យុវវ័យត្រៀមៗ! រឿង"កំហឹងខ្មោចCute" សាច់រឿងបាញ់សំដៅយុវវ័យ ត្រៀមចេញហើយ

2019-07-16 03:09:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីព្យាយាមសម្រិតសម្រាំងជាច្រើនខែ ទីបំផុតរឿង "កំហឹងខ្មោចcute" បានរួចរាល់ និងត្រៀមដាក់ចេញ បម្រើខ្សែចក្ខុរបស់បងប្អូនប្រិយមិត្ត ពិសេសយុវវ័យហើយ។ នេះបើតាមការឲ្យដឹងពីថ្នាក់ដឹកនាំការផលិតនៃខ្សែភាពយន្តខាងលើ។

លោក តាន់ វុទ្ធី ក្នុងនាមជាជំនួយការដឹកនាំសម្ដែង បានឲ្យដឹងថា បើមិនមានអ្វីផ្លាស់ប្ដូរទេ ភាពយន្តខាងលើ គ្រោងនឹងដាក់បញ្ចាំងនាថ្ងៃទី ២៥ ខែកក្កដា ឆ្នាំ ២០១៩ នេះតទៅ នៅគ្រប់រោងកុនទំនើបទាំងអស់ទូទាំងប្រទេស។ ជំនួយការអ្នកដឹកនាំសម្ដែងដដែល បានអះអាងថា ទស្សនិកជននឹងទទួលបាននូវរសជាតិប្លែក ដោយសាច់រឿងបានបញ្ចូលនូវឈុតឆាកគ្រប់រសជាតិ ស្នេហាបែបស្ទាវ កំប្លែងបែបកាយវិការ កម្សត់ព្រាត់ប្រាស់ រន្ធត់ ភ័យខ្លាច ដែលធ្វើអោយទស្សនិកជន ដែលអង្គុយទស្សនាមិនចង់ងើបចេញពីកន្លែងអង្គុយឡើយ។

តាមរយៈបទពិសោធន៍ជាច្រើនលើវិថីសិល្បៈរបស់លោក តាន់ វុទ្ធី ដែលមានស្នាដៃក្នុងរឿងជាច្រើនដូចជារឿង"ខ្មោចអាសង្ហា" រឿង"កម្លាំង និងវាសនា" រឿង"បញ្ញើក្អែក" រឿង "ពាក្យសម្បថ" និងរឿង"បេះដូងអ្នកប្រដាល់" ជាដើម បានសង្កត់ធ្ងន់ថា សាច់រឿងគឺផ្ដោតសំខាន់លើយុវវ័យ ដូច្នេះហើយ ទើបក្រុមការងារបានជ្រើសរើស តួអង្គសុទ្ធតែជាតារាក្មេងៗ ស្អាតៗមកសំដែង។

តារាជើងថ្មី ប៉ុន្តែស្អាតៗទាំងនោះមាន ដូចជា គីញ វិច្ឆិកា ឌីន សិដ្ធ អុន វិសុត្យ រុន រីយ៉ា រាជ ឋានៈ សុវណ្ណឆៃ យូរី វ៉ាង អង តាកុករុក ឌីជេ ពាង នាយ វ៉េវ ជាដើមដើម្បីបំពេញសេចក្ដីត្រូវការរបស់ទស្សនិកជន"។ យ៉ាងណា តាមជំនួយការអ្នកដឹកនាំខាងលើ នេះក៏ជាការប្រថុយប្រថានមួយដែរ ដែលសាច់រឿងប្រើប្រាស់តួអង្គថ្មីៗច្រើន ខណៈសមត្ថភាពរបស់ពួកគេ ក៏នៅមានកម្រិត។

ប៉ុន្តែអ្វីដែលលោកមានសុទិដ្ឋិនិយមនោះ គឺសាច់រឿង ដែលជាឆ្អឹងនៃរឿងមូល គឺមានភាពល្អគ្រប់គ្រាន់សម្រាប់បង្កើតការចាប់អារម្មណ៍ពីទស្សនិកជន។ "យើងប្រាកដជាត្រូវមានការអត់ធ្មត់ខ្ពស់ ក្នុងការបង្ហាត់បង្ហាញ ពន្យល់អោយពួកគាត់សំដែងបានល្អ និងសមទំនងទៅតាមសាច់រឿង ម្យ៉ាងក៏ចង់ផ្ដល់ឱកាសមួយសម្រាប់ប្អូនៗដែលស្រលាញ់វិស័យសិល្បៈ និងចង់បង្ហាញសមត្ថភាពអោយទស្សនិកជនបានស្គាល់ផងដែរ"។ តាន់ វុទ្ធី បន្ថែម៕