ZTE បញ្ចេញលក់ស្មាតហ្វូន 5G នៅចិនបានមុនក្រុមហ៊ុនផ្សេងៗទាំងអស់

2019-08-06 06:33:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនចិន ZTE បានក្លាយជាក្រុមហ៊ុនដំបូងគេបញ្ចេញលក់ស្មាតហ្វូន 5G នៅចិន ជាមួយការចេញលក់ស្មាតហ្វូនម៉ូដែល Axon 10 Pro 5G។ នេះបើតាមការចុះផ្សាយរបស់សារព័ត៌មានចិន Xinhau។

ស្មាតហ្វូននេះបានបង្ហាញមុខដំបូងតាំងពីខែកុម្ភៈ ក្នុងកម្មវិធីទូរសព្ទ MWC ដែលវាមានបំពាក់នូវអេក្រង់ AMOLED ទំហំ ៦,៤៧ អ៊ីញ អាចបង្ហាញរូបក្នុងកម្រិត 1080P ប្រើប្រាស់ Model 5G ជំនាន់ដំបូងរបស់ Qualcomm ដែលជាម៉ូដែល X50 សម្រាប់ភ្ជាប់ជាមួយប្រព័ន្ធ 5G របស់ចិន។

ត្បិតថាអតិថិជនអាចប្រើប្រាស់ស្មាតហ្វូន 5G នេះ ចាប់ពីពេលនេះ ក៏ពួកគេមិនអាចប្រើប្រាស់សេវា 5G បាននៅឡើយដែរ ព្រោះថា 5G នៅចិនអាចនឹងលេចមុខនៅខែតុលាខាងមុខ ពីក្រុមហ៊ុន China Mobile។ China Mobile រំពឹងថានឹងបញ្ចេញ 5G ឲ្យប្រើប្រាស់ក្នុងទីក្រុងជាង ៥០ នៅចិន ត្រឹមដំណាច់ឆ្នាំនេះ។

ការបញ្ចេញលក់របស់ ZTE នេះដែរ មានន័យថាក្រុមហ៊ុនអាចឈ្នះ Huawei ក្លាយជាក្រុមហ៊ុនលក់ទូរសព្ទ 5G មុនគេនៅចិន។ Huawei ត្រូវបានគេរំពឹងថានឹងដាក់លក់ Mate 20 X 5G នៅថ្ងៃទី ១៦ ខែសីហា ប៉ុន្តែស្មាតហ្វូននេះបានចេញលក់រួចហើយនៅទីផ្សារបរទេសដូចជាចក្រភពអង់គ្លេស កាលពីចុងខែកក្កដាកន្លងទៅ។

Axon 10 Pro 5G មានតម្លៃលក់ចាប់ពីប្រមាណ ៤៥៤ ដុល្លារសម្រាប់ប្រភេទ RAM ទំហំ ៦ GB/ROM ១២៨ GB, តម្លៃ ៥២៥ ដុល្លារសម្រាប់ RAM ៨ GB/ROM ២៥៦ GB និងតម្លៃ ៥៩៦ ដុល្លារសម្រាប់ RAM ១២ GB/ROM ២៥៦ GB៕

ចុចអាន៖

ប្រភព៖ The Verge ប្រែសម្រួល៖ សុខហេង