MacBook Air ស៊េរីថ្មី មាន SSD ល្បឿនយឺតជាងស៊េរីចាស់
- 2019-07-16 06:38:56
- ចំនួនមតិ 0 | ចំនួនចែករំលែក 0
MacBook Air ស៊េរីថ្មី មាន SSD ល្បឿនយឺតជាងស៊េរីចាស់
ចន្លោះមិនឃើញ
MacBook Air ទទួលបានការអាប់ដេតថ្មីកាលពីសប្ដាហ៍មុនជាស៊េរីឆ្នាំ ២០១៩ ប៉ុន្តែវាបែរជាមានអង្គផ្ទុក SSD ល្បឿនយឺតជាង MacBook Air ស៊េរីឆ្នាំ ២០១៨ ទៅវិញ។ នេះបើតាមការធ្វើតេស្តដោយវិបសាយបារាំង Consomac។
ដោយប្រើប្រាស់កម្មវិធី Blackmagic Disk Speed វិបសាយខាងលើរកឃើញថាល្បឿន Read របស់ SSD នៃម៉ូដែលថ្មី ទាបជាងម៉ូដែលចាស់។ គេបានធ្វើតេស្តលើ MacBook Air ២០១៩ ទំហំ ២៥៦ GB ដែលមានល្បឿន Read ១,៣ GB/s និងល្បឿន Write ១ GB/s។ ចំណែកស៊េរី ២០១៨ ដែលមានទំហំដូចគ្នា មានល្បឿន Read ២ GB/s និងល្បឿន Write ៩២០ MB/s។ ល្បឿន Write ស្មើគ្នា ប៉ុន្តែល្បឿន Read ខុសគ្នា ៣៥% ឯណោះ។
Consomac ក៏បានធ្វើតេស្តលើ MacBook Air ២០១៩ ទំហំ ១២៨ GB ផងដែរ ដែលមានល្បឿន Read ១,៣ GB/s និងល្បឿន Write ៥០០ MB/s។ លទ្ធផលនេះគឺស្រដៀងនឹងលទ្ធផលរបស់ MacBook Air ស៊េរីឆ្នាំ ២០១៨ ដែលមានទំហំ ១២៨ GB ដែរ។
MacBook Air ថ្មីមានអាប់ដេតបន្ថែមអេក្រង់ True Tone និងតម្លៃទាបជាងមុន មានចាប់ពី ១ ០៩៩ ដុល្លារ ជំនួសឲ្យតម្លៃចាស់ ១ ១៩៩ ដុល្លារ។ វាអាចទៅរួចថា Apple ប្រើ SSD ល្បឿនទាបជាងមុន ដើម្បីបន្ថយតម្លៃ MacBook Air ឲ្យធូរជាងមុន។ ប៉ុន្តែអ្នកប្រើប្រាស់អាចមិនកត់សម្គាល់ដឹងពីភាពខុសគ្នាខ្លាំងប៉ុន្មានឡើយ ពេលប្រើជាប្រចាំថ្ងៃ៕
ចុចអាន៖