ប្រកាសបើកថតរឿងខ្នាតធំ និយាយពីប្រវត្តិសម្ដេចពិជ័យសេនា រឿង "ជនដែលត្រូវគេបាញ់"

2019-07-19 03:58:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតធំមួយដែលជាប្រវត្តិពិតរបស់សម្ដេចពិជ័យសេនា ទៀ បាញ់ មានចំណងជើងថា "ជនដែលត្រូវបាញ់" បានប្រកាសបើកដំណើរការថតថ្មីៗនេះ ជាមួយកញ្ចប់វិនិយោគដែលគេប៉ាន់ប្រមាណថា ជាទំហំយ៉ាងសម្បើមមួយ។

សាច់រឿង "ជនដែលត្រូវបាញ់" និយាយពីហេតុការណ៍ដែលកើតឡើងកាលពី៥៤ឆ្នាំមុន ពោលគឺក្នុងអំឡុងឆ្នាំ ១៩៦៥ ស្ថិតនៅឃុំទួលគគីរនៃខេត្តកោះកុង។ នៅពេលនោះ យុវជន ទៀ សង្វាន ដែលជាអ្នកមានកំណើតកើតជានៅទីនោះ ត្រូវបានរដ្ឋអំណាចចាប់ខ្លួនយកទៅបាញ់នៅភ្នំកោះអណ្ដែត។ ក្រោយហេតុការណ៍បាញ់មិនស្លាប់នោះ សង្វាន បានខំព្យាយាមរត់ទៅមុខ គ្មានឱកាសសូម្បីតែងាកក្រោយមើលថា តើមានគេដេញតាមមកទៀតឬអត់?

តួអង្គ ទៀ សង្វាន រូបភាព ក្នុងវីដេអូខ្លីរឿង "ជនដែលត្រូវបាញ់" ថតកាល៣ឆ្នាំមុន

រត់ផង ភ័យផង កាត់ព្រៃ កាត់បន្លា មុតរបួសសុសសាច់ រត់ឡើងភ្នំចូលព្រៃ រហូតដល់មេឃងងឹត។ សង្វាន ព្យាយាមត្រដុសខ្លួននឹងដើមឈើ ដើម្បីកាត់ផ្ដាច់ចំណង និងលាក់ខ្លួនរស់នៅក្នុងព្រៃកោងកាងតែម្នាក់ឯង អត់អាហារជាច្រើនថ្ងៃច្រើនយប់ គឺបរិភោគតែផ្លែ "ដាវយិន" ដើម្បីបន្តជីវិត។ ប៉ុន្តែយមរាជ មិនទាន់ត្រូវការជីវិតមួយនេះ ទើបអាចរស់រានមកដល់សព្វថ្ងៃ ដែល ទៀ សង្វាន ត្រូវបានប្ដូរមកជា ទៀ បាញ់ គឺសម្ដេចពិជ័យសេនា ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនាពេលបច្ចុប្បន្ន។

រូបភាព៖ ទំព័រហ្វេសប៊ុក សម្ដេច ទៀ បាញ់

ខាងលើនេះ គឺជាសង្ខេបខ្លីពីសាច់រឿងប្រវត្តិរបស់សម្ដេច ទៀ បាញ់ ដែលត្រូវបានថតម្ដងរួចមកហើយ កាលពីប្រមាណ ៣ឆ្នាំមុន ដឹកនាំដោយលោក ខាំ ភូរិ។ មានស្នាដៃលើការងារលើកទី១នោះ កូនប្រុសរបស់អតីតអភិបាលខេត្តក្រចេះ ឯកឧត្ដម ខាំ ភឿន បានទទួលការទុកចិត្ត និងប្រគល់កិច្ចការដឹកនាំថតសាច់រឿងនេះម្ដងទៀត ដោយសហការជាមួយអ្នកដឹកជនជាតិថៃមួយរូបទៀត។

ក្រៅពីនេះ នៅមាន Producer ធំៗបីនាក់នៅក្រោយរឿងនេះ ទី១គឺ ឯកឧត្តម ទៀ សីហា អភិបាលខេត្តសៀមរាប និងត្រូវជាកូនទី២សម្ដេច ទៀ បាញ់។ ទី២គឺកូនប្រុសច្បងឈ្មោះ ទៀ សាយ៉ាម និង Producer សំខាន់ទី៣គឺលោក ប៊ូ បញ្ញា។ ក្រោយអ្វីបានរួចររាល់ កម្មវិធីក្រុងពាលីចាប់ផ្ដើមដំណើរការថត ត្រូវបានធ្វើកាលពីថ្ងៃទី ១៧ កក្កដា ២០១៩។

