ស្ត្រីឥណ្ឌូណេស៊ី ត្រូវគេធ្វើតេស្តព្រហ្មចារី មុនក្លាយជាប៉ូលិស
- 2014-11-18 17:01:06
- ចំនួនមតិ 0 | ចំនួនចែករំលែក 0
ស្ត្រីឥណ្ឌូណេស៊ី ត្រូវគេធ្វើតេស្តព្រហ្មចារី មុនក្លាយជាប៉ូលិស
ចន្លោះមិនឃើញ
ដោយចង់បានប៉ូលិសស្រីច្រើនបន្ថែម កាលពីខែមេសាកន្លងទៅនេះ ឥណ្ឌូណេស៊ីបានយុទ្ធនាការជ្រើសរើស ហើយស្ត្រីដែលបានដាក់ពាក្យចូល ត្រូវឆ្លងកាត់លក្ខខណ្ឌជាច្រើន រួមទាំងការធ្វើតេស្តព្រហ្មចារីផងដែរ។ បច្ចុប្បន្នមានស្ត្រី៧០០០នាក់កំពុងហ្វឹកហាត់។
តែយ៉ាងណា ចូលធ្វើប៉ូលិសស្រីនៅឥណ្ឌូណេស៊ី មិនមែនជារឿងងាយស្រួលទេ ព្រោះស្ត្រីត្រូវមានអាយុចាប់ពី ១៧ឆ្នាំ ដល់ ២២ឆ្នាំ មិនទាន់រៀបការ និងបានបញ្ចប់ថ្នាក់វិទ្យាល័យ។
ចំណែកលក្ខខណ្ឌផ្សេងទៀត ប្រធានប៉ូលិសលោកស្រី Sri Handayani បានពន្យល់ទៅកាន់ទស្សនាវដ្ដី Tempo កាលពីឆ្នាំមុនថា ស្ត្រីមិនត្រូវមានបញ្ហាភ្នែក (ភ្នែកម្ញូប) និងមានកម្ពស់យ៉ាងហោចណាស់ ១,៦៥ម៉ែត្រជាដើម តែអ្វីដែលលោកស្រីមិនបានបញ្ជាក់នោះ គឺការធ្វើតេស្តព្រហ្មចារី។
លក្ខខណ្ឌ "គួរឱ្យរើសអើង និងអាប់ឱន" ដែលត្រូវអង្គការឃ្លាំមើលសិទ្ធិមនុស្ស Human Rights Watch ចេញផ្សាយកាលពីថ្ងៃចន្ទនេះ គឺបានបញ្ជាក់យ៉ាងច្បាស់ លើគេហទំព័រការងារប៉ូលិសជាតិឥណ្ឌូណេស៊ីថា៖ " បន្ថែមលើការធ្វើតេស្តសុខភាព ស្ត្រីទាំងអស់ដែលចង់ធ្វើជាប៉ូលិស គួរតែទុកភាពបរិសុទ្ធ"។
ធ្វើបទសម្ភាសន៍ដោយ អង្គការសិទ្ធិមនុស្ស ស្ត្រីម្នាក់ដែលបានដាក់ពាក្យកាលពីឆ្នាំ២០១៣ម្នាក់និយាយថា នាងភ្ញាក់ផ្អើលណាស់ ពេលគេប្រាប់ថា ការធ្វើតេស្តសុខភាពមានរួមបញ្ចូលទាំងភាពបរិសុទ្ធនោះ។
“ខ្ញុំមានអារម្មណ៍ខ្មាសអៀន ភ័យ តែមិនអាចបដិសេធ។ បើបដិសេធ ខ្ញុំមិនអាចធ្វើប៉ូលិសបានទេ”។ នាងបញ្ជាក់បន្ថែម។
ស្ត្រីម្នាក់ទៀតលើកឡើងថា លក្ខខណ្ឌនេះដូចជាខុសឧត្ដមគតិ។ នាងត្រូវស្រាតននលគកមុខបេក្ខនារី២០នាក់ ហើយការធ្វើតេស្តព្រហ្មចារី ធ្វើឡើងនៅបន្ទប់ផ្សេងដែលគ្មានទ្វារ។
នាងនិយាយថា៖” ពេលចូលបន្ទប់ធ្វើតេស្ត ធ្វើឱ្យខ្ញុំពិបាកចិត្តណាស់។ ខ្ញុំខ្លាចថា ពេលធ្វើតេស្ដហើយ ខ្ញុំបាត់បង់ភាពក្រមុំរហូត។ ពួកគេប្រើម្រាមដៃពីរ...ពិតជាធ្វើឱ្យខ្ញុំឈឺណាស់។ ចំណែកមិត្តខ្ញុំម្នាក់នាងខ្សោយ ពីព្រោះវាពិតជាឈឺណាស់"។
នៅទីស្នាក់ការប៉ូលិសក្នុងទីក្រុងហ្សាកាតា ប្រធានមន្ត្រីសុខភាព លោក Rusdianto ថ្លែងថា វាមិនមែនតែធ្វើតេស្តលើរឿងនឹងតែមួយមុខទេ គឺគេធ្វើតេស្តអង្គជាត និងទឹកនោមទៀត ដើម្បីរកមើលជំងឺ និងផលប៉ះពាល់ផ្សេងៗ។
ពេលសួរថា ហេតុអ្វីចាំចាច់ធ្វើតេស្តលើចំណុចនេះ? លោកប្រាប់ទាំងស្រពិចស្រពិលថា ៖ "គ្រប់ការធ្វើតេស្ត ដែលគេធ្វើ គឺដើម្បីទទួលបានបេក្ខជនល្អៗ"។
ប៉ូលិសចូលនិវត្តម្នាក់ប្រាប់អង្គការសិទ្ធិមនុស្សថា ថ្នាក់របស់នាង បានទទួលការធ្វើតេស្តភាពបរិសុទ្ធស្ត្រីក្នុងឆ្នាំ១៩៦៥។ ចំណែកអ្នកស្រាវជ្រាវជនជាតិឥណ្ឌូណេស៊ីរបស់អង្គការសិទ្ធិមនុស្ស ប្រាប់ថា៖" វាជាការអនុវត្តបែបចាស់បុរាណលើជំនឿថា ស្ត្រីបរិសុទ្ធមានសុខភាពល្អ និងខ្លាំងជាងស្ត្រីបាត់បង់ព្រហ្មចារី"។ យ៉ាងណា លោកសុំអំពាវនាវឱ្យរដ្ឋាភិបាលឥណ្ឌូណេស៊ីលុបចោលការអនុវត្តដ៏អាម៉ាស់នេះចេញ។
ឧត្ដមស្នងការប៉ូលិសជាតិ លោកស្រី Sri Rumiati ប្រាប់អង្គការសិទ្ធិមនុស្សថា លោកស្រីបានព្យាយាមហាមមិនឱ្យធ្វើបែបនេះច្រើនឆ្នាំដែរ។ ហើយក្នុងឆ្នាំ២០១០ លោកស្រីបានលើកពីបញ្ហានេះ តែត្រូវមន្ត្រីទទួលបន្ទុកផ្នែកធនធានមនុស្សបដិសេធ៕
ថៃជាប់ជាប្រទេសគ្រោះថ្នាក់បំផុត សម្រាប់អ្នកទេសចរ
យន្តហោះធ្លាក់បុកជញ្ជាំងអគារ របួសធ្ងន់ស្រាល១០នាក់
ប្រែសម្រួល៖ អ៊ុំ សុភក្តិ ប្រភព៖ Globalpost