ទង្វើទាំងនេះហើយធ្វើឲ្យ Hye Sun ចង់លែង Jae Hyun តែមិនដាច់ចិត្តព្រោះហេតុផលខ្លះ

2019-08-21 04:44:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ុន្មានថ្ងៃចុងក្រោយនេះ ព័ត៌មានស្នេហាប្រេះឆារបស់តារាសម្ដែងជួរមុខរបស់កូរ៉េ Goo Hye Sun និង Ahn Jae Hyun បានក្លាយជាដំណឹងក្ដៅដែលធ្វើឲ្យមជ្ឈដ្ឋានទូទៅផ្ដោតការចាប់អារម្មណ៍ខ្លាំងបំផុត។

រឿងរ៉ាវកាន់តែបែកធ្លាយបន្តិចម្ដងៗទៅកាន់សាធារណៈ ពីជីវិតពិរបស់អ្នកទាំង ២តក្រោយរៀបការ។ ដោយឡែក ក្រោយធ្លាយព័ត៌មានថា Ahn Jae Hyun មានបំណងចង់បញ្ចប់ចំណងស្នេហាជាប្ដីប្រពន្ធជាមួយ Goo Hye Sun អ្នកគាំទ្រច្រើនបំផុតមានការព្រួយបារម្ភចំពោះសាមីខ្លួនខាងស្រី ហើយម្នាក់ៗពិតជាចង់ដឹងការសម្រេចចិត្តចុងក្រោយទៅជាយ៉ាងណា?

យ៉ាងណាមិញ បន្ទាប់ពីមានរឿងហូរហែមក ពេលនេះ Hye Sun សម្រេចទម្លាយពីទង្វើមួយចំនួនរបស់ Jae Hyun ដែលធ្វើដាក់នាង មកពិភាក្សាជាមួយអ្នកជំនាញផ្លូវច្បាប់ មុនឈានដល់ការលែងលះជាផ្លូវការ។

ខាងមេធាវីផ្ទាល់របស់តារាស្រីរូបនេះ បានឲ្យដឹងថា៖ "យើងនឹងប្រកាសពីជំហរពិតប្រាកដ និងផ្លូវការទាក់ទងនឹងការលែងលះរបស់នាង (Goo Hye Sun) និង Ahn Jae Hyun។ ដំបូង យើងចង់ថ្លែងសុំទោស និងសម្ដែងនូវការសោកស្ដាយជាខ្លាំងទៅកាន់អ្នកគាំទ្រទាំងអស់ ដែលផ្ដោតការតាមដាន និងគាំទ្រលើកទឹកចិត្ត Goo Hye Sun ទាំងជីវិតសិល្បៈ និងជីវិតរៀបការរបស់នាង។ ពិតណាស់ Goo Hye Sun ក៏ធ្លាប់បានពិគ្រោះយោបល់ជាមួយនឹង Ahn Jae Hyun ពីរឿងលែងលះ ប៉ុន្តែនាងមិនដែលយល់ព្រមនឹងសំណើរលែងគ្នាម្ដងណាឡើយ។ សូម្បីបច្ចុប្បន្ន នាងក៏គ្មានបំណងចង់បែកគ្នា ហើយក៏មិនចង់បន្ទោសចំណងអាពាហ៍ពិពាហ៍នេះដែរ។

ឯកសារនៃកិច្ចព្រមព្រៀងលែងលះ ត្រូវបានព្រាងទុកជាស្រេច ក៏ដូចជាត្រូវបានផ្លាស់ប្ដូរគ្នាចុះហត្ថលេខាយល់ព្រម ប៉ុន្តែវានៅមិនទាន់បានកំណត់ថ្ងៃខែ ហើយសាមីខ្លួនទាំងសង្ខាងក៏មិនទាន់មានអ្នកណាចុះហត្ថលេខាព្រមព្រៀងដែរ។

ដូចអ្វីដែល Hye Sun បាននិយាយដោយខ្លួននាងផ្ទាល់ថា នាងស្ថិតនៅដំណាក់កាលរងសម្ពាធពី Jae Hyun ដោយសារតែលោកតែងបង្ហាញអារម្មណ៍ធុញទ្រាន់ បំផ្លាញទំនុកចិត្តនាង ប្រែចិត្តស្រឡាញ់ខុសពីមុន និងតែងនិយាយទូរសព្ទឥតដាច់ជាមួយស្រីៗ ពេលគេស្រវឹងម្ដងៗ ទាំងនេះហើយជាមូលហេតុដែលធ្វើឲ្យ Hye Sun ចង់លែង ប៉ុន្តែនាងក៏បានបញ្ជាក់ច្បាស់ហើយនៅលើបណ្ដាញសង្គម ថានាងមិនអាចធ្វើបាន ព្រោះតែចង់ការពារមុខមាត់គ្រួសារ ពិសេសម្ដាយរបស់នាងដែលកំពុងមានវិបត្តិផ្លូវចិត្ត ព្រមជាមួយសុខភាពយ៉ាប់យ៉ឺនទៀត។ មកទល់ពេលនេះ បំណងចង់ថែចំណងអាពាហ៍ពិពាហ៍របស់នាង ដើម្បីការពារគ្រួសារ និងម្ដាយនៅតែរក្សាដដែលដូចមុន មិនមានការប្រែប្រួលឡើយ។

