ធ្លាប់ឆ្ងល់ទេ បើផែនដីលែងមានដើមឈើ តើជីវិតមនុស្ស សត្វ ទៅជាយ៉ាងណា?

2019-08-26 04:01:14
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីឆ្នាំ២០១៥ មានការប៉ាន់ប្រមាណថាដើមឈើមានចំនួន៣,០៤ទ្រីលានដើមនៅលើផែនដី ឬស្មើនឹង៣១ភាគរយនៃផ្ទៃផែនដី។ យ៉ាងណាមិញក៏មានដែរការប៉ាន់ប្រមាណថាក្នុងមួយឆ្នាំដើមឈើប្រហែលជា១៥លានដើមត្រូវបានកាប់បំផ្លាញ។ ចំនួននេះគេជឿថាយ៉ាងយូរ២០០ឆ្នាំទៀតផែនដីនឹងលែងមានដើមឈើទៀតហើយ។

ចុះបើលើផែនដីគ្មានដើមឈើតើជីវិតមនុស្សទៅជាយ៉ាងណា? A world without trees

កង្វះអុកស៊ីហ្សែន?

អ្នកទាំងអស់គ្នាទំនងជាដឹងហើយថាអុកស៊ីហ្សែនមាន២១ភាគរយក្នុងបរិយាកាសផែនដី។ ពាក់កណ្ដាលនៃអុកស៊ីហ្សែននេះកើតចេញពីការធ្វើរស្មីសំយោគរបស់ដើមឈើ និងរុក្ខជាតិផ្សេងទៀត ខណៈមួយចំណែកទៀតកើតចេញពីរុក្ខជាតិនៅក្នុងសមុទ្រ។

បើទោះបីជាគ្មានដើមឈើនៅលើផែនដី ចំនួនអុកស៊ីហ្សែនក៏នៅតែមាន គ្រាន់តែថាចំនួននេះមានតិចជាងមុន។ ដើមឈើមួយដើមក្នុងមួយឆ្នាំផលិតអុកស៊ីហ្សែនបានសម្រាប់មនុស្ស១០នាក់សម្រាប់ដកដង្ហើម ហើយបើគ្មានដើមឈើនោះទេ អុកស៊ីសែនមាននៅលើផែនដីអាចឲ្យចំនួនមនុស្សបច្ចុប្បន្នដែលមានលើផែនដីដកដង្ហើមបានដល់៤០០០ឆ្នាំទៅមុខទៀត។ ប៉ុន្តែចូរចាំថាចំនួនមនុស្សកើនឡើង ការបំពុលបរិយាកាសក៏មាន ដូចនេះចំនួនអុកស៊ីហ្សែនដែលផលិតដោយរុក្ខជាតិក្នុងសមុទ្រមិនអាចទ្រទ្រង់ជីវិតមនុស្សលើផែនដីរហូតដល់៤០០០ឆ្នាំទៅមុខនោះទេ។

កាត់បន្ថយឧស្ម័នពុល?

ស្រមៃមើលថាបើគ្មានដើមឈើតើការបំពុលបរិយាកាសពីឧស្ម័នផ្ទះកញ្ចក់កើនឡើងយ៉ាងណា។ ស្លឹកឈើជួយការពារប្រព័ន្ធអូហ្សូន និងទប់ស្កាក់ធូលីក្នុងបរិយាកាស និងស្រូបយកឧស័្មនកាបូនិចពីបរិយាស។ ក្នុងឆ្នាំ២០១២ មនុស្សប្រមាណជា៣,៧លាននាក់បានស្លាប់ដោយសារខ្យល់កខ្វក់។ នៅពេលគ្មានដើមឈើតើមនុស្សជាតិនឹងត្រូវពាក់ម៉ាស ឬដបអុកស៊ីហ្សែនដើម្បីជីវិតរស់?

បរិយាកាសផែនដីកាន់តែឡើងកម្ដៅ?

ព្រៃឈើក្នុងផ្ទៃដីជិតកន្លះហិកតា ក្នុងមួយឆ្នាំអាចស្រូបយកឧស្ម័នកាបូនិចស្មើនឹងបរិមាណដែលចេញពីរថយន្តរត់ក្នុងចំងាយជាងបួនម៉ឺនគីឡូម៉ែត្រ។ ការកាប់បំផ្លាញព្រៃឈើបច្ចុប្បន្នរួមចំណែក១៥ភាគរយក្នុងការកើនឡើងឧស្ម័នផ្ទះកញ្ចក់លើផែនដី។ ការកើនឡើងបរិមាណឧស្ម័នកាបូនិចនឹងធ្វើឲ្យកម្ដៅផែនដីកើនឡើងផងដែរ។

បាត់បង់បរិមាណទឹកភ្លៀង?

ព្រៃឈើមិនត្រឹមតែទាក់ទាញទឹកភ្លៀងប៉ុណ្ណោះទេ តែថែមទាំងជួយឲ្យមានភ្លៀងទៀងទាត់ទៀតផង។ ក្នុងករណីបាត់បង់ព្រៃឈើនឹងធ្វើឲ្យភ្លៀងមិនទៀតទាត់ ដីឆាប់ស្ងួត និងខ្វះសំណើម។ ការសិក្សាមួយកាលពីឆ្នាំ២០១២ បង្ហាញថានៅឆ្នាំ២០៥០ខាងមុខការកាប់បំផ្លាញព្រៃឈើនៅតំបន់អាម៉ាហ្សូន នឹងធ្វើឲ្យបរិមាណទឹកភ្លៀងធ្លាក់នៅតំបន់នោះថយចុះចំនួន២១ភាគរយនៅរដូវប្រាំង។

បាត់បង់ដីមានជីវជាតិ?

ដើមឈើនឹងឫសឈើជួយរក្សាគុណភាពដី បើកាលណាបាត់បង់ដើមឈើធ្វើឲ្យដីឆាប់ច្រោះ រិចរិល ដោយសារទឹកភ្លៀង។ មិនតែប៉ុណ្ណោះដីអាចក្លាយជាមានជាតិពុល ដែលរាល់ដងជាតិពុលទាំងនេះចម្រោះដោយដើមឈើ។ ពេលដីសម្បូរជាតិពុលមិនងាយនឹងដាំអ្វីបានទៀតនោះទេ។ រុក្ខជាតិជាប្រភពនៃម្ហូបអាហារ គ្មានដើមឈើក៏គ្មានទេក្រដាសសម្រាប់សរសេរ ប៊ិច សូម្បីតែកាហ្វេក៏គ្មានដែរ។ គ្មានដើមឈើក៏ទំនងជាគ្មានអាហារសម្រាប់សត្វព្រៃ ឬសម្រាប់មនុស្សជាតិដូចគ្នា។ គ្រប់គ្នាត្រូវដឹងថាជីវិតសត្វ និងរុក្ខជាតិរស់នៅលើដីគោក៧០ភាគរយពឹងលើព្រៃឈើ៕

អត្ថបទ៖ ទូច សុខា