ធ្លាប់តែបើកឃើញ លុះសុខៗបាត់ហ្គេមចេញពី Messenger កុំទាន់ឆោឡោ

2019-07-30 01:42:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនបណ្តាញសង្គមយក្ស Facebook បានចាប់ផ្តើមធ្វើការដកចោលនូវមុខងារ Instant Games ក្នុងកម្មវិធីផ្ញើសារ Messenger និងផ្លាស់ប្តូរទៅទីតាំងថ្មី Facebook Gaming លើកម្មវិធីមេវិញហើយ។ ការអាប់ដែតថ្មីនេះ អាចនឹងធ្វើឲ្យអ្នកនិយមកម្សាន្តលេងហ្គេមខ្នាតតូចនៅលើកម្មវិធី Messenger ខ្លះប្រហែលមានការភ័ន្តច្រឡំថា Facebook លុបបំបាត់មុខងារមួយនេះចោល។

ឆ្លើយតបពីនាយកគ្រប់គ្រងផ្នែក Games Partnerships របស់ Facebook លោក Leo Olebe បានពន្យល់ជុំវិញការផ្លាស់ប្តូរថ្មីនេះថា៖ "យើងបានផ្តោតចម្បងលើការបង្កើត Instant Games ទៅក្នុងបទពិសោធន៍ថ្មីនៅលើ Facebook និងជំរុញឲ្យ Messenger អាចមានល្បឿនដំណើរការកាន់តែលឿនជាងមុន ទើបថ្មីៗនេះយើងសម្រេចចែកដាច់ដោយឡែកពី Instant Games លើ Meseenger ទៅកាន់ Facebook Gaming ក្នុងកម្មវិធី Facbook វិញ"។

បញ្ជាក់ថាហ្គេមផ្ទុះការពេញនិយមធំៗ ២ ដូចជា Pac-Man និង Words With Friends Frenzy ដែល Facebook ប្រកាសព្រមគ្នានៅលើ Instant Games ក្នុងកម្មវិធី Messenger កាលពីឆ្នាំ ២០១៦ បានពាំនាំនូវតួលេខអ្នកលេងរាប់លាននាក់ ដែលនេះក៏ជាកត្តាជំរុញឲ្យមានភាពជោគជ័យមួយផ្នែកទៀតផងដែរ។

យ៉ាងណាមិញសម្រាប់អ្នកដែលសកម្មក្នុងការកម្សាន្តជាមួយ Instant Games ក៏នឹងទទួលបានសារជូនដំណឹងពីការផ្លាស់ប្តូរនេះក្នុងពេលខាងមុខឬចាប់ផ្ញើចេញជាបណ្តើរៗសម្រាប់អ្នកប្រើប្រាស់មួយចំនួន៕