Producer សំខាន់ៗទាំង៣រូប(រាប់ពីឆ្វេង) ឯកឧត្តម ទៀ សីហា អភិបាលខេត្តសៀមរាប។ ទី២គឺកូនប្រុសច្បងឈ្មោះ ទៀ សាយ៉ាម និងលោក ប៊ូ បញ្ញា។

តាមលោក ខាំ ភូរិ ជាអ្នកដឹកនាំថតរឿងខាងលើ បានឲ្យដឹងថា នេះគឺជាខ្សែភាពយន្តខ្នាតធំ ដែលក្រោយថតចប់មិនត្រឹមតែដាក់បញ្ចាំងនៅក្នុងស្រុកទេ គឺអាចនឹងត្រូវយកទៅបញ្ចាំងបរទេសថែមទៀត។ ដូច្នេះហើយ ការងារថតគឺតម្រូវឲ្យមានភាពម៉ត់ចត់ខ្លាំង និងមានការចំណាយពេលច្រើនរៀបចំយូរក៏ថែមទៀត។ លោក ខាំ ភូរិ បន្តថា ក្រុមការងារលោកបានរៀបចាំសាច់រឿងតាំងពីខែ ១១ ឆ្នាំមុន ដោយដកស្រង់ចេញពីសៀវនិពន្ធដោយឯកឧត្ដម នឹម សុវត្ថិ។

“ឥឡូវនេះអ្វីដែលយើងត្រូវធ្វើពីថ្ងៃនេះទៅ គឺគូរ Story Board និងធ្វើ Work Shop បង្រៀនពួកគាត់(តួសម្ដែង)ពីការសម្ដែង បង្រៀនគាត់ពីវិន័យពេទ្យ វិន័យទាហាន ក៏ដូចជាអត្តចរិតដេក ដើរ ឈរ អង្គុយ ឲ្យសាកសមទៅនឹងតួអង្គនាពេលបច្ចុប្បន្ន គឺសម្ដេចពិជ័យសេនា និងភរិយារបស់លោក...ហើយពួកយើងក៏នឹងបង្ហាត់តួអង្គមួយចំនួនក្នុងគុនល្បុក្កតោ និយាយទៅយើងនៅត្រូវធ្វើ Work Shop ក្នុងរយៈប្រហែល១ខែទៀត"។

ក្រោយពីបង្រៀន និងហាត់សម្ដែងយកជាការបានហើយ ក្រុមការងារទាំងមូល គ្រោងនឹងចេញថតនៅក្រោយរដូវភ្លៀងដោយចំណាយពេលប្រមាណ ២ខែកន្លះ ទៅ ៣ខែ និងគ្រោងបញ្ចប់នៅចុងឆ្នាំ២០១៩នេះ។ វិលមកតួអង្គសម្ដែងវិញ ភាពយន្តខ្នាតធំ "ជនដែលត្រូវបាញ់" នេះ អ្នកដឹកនាំដដែល បញ្ជាក់ថា មានការចូលរួមសម្ដែងដោយសិល្បករ សិល្បការិនីកម្ពុជាប្រមាណជា ១០០នាក់ ក្នុងនោះ ក៏មានថ្នាក់ដឹកនាំក្នុងជួររដ្ឋាភិបាល ក៏នឹងចូលរួមសម្ដែងជាមួយគ្នាដែរ។

វិលមកសិល្បករសម្ដែងក្នុងរឿងនេះ លោក នូ ឧសភា ត្រូវបានជ្រើសរើសសម្ដែងជាតួអង្គ ទៀ សង្វាន ឬ ទៀ បាញ់ នាពេលបច្ចុប្បន្ន។ ដោយឡែកកញ្ញា ស៊ឹម ស្រីនិច ដើរតួជាតួអង្គ សមមិត្តនារី តៅ តឿន ភរិយាសម្ដេច ទៀ បាញ់ បច្ចុប្បន្ន។ ក្រៅពីនេះ តួអង្គសំខាន់ផ្សេងទៀតមាន លោក សួន ពិសិដ្ឋ អ្នកនាង ប៉ែន សុផានី ស្វែង សុជាតា លោក អ៊ូ តារ៉ា លោក លាង ឧត្តម និងតួអង្គជាច្រើនទៀត។

ចំពោះទីតាំងត្រូវថត លោក ខាំ ភូរិ បញ្ជាក់ថា ក្រុមការងារនឹងចុះទៅថតដល់ទីតាំងប្រវត្តិពិតរបស់តួអង្គតែម្ដង គឺឃុំទទួលគគីនៃខេត្តកោះកុង។ ក្រៅពីទីតាំងកើតមានសង្គ្រាមធំៗ នៅកំពង់ស្ពឺ កំពត និងកំពង់សោមជាដើម សុទ្ធតែកន្លែងប្រវត្តិពិត ដែលក្រុមការងារត្រូវចុះទៅថតដោយខានមិនបាន៕