ចំណេញទ្វេ! កម្មវិធីថ្មីជួយម្ចាស់អាជីវកម្មដឹងពីសេវា ហើយអ្នកប្រើបានលុយទៀត!

2019-08-06 08:06:25
ចំនួនមតិ 0 | ចំនួនចែករំលែក 0

ចន្លោះមិនឃើញ

GigaGigs by Smart គឺជាកម្មវិធីដំបូងនៅកម្ពុជា ដែលផ្ដល់ឱកាសឲ្យអ្នកប្រើប្រាស់បំពេញភារកិច្ចមួយចំនួន ហើយមានរង្វាន់លើកទឹកចិត្ត និងផ្ដល់ទិន្នន័យឲ្យអាជិវកម្ម។ កម្មវិធីនេះត្រូវបានដាក់ប្រតិបត្តិការនៅប្រទេសអាស៊ានមួយចំនួនដូចជាម៉ាឡេស៊ី ដោយមានភាពជោគជ័យយ៉ាងខ្លាំង ខណៈទើបតែសម្ពោធឲ្យប្រើប្រាស់ជាផ្លូវការនៅកម្ពុជាកាលពីម្សិលមិញប៉ុណ្ណោះ។

លោក Thomas Hundt នាយកប្រត្តិបត្តិរបស់ក្រុមហ៊ុន Smart Axiata បានលើកឡើងថា៖ «នៅក្នុងយុគសម័យនៃការប្រើប្រាស់ទិន្នន័យធំៗ អាជីវកម្មត្រូវការប្រើប្រាស់ទិន្នន័យថ្មីៗបំផុត និងព័ត៌មានសំខាន់ៗដើម្បីធ្វើប្រតិបត្តិអាជីវកម្មរបស់ពួកគេឲ្យកាន់តែមានប្រសិទ្ធិភាព។ ជាមួយ GigaGigs by Smart អាជីវកម្មអាចទទួលបានព័ត៌មានទិន្នន័យពីមហាជនបានយ៉ាងងាយស្រួល និងប្រកបដោយអត្ថប្រយោជន៍ ហើយក៏មានការផ្ដល់រង្វាន់លើកទឹកចិត្តដល់អ្នកប្រើប្រាស់សម្រាប់ការចូលរួមរបស់ពួកគាត់ ផងដែរ។»

លោក Kow Kuan Hua នាយកគ្រប់គ្រង និងជាស្ថាបនិក GigaGigs ប្រចាំតំបន់អាស៊ីអាគ្នេយ៍មានមតិថា៖ «វិធីសាស្រ្តនៃការស្រាវជ្រាវទីផ្សារដែលធ្លាប់ធ្វើកន្លងមក និងការប្រមូលទិន្នន័យជារឿយៗមានការយឺតយ៉ាវ និងមានតម្លៃថ្លៃ ប៉ុន្តែជាមួយ GigaGigs by Smart កម្មវិធីនេះមានលក្ខណៈសាមញ្ញដូចជាការបញ្ចូលកិច្ចការទៅក្នុងកម្មវិធី ក្នុងទូរស័ព្ទដៃ ហើយបន្ទាប់មកដូចជាការទាញយកប្រតិបត្តិទិន្នន័យដោយផ្ទាល់ពីអ្នកប្រើប្រាស់ជាក់ស្តែង»។

អ្នកប្រើប្រាស់ GigaGigs នឹងត្រូវធ្វើការងារមួយចំនួនដូចជា៖

ការបញ្ជាក់ផ្លាកយីហោ
ការបញ្ជាក់របៀបលក់ដូរ (លក់ដុំ ឬលក់រាយ)
ការស្ទង់មតិអំពីគុណភាព និងសេវាកម្មអតិថិជន។

កម្មវិធីនេះក៏អនុញ្ញាតឲ្យអតិថិជនចែករំលែកទីតាំងរបស់ខ្លួនលើប្រព័ន្ធ GPS ដើម្បីបង្ហាញថា កិច្ចការត្រូវបានបញ្ចប់នៅហាងជាក់លាក់ណាមួយ និងដើម្បីបញ្ចូលរូបថត វីដេអូរបស់ហាង ឬផលិតផលដែលពួកគេទទួលភារកិច្ចពិនិត្យឡើងវិញ។ លោកអ្នកអាច Download កម្មវិធីនេះតាម Google Play Store និង App Store តាមទូរសព្ទដោយឥតគិតថ្លៃ៕

អត្ថបទ៖ សុខ វេងឈាង