និយាយគ្នាត្រង់ៗ Pep រំឭក Sane បើមិនសប្បាយចិត្តអាចចេញពី Man City បាន

2019-07-18 08:01:08
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Pep Guardiola បានប្រាប់ជាប្រយោលទៅកាន់កីឡាករ Leroy Sane ថា គេអាចចេញបាន ប្រសិនបើមិនសប្បាយចិត្តនៅ Manchester City។

Bayern Munich កំពុងតែចង់បាន Sane ទៅរួមក្រុម ដោយតម្លៃខ្លួនរបស់កីឡាករសញ្ជាតិអាល្លឺម៉ង់ពេលនេះច្រើនពី៩០លានផោន។ Sane បានបដិសេធមិនពង្រីកកុងត្រាថ្មីនៅ Etihad ត្បិតមានការពិភាក្សាជាច្រើនខែក្ដី។ កិច្ចសន្យារបស់ខ្សែបម្រើប្រយុទ្ធរូបនេះនៅសល់២ឆ្នាំទៀតជាមួយ City។

Guardiola នៅតែពេញចិត្តចំពោះទម្រង់លេងរបស់អតីតកីឡាករ Schalke វ័យ២២ឆ្នាំ។ សាកសួរពីអនាគតរបស់ Sane អាចបន្តនៅ City ទៀតទេ លោក Guardiola ឆ្លើយថា៖ “អាច”។ ប៉ុន្តែលោកមិនចង់ឲ្យមានកីឡាករមិនសប្បាយចិត្តក្នុងជួរកីឡាកររបស់លោកឡើយ ដូច្នេះ Sane ត្រូវតែសម្រេចចិត្តខ្លួនឯង។

“ក្លឹបបានដាក់សំណើម្ដងហើយកាលពីឆ្នាំមុន ហើយខ្ញុំក៏បាននិយាយពីវាជាច្រើនដងដែរថា ពួកយើងចង់បានកីឡាករដែលសប្បាយចិត្តនៅទីនេះ។ គេ (Sane) មានគុណភាពពិសេសមួយដែលពិបាករកនៅជុំវិញពិភពលោក។ បំណងប្រាថ្នាគឺចង់ឲ្យគេនៅជាមួយពួកយើងជារៀងរហូត។ ប៉ុន្តែជាមួយគ្នានេះ ខ្ញុំចង់ឲ្យកីឡាករនៅទីនេះសប្បាយចិត្ត ប៉ុន្តែប្រសិនពួកគេមិនចង់ទេ អាចចេញបាន”។ សម្ដីរបស់លោក Pep៕

ប្រភព៖ The Sun ប្រែសម្រួល៖ ហេង សុធារិទ្ធិ