នាយករដ្ឋមន្ត្រីម៉ាឡេស៊ី នឹងមកទស្សនកិច្ចនៅ កម្ពុជា ពីថ្ងៃទី ២ ដល់ ៤ ខែកញ្ញា នេះ
- 2019-08-27 03:49:16
- ចំនួនមតិ 0 | ចំនួនចែករំលែក 0
នាយករដ្ឋមន្ត្រីម៉ាឡេស៊ី នឹងមកទស្សនកិច្ចនៅ កម្ពុជា ពីថ្ងៃទី ២ ដល់ ៤ ខែកញ្ញា នេះ
ចន្លោះមិនឃើញ
នាយករដ្ឋមន្ត្រី នៃប្រទេសម៉ាឡេស៊ី លោក មហាធៀរ មហាម៉ាត់ (Mahathir Mohamad) នឹងអញ្ជើញមកបំពេញទស្សនកិច្ចផ្លូវការ នៃព្រះរាជាណាចក្រកម្ពុជា រយៈពេលបីថ្ងៃ គឺចាប់ពីថ្ងៃទី២ ដល់ថ្ងៃទី៤ ខែកញ្ញា ឆ្នាំ២០១៩ ខាងមុខ។ នេះបើតាមការបញ្ជាក់របស់លោកកេត សោផាន់ អ្នកនាំពាក្យក្រសួងការបរទេស និងនិងសហប្រតិបត្តិការអន្តរជាតិ។
អ្នកនាំពាក្យក្រសួងការបរទេសបានបន្តថា តាមគម្រោងលោកនាយករដ្ឋមន្ត្រីម៉ាឡេស៊ី នឹងជួបសម្តែងការគួរសមនិងពិភាក្សាការងារជាមួយ សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចវិបុលសេនាភក្តី សាយ ឈុំ ប្រធានព្រឹទ្ធសភា។
ដោយឡែកយោងតាមការប្រកាសរបស់សាកលវិទ្យាល័យភួមិន្ទភ្នំពេញកាលពីថ្ងៃទី២៦ ខែសីហាបានឲ្យដឹងថា លោក មហាធៀរ មហាម៉ាត់ នាយករដ្ឋមន្ត្រី នៃប្រទេសម៉ាឡេស៊ី នឹងអញ្ជើញថ្លែងបាឋកថាពិសេស នៅសាកលវិទ្យាល័យភូមិន្ទភ្នំពេញ នារសៀលថ្ងៃទី២ ខែកញ្ញា ឆ្នាំ២០១៩ វេលាម៉ោង ១៣:៣០នាទី រសៀល។
សូមជម្រាបថា កាលពីថ្ងៃទី១០ ខែឧសភា ឆ្នាំ២០១៨ លោក Mahathir Mohamad ដែលមានអាយុជិត៩៤ ឆ្នាំ បានធ្វើសច្ចាប្រណិធានទទួលតំណែងជានាយករដ្ឋមន្ត្រីម៉ាឡេស៊ី អាណត្តិថ្មី។ ពិធីសច្ចាប្រណិធានត្រូវបានធ្វើឡើងក្រមអធិបតីភាពដោយព្រះមហាក្សត្រម៉ាឡេស៊ី Muhammad ទី V។ ទទួលតំណែងនៅអាយុជិត ៩៤ ឆ្នាំ លោក Mahathir Mohamad ក្លាយទៅជាអ្នកប្រមុខរដ្ឋាភិបាលជើងចាស់បំផុតលើពិភពលោក។ លោក Mahathir បានចាកចេញពីឆាកនយោបាយនៅឆ្នាំ២០០៣ ប៉ុន្តែលោកបានត្រឡប់មកធ្វើនយោបាយវិញនៅឆ្នាំ២០១៨។
សូមបញ្ជាក់ផងដែរថា លោក Mahathir បានកាន់តួនាទីជានាយករដ្ឋមន្ត្រីម៉ាឡេស៊ីចំនួនពីរលើក។ លើកទី ១ ពីឆ្នាំ ១៩៨១ ដល់ឆ្នាំ ២០០៣ ចំណែកឯលើកទី ២ គឺពីខែឧសភា ២០១៨ រហូតដល់ពេលបច្ចុប្បន្ន៕
សម្រាប់ការចុះឈ្មោះចូលរួម សូមចុច https://bit.ly/341a2Hc
ឬនៅទីតាំងផ្ទាល់សាកលវិទ្យាល័យភូមិន្ទភ្នំពេញអគារធំ ជណ្ដើរកណ្តាល។ ដោយកន្លែងមានកំណត់ ក្រុមការងារសូមរក្សាសិទ្ធិក្នុងការទាក់ទងទៅលោក លោកស្រី និងប្អូនៗនិស្សិតណា ដែលនឹងត្រូវបានជ្រើសរើសឲ្យចូលរួមតែប៉ុណ្ណោះ៕