ដូច្នេះសរុបមក ចំពោះព័ត៌មានដែលបានចុះផ្សាយថា Goo Hye Sun និង Ahn Jae Hyun «យល់ព្រម» លែងលះគ្នាជាស្ថាពរនោះគឺ មិនពិតនោះទេ។

ជាមួយគ្នានោះដែរ Hye Sun ក៏បានបញ្ជាក់ដែរថា នាងលែងនៅក្រោមការគ្រប់គ្រងរបស់ក្រុមហ៊ុន HB Entertainment ហើយ ស្របពេលដែលក្រុមហ៊ុននោះបានបំផ្លាញទំនុកចិត្តរបស់នាង ដោយពួកគេហ៊ានលូកដៃជ្រែកក្នុងជីវិតឯកជនរបស់តារារបស់ខ្លួនដោយគ្មានការអនុញ្ញាតិ។ នាងសង្ឃឹមថាកុងត្រាផ្ដាច់មុខរបស់នាងជាមួយក្រុមហ៊ុននោះ នឹងឈានដល់ទីបញ្ចប់ឆាប់បំផុត។

ទោះបីជាយ៉ាងណាក៏ដោយ ប្រសិន ក្រុមហ៊ុន HB Entertainment ខកខានមិនបានសហការជាមួយយើងទាក់ទងរឿងនេះទេ យើងក៏គ្មានជម្រើសផ្សេងដែរ ក្រៅពីចាត់ការទៅតាមផ្លូវច្បាប់។

យើងសង្ឃឹមថា នឹងមិនមានអត្ថបទព័ត៌មានចុះផ្សាយមិនពិតទាក់ទងនឹងការលែងលះរបស់ Goo Hye Sun និង Ahn Jae Hyun តទៀត។

ជាថ្មីម្ដងទៀត យើងសុំទោសដែល បញ្ហាផ្ទាល់ខ្លួនមួយនេះ ក្លាយជារឿងក្ដៅត្រូវបានគេលើកយកទៅពិភាក្សាពេញទឹកពេញដី និងបែកធ្លាយរឿងមិនល្អបែបនេះ។ យើងនឹងព្យាយាមជម្នះស្ថានភាពតានតឹងនេះឲ្យបានល្អ"។

សូមបញ្ជាក់ផងដែរថា កាលពីដើមសប្ដាហ៍នេះ Goo Hye Sun ដែលគ្រប់គ្នាស្គាល់ច្បាស់ថាជាតួឯកស្រីក្នុងរឿង F4 កូរ៉េ បានបង្ហោះសារ ដែលបង្ហាញច្បាស់ៗថា Ahn Jae Hyun ជាស្វាមីចាប់ផ្ដើមមានអារម្មណ៍ធុញទ្រាន់ នឿយណាយនឹងទំនាក់ទំនងប្ដីប្រពន្ធនេះហើយ។ មិនបានប៉ុន្មាននាងក៏បានលុបសារដែលបានបង្ហោះនោះចោលវិញ ប៉ុន្តែផុសរូប Screenshot សារថ្មីមួយទៀត ក្នុងបំណងការពារម្ដាយកំពុងឈឺ។ ក្រោយមកទៀតផលិតកម្ម HB Entertainment បានបញ្ជាក់ថា តារាប្រុសស្រីទាំង ២ បានលែងលះគ្នាហើយ។ ឯក្រុមការងារនៃរឿងថ្មីរបស់ Jae Hyun ក៏មិនបាននិយាយអ្វីទាក់ទងនឹងដំណឹងលែងគ្នានេះដែរ។ មួយវិញទៀត បើតាមប្រភពជិតស្និទ្ធរបស់ Hye Sun បានលួចទម្លាយថា ការសម្រេចចិត្តរបស់នាងប្ដូរទៅចូលទៅជ្រកក្រោមផលិតកម្ម HB Entertainment នោះអាចជាដើមហេតុធ្វើឲ្យចំណងអាពាហ៍ពិពាហ៍របស់ពួកគេត្រូវរង្គោះរង្គើ៕