ឡូយបាត់ភាពយន្តខ្មែរមួយនេះ ចាយទុនសម្បើម ឯសាច់រឿងវ៉ៃ បាញ់ប្រហារមិនប្រណីកក្រើកព្រៃ

2019-08-06 02:32:21
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីសាយភាយដំណឹងប៉ុន្មានខែរួចមក នៅថ្មីនេះ បានលេចចេញវីដេអូ Trailer នៃរឿង "The Prey” ឬ "វាលប្រមាញ់" នៅលើបណ្ដាញសង្គម ដោយគេបានឃើញថា រឿងនេះ ជាប្រភេទរឿងបាញ់ និងវាយប្រហារយ៉ាងសាហាវកម្រប្រទះក្នុងឧស្សាហកម្មភាពយន្តក្នុងស្រុក។

រឿង "The Prey” ឬ "វាលប្រមាញ់" ផលិតដោយផលិតកម្ម "កងចក្រ" ដែលជាម្ចាស់ផលិតតែមួយជាមួយរឿង "បំបែកគុក" ឬ "Jail Break” ជាប្រភេទរឿងប្រយុទ្ធគ្នាយ៉ាងសាហាវដើម្បីរំដោះខ្លួនចេញពីគុក ល្បីកាលពីឆ្នាំ ២០១៨។ វិលមកចំណងដៃថ្មីនេះទៀត ការប្រយុទ្ធដើម្បីរស់ រឹតតែសាហាវជាងមុន។ សាច់រឿងនិយាយពី ភ្នាក់ងារសំងាត់ចិន ម្នាក់ដែលបានទទួលបេសកកម្មដ៏សំខាន់មួយជាលក្ខណៈអន្តរជាតិ។

ប៉ុន្តែភ្នាក់ងារពិសេសនេះ បែរជាត្រូវភ្លាត់ រហូតត្រូវគេចាប់បានបញ្ជូនទៅកាន់គុកនៅក្នុងព្រៃមួយកន្លែងនៃប្រទេសកម្ពុជាដែលជាកន្លែងឃុំខ្លួនរបស់អ្នកទោសជាច្រើនទៀត។ ពួកគេបានក្លាយជាល្បែងកម្សាន្ត សម្រាប់ក្រុមអ្នកទេសចរដែលមានប្រាក់ច្រើនដ៏គួរអោយខ្លាច។ ពួកគេបានចំណាយពេល និងលុយដ៏ច្រើនរបស់ពួកគេ មកល្បែងបរបាញ់មនុស្សនៅក្នុងព្រៃនោះ។ នេះបើតាមប្រភពមួយក្រុមផលិតបានបង្ហើប។

ប្រភពបន្តថា នេះជាខ្សែភាពយន្តខ្មែរបែបវាយប្រហារដ៏ធំបំផុតមួយ ដែលបានចំណាយទុនផលិតអស់ជាង១លានដុល្លារសហរដ្ឋអាមេរិកឯណោះ ព្រោះភាពយន្តនេះ គ្រោងយកទៅចាក់បញ្ចាំងនៅក្នុងមហោស្រពភាពយន្ត អន្តរជាតិទីក្រុងប៊ូសានប្រទេសកូរ៉េខាងត្បូង និងមហោស្រពភាពយន្តអន្តរជាតិទីក្រុងឡុង ប្រទេសអង់គ្លេសផងដែរ។

ស្ដាប់ទៅពិតជាអស្ចារ្យណាស់ ឥឡូវទស្សនាវីដេអូ Trailer ទាំងអស់គ្នាសិន មុនពេល ភាពយន្តនេះ នឹងត្រូវយកមកចាក់បញ្ចាំងនៅគ្រប់រោងភាពយន្តក្នុងប្រទេសកម្ពុជាចាប់ពីថ្ងៃទី ១៩ កញ្ញា ២០១៩ តទៅ។

អត្ថបទ៖ ទារិកា