គម្រោងលេចធ្លោជាងគេបីកើតឡើងក្នុងអាណត្តិឯកអគ្គរាជទូតជប៉ុនហូរីណូអ៊ុជិ ហ៊ីដេហ៊ីសា

2019-08-17 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលបីឆ្នាំក្នុងតំណែងជាឯកអគ្គរាជទូតជប៉ុនវិសាមញ្ញ និងពេញសមត្ថភាពប្រចាំប្រទេសកម្ពុជា ឯកឧត្តមហូរីណូអ៊ុជិ ហ៊ីដេហ៊ីសា បានបង្កើតស្នាដៃលេចធ្លោជាច្រើនទាំងទំនាក់ទំនងការទូត និងសេដ្ឋកិច្ច។

បើតាមព័ត៌មានពីស្ថានទូតជប៉ុនប្រចាំកម្ពុជាក្នុងរយៈពេលបីឆ្នាំនេះទំនាក់ទំនងផ្នែកសេដ្ឋកិច្ចរវាងកម្ពុជា និងជប៉ុនមានការរីកចំរើន។ ការវិនិយោគពីសំណាក់ក្រុមហ៊ុនជប៉ុនមកកម្ពុជាមានការកើនឡើង៣,៣ដងក្នុងឆ្នាំ២០១៨ ច្រើនជាងឆ្នាំ២០១៥។

សម្រាប់ទំហំពាណិជ្ជកម្មរវាងប្រទេសទាំងពីរវិញកើនឡើង៣៤ភាគរយគិតក្នុងឆ្នាំ២០១៨ ធៀបនឹងឆ្នាំ២០១៥។ ជាមួយគ្នានេះដែរ ការផ្ដល់ទិដ្ឋាការដល់ជនជាតិខ្មែរទៅកាន់ប្រទេសជប៉ុនក៏បានកើនឡើង២,៨៥ដងក្នុងឆ្នាំ២០១៨ លើសឆ្នាំ២០១៥។

សម្រាប់ជំនួយផ្នែកសេដ្ឋកិច្ចវិញឯកឧត្តមហូរីណូអ៊ុជិ ហ៊ីដេហ៊ីសាបានចុះហត្ថលេខាលើ១០០គម្រោងមានទឹកប្រាក់ចំនួន៧០០លានដុល្លារក្នុងអាណត្តិរបស់ឯកឧត្តម។ ក្នុងគម្រោងទាំងនេះ មានគម្រោងធំៗបីគួរឲ្យកត់សម្គាល់គឺគម្រោងជួសជុលឡើងវិញស្ពានមិត្តភាពកម្ពុជា-ជប៉ុន ជ្រោងចង្វារទី១ គម្រោងធ្វើឲ្យប្រសើរឡើងផ្លូវជាតិលេខ១ និងបញ្ចប់គម្រោងកំពង់ផែពហុបំណងក្រុងព្រះសីហនុ។

បើនិយាយដល់ទំនាក់ទំនងការទូតវិញកាលពីឆ្នាំ២០១៨ ជាខួប៦៥ឆ្នាំនៃចំណងការទូតរវាងប្រទេសទាំងពីរ ក្នុងនោះមានកម្មវិធីរំឭកខួបនេះចំនួន៨០ត្រូវបានធ្វើឡើង។ មុននេះដែរកាលពីឆ្នាំ២០១៦ ក៏មានការដាក់ឲ្យដំណើរការការិយាល័យកុងស៊ុលជប៉ុនប្រចាំខេត្តសៀមរាប។

អ្វីដែលកាន់តែពិសេសនោះគឺដំណើរទស្សនកិច្ចកម្រិតខ្ពស់បស់សម្តេចតេជោ ហ៊ុន សែន ទៅកាន់ប្រទេសជប៉ុនបីដងជាប់គ្នា និងមានជំនួបកំពូលជាមួយលោកនាយករដ្ឋមន្ត្រីAbe ផងដែរ៕

អត្ថបទ៖ ទូច សុខា