ជីវិតនិស្សិតក្រីក្រពីររូបប្រែប្រួលស្ទើរទាំងស្រុង ក្រោយទទួលអាហារូបករណ៍អេសស៊ីជី
- 2019-08-31 05:25:57
- ចំនួនមតិ 0 | ចំនួនចែករំលែក 0
ជីវិតនិស្សិតក្រីក្រពីររូបប្រែប្រួលស្ទើរទាំងស្រុង ក្រោយទទួលអាហារូបករណ៍អេសស៊ីជី
ចន្លោះមិនឃើញ
កម្មវិធីអាហារូបករណ៍ «អេសស៊ីជី ចែករំលែកក្ដីសុបិន» ជាកម្មវិធីមួយជួយដល់កម្ពុជា ក្នុងការអភិវឌ្ឍន៍ធនធានមនុស្ស ដោយផ្ដល់អាហារូបករណ៍ទៅដល់សិស្សថ្នាក់វិទ្យាល័យ និងមហាវិទ្យាល័យ។
បើគិតមកដល់ពេលនេះ អេសស៊ីជី បានផ្ដល់អាហារូបករណ៍ដល់សិស្សនិស្សិតខ្មែរ លើសពី ១០០០ នាក់ហើយ ហើយនឹងនៅតែបន្តផ្ដល់ជំនួយបន្ថែមទៀតដើម្បីចូលរួមធ្វើឲ្យវិស័យអប់រំនៅកម្ពុជាកាន់តែល្អប្រសើរឡើង។
តាមរយៈកម្មវិធី អេសស៊ីជី ចែករំលែកក្ដីសុបិន និស្សិតពីររូបបានបង្ហាញចំណាប់អារម្មណ៍ថា ជីវិតរបស់ពួកគេ សុទ្ធតែមានការប្រែប្រួលជាវិជ្ជមានបន្ទាប់ពីទទួលបានជំនួយពីកម្មវិធីមួយនេះ។
កញ្ញា ឆន សុខអាយ
ជានិស្សិតឆ្នាំទី ៣ ជំនាញវេជ្ជបណ្ឌិតនៅសាកលវិទ្យាល័យន័រតុន យុវតីរូបនេះ បានប្រាប់ឲ្យដឹងថាខ្លួនពិតជាសប្បាយចិត្តខ្លាំងណាស់ ដែលអាចក្លាយជាបញ្ញវន្តមួយរូបក្នុងថ្ងៃនេះ ពីព្រោះកាលពីប្រាំឆ្នាំមុន កញ្ញាមិនបានគិតថាអាចមានឱកាសបន្តការសិក្សាមកដល់ថ្ងៃនេះទេ។
កញ្ញាថា ៖«កាលពីប្រាំឆ្នាំមុនខ្ញុំមិនគិតថាខ្ញុំអាចមានឱកាសបន្តការសិក្សាមកដល់ថ្ងៃនេះទេ ដោយស្ថិតក្នុងស្ថានភាពលំបាកខ្ញុំមានឱកាសតិចបំផុតដើម្បីទទួលបានការអប់រំឱ្យបានទូលំទូលាយ នេះក៏ដោយសារតែខ្ញុំមកពីគ្រួសារក្រីក្រ ប៉ុន្តែខ្ញុំជឿជាក់លើក្តីសុបិនរបស់ខ្ញុំ ហើយទោះបីជាយ៉ាងណាក៏ខ្ញុំត្រូវសម្រេចក្តីសុបិនរបស់ខ្ញុំឱ្យបាន»។
ទោះបីជាពេលនេះ សុខ អាយ រៀនមិនទាន់ចប់ក៏ដោយ ប៉ុន្តែយុវតីរូបនេះ បានបង្ហាញពីក្ដីរំពឹងរួចទៅហើយថា កម្មវិធី អេសស៊ីជី ចែករំលែកក្ដីសុបិននេះ នឹងជួយឲ្យក្ដីសុបិនរបស់កញ្ញាក្លាយជាកាពិត ហើយកញ្ញា សង្ឃឹមថាថ្ងៃណាមួយ ខ្លួននឹងមានលទ្ធភាពជួយខ្លួនឯង ក្រុមគ្រួសារ និងសង្គមឱ្យមានជីវិតកាន់តែប្រសើរ។
លោក ខាន់ សំណាង
សព្វថ្ងៃនេះ សំណាង ជានិស្សិតឆ្នាំទី ៣ ជំនាញវិស្វកម្មសំណង់ស៊ីវិល នៅសាកលវិទ្យាល័យន័រតុន ហើយសំណាងបានប្រាប់ថា លោកពិតជាមានមោទនភាពចំពោះខ្លួនឯងណាស់ ដែលអាចឈានមកដល់ចំចំណុចនេះ ទោះបីជាខ្លួនមកពីគ្រួសារក្រីក្រ មិនសូវមានឱកាសទទួលបានការសិក្សាដូចគេក៏ដោយ។
និស្សិតរូបនេះបន្តរៀបរាប់ថា ៖«មុននឹងជាប់អាហារូបករណ៍ អេសស៊ីជី ចែករំលែកក្តីសុបិននេះ ខ្ញុំមិនមានអ្វីទាំងអស់ ប៉ុន្តែខ្ញុំមានកម្លាំងចិត្តសម្រាប់ខ្លួនខ្ញុំ ហើយខ្ញុំមានគំនិតសុទិដ្ឋិនិយមថា ការខិតខំប្រឹងប្រែងរបស់ខ្ញុំអាចយកឈ្នះនូវភាពលំបាកក្នុងជីវិតរបស់ខ្ញុំ»។
អ្វីដែលធ្វើឲ្យយុវជនរូបនេះ កាន់តែមានកម្លាំងចិត្តដើរទៅមុខបន្តនោះ គឺបុគ្គលិក អេសស៊ីជី បានទៅសួរសុខទុក្ខរូបលោក ដល់សាលា និងផ្ទះ មