្រផល ក៏បានមានប្រសាសន៍ផងដែរថា៖ «នេះគឺជាភាពជោគជ័យដ៏ធំមួយទៀតសម្រាប់ការអនុវត្តផែនការយុទ្ឋសាស្រ្តគណនេយ្យភាពសង្គមនៅកម្ពុជា។ អង្គការទស្សនៈពិភពលោក គឺជាដៃគូដ៏សំខាន់ក្នុងការជួយគាំទ្រដល់ ការអនុវត្តផែនការយុទ្ឋសាស្រ្តគណនេយ្យភាពសង្គម។ តាមរយៈការចូលរួមពីអង្គការក្នុងស្រុក អង្គការអន្តរជាតិ និងដៃគូអភិវឌ្ឍន៍ទាំងអស់ យើងនឹងអាចសម្រេចបាននូវការធ្វើឲ្យ ប្រសើរឡើង នូវគុណភាពនៃសេវាសាធារណៈថ្នាក់មូលដ្ឋាន ដើម្បីជាប្រយោជន៍ដល់កុមារ និងគ្រួសារកម្ពុជា រាប់លាននាក់ នៅទូទាំងប្រទេសដែលស្របទៅនឹង យុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា។»
លោកស្រី Francesca Ciccomartino តំណាងសហភាពអ៊ឺរ៉ុបប្រចាំនៅកម្ពុជា មានប្រសាសន៍ថា៖ «ការអនុវត្តផែនការ យុទ្ឋសាស្រ្តគណនេយ្យភាពសង្គម កំពុងត្រួសត្រាយផ្លូវឆ្ពោះទៅកាន់ការផ្តល់សេវាសាធារណៈឆាប់រហ័ស មានគណនេយ្យភាព និងប្រកដោយតម្លាភាព។» លោកស្រីបានបន្ថែមទៀតថា លោកស្រីសប្បាយចិត្តណាស់ដែលការអនុវត្តផែនការយុទ្ឋសាស្រ្តគណនេយ្យភាពសង្គម មានការយកចិត្តទុកដាក់ខ្លាំងចំពោះជនងាយរងគ្រោះបំផុត និងធានាថាពួកគាត់ត្រូវបានរាប់បញ្ចូលក្នុងសកម្មភាពនានានៃការអនុវត្តផែនការយុទ្ឋសាស្រ្តគណនេយ្យភាពសង្គមនេះ។
លោក ឡេង វីរៈ ក៏បានបន្ថែមផងដែរថា៖ «តាមរយៈការពង្រីកការងាររបស់យើងជាមួយនឹងអង្គការដៃគូថ្មីៗក្រោមការគាំទ្រ ថវិកាពីសហភាពអ៊ឺរ៉ុប និងតាមរយៈការធ្វើនិរន្តភាពការងាររបស់យើង ក្រោមការគាំទ្រថវិការបស់ធានាគារពិភពលោកកន្លងមក អង្គការទស្សនៈពិភពលោកកំពុងធ្វើការពង្រីកគម្រោងការអនុវត្តសកម្មភាពគណនេយ្យភាពសង្គម ដើម្បីជួយបង្កើនគុណភាពនៃសេវាសាធារណៈ សរុបនៅក្នុង ៥១០ឃុំ សាលាបឋមសិក្សាចំនួន ១ ០០៤សាលា និងមណ្ឌលសុខភាពចំនួន៣៦៤មណ្ឌល ដែលនឹងផ្តល់ជាអត្ថប្រយោជន៍ ទៅដល់ប្រជាពលរដ្ឋច្រើនជាង ៤,៦លាននាក់ ត្រឹមឆ្នាំ២០២០។»
លោក អាន សុទ្ធី អាយុ ៤១ឆ្នាំ ជាគ្រូបង្រៀន នៅខេត្តកំពង់ធំ បានមានប្រសាសន៍ថា៖ «គម្រោងការអនុវត្តសកម្មភាពគណនេយ្យភាពសង្គម បានធ្វើឲ្យ ទំនាក់ទំនងរវាងប្រជាពលរដ្ឋ និងលោកគ្រូអ្នកគ្រូ មានភាពជិតស្និតនឹងគ្នាជាងមុន។ជាលទ្ធផលវាបានផ្តល់ភាពងាយស្រួល ដល់ពួកយើងក្នុងការផ្លាស់ប្តូរមតិ ដើម្បីជួយឲ្យគុណភាពសេវា នៅសាលារបស់យើងមានភាពប្រសើរជាងមុន។ ម៉្យាងទៀត ផែនការដែលបានព្រមព្រៀងក្នុងកិច្ចប្រជុំគណនេយ្យភាពសង្គម ក៏ត្រូវបានដាក់បញ្ចូលក្នុងផែនការវិនិយោគឃុំទៀតផង។»
រាប់មកដល់ពេលបច្ចុប្បន្ននេះ គម្រោងការអនុវត្តសកម្មភាពគណនេយ្យភាពសង្គមរបស់អង្គការទស្សនៈពិភពលោក បានចូលរួមបណ្តុះបណ្តាលសមត្ថភាព អ្នកសម្របសម្រួលគណនេយ្យភាពសហគមន៍ស័្មគ្រចិត្ត (CAF) ចំនួន ២ ៦៦០នាក់ ដែលពួកគាត់បាននិងកំពុងដើរតួយ៉ាងសំខាន់ក្នុងការជួយសម្របសម្រួល សកម្មភាពគណនេយ្យភាពសង្គមនៅក្នុងសហគមន៍។ ពិសេសជាងនេះទៅទៀត ពួកគាត់ បានក្លាយជាធនធានមនុស្សយ៉ាងសំខាន់សម្រាប់សហគមន៍របស់ពួកគាត់។ ជាក់ស្តែង អ្នកសម្របសម្រួលគណនេយ្យភាពសហគមន៍ស័្មគ្រចិត្ត ច្រើនជាង ២០រូប ត្រូវបានជាប់ឆ្នោតជាសមាជិកក្រុមព្រឹក្សាឃុំ។ ហើយយ៉ាងហោចណាស់អ្នកសម្របសម្រួលគណនេយ្យភាពសហគមន៍ ចំនួន៣រូប បានជាប់ឆ្នោតជាសមាជិកក្រុមព្រឹក្សាស្រុក។
កំណត់សម្គាល់
ការអនុវត្តផែនការយុទ្ឋសាស្រ្តគណនេយ្យភាពសង្គម (ISAF) មានដើមកំណើតចេញមកពី កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (SNDD) នៅក្នុងប្រទេសកម្ពុជា។ ISAF មានគោលដៅធ្វើឲ្យមានភាពប្រសើរឡើងនូវការផ្តល់សេវាសាធារណៈ តាមរយៈការលើកកម្ពស់គណនេយ្យភាពសង្គម ដែលស្ថិតនៅក្រោមការដឹកនាំរបស់រាជរដ្ឋាភិបាលកម្ពុជា។ ម្ចាស់ជំនួយ អង្គការអន្តរជាតិ និងអង្គការសង្គមស៊ីវិល ក៏បានចូលរួមចំណែកជួយគាំទ្រដល់ ការអនុវត្តផែនការយុទ្ឋសាស្រ្តគណនេយ្យភាពសង្គម នេះចាប់តាំងពីឆ្នាំ ២០១៥មក។
អង្គការទស្សនៈពិភពលោក បានចាប់ផ្តើមការអនុវត្តកម្មវិធីគណនេយ្យភាពសង្គមនៅក្នុងប្រទេសកម្ពុជាក្នុង ឆ្នាំ២០១២ ក្នុង គោលបំណងរួមចំណែកលើកកម្ពស់អភិបាលកិច្ច និងទ្រទ្រង់វឌ្ឍនភាពល្អជាមួយនឹងរាជរដ្ឋាភិបាលកម្ពុជា ក៏ដូចជាដៃគូអភិវឌ្ឍន៍នៅក្នុងប្រទេស។ ចាប់តាំងពីពេលនោះមក កម្មវិធីគណនេយ្យភាពសង្គមរបស់អង្គការទស្សនៈពិភពលោកត្រូវបាន ពង្រីកទៅគ្រប់តំបន់កម្មវិធីរបស់អង្គការទស្សនៈពិភពលោក ហើយវាក៏ត្រូវបានដាក់បញ្ចូលទៅក្នុងយុទ្ធសាស្ត្រ ថ្នាក់ជាតិរបស់អង្គការទស្សនៈពិភពលោកដែលផ្តោតចម្បងទៅលើ សុខភាពនិងអាហារូបត្ថម្ភ ការអប់រំនិងបំនិនជីវិត ការការពារកុមារ និងយុវជន។
សម្រាប់ព័ត៌មានបន្ថែមសូមទាក់ទង៖
លោក វ៉ាន់ ពន្លក មន្រ្តីទំនាក់ទំនងសាធារណៈរបស់អង្គការទស្សនៈពិភពលោក
លេខទូរស័ព្ទ៖ +៨៥៥ ៨៩ ៥៥៥ ៧០២ អ៊ីមែល៖ ponlork_van@wvi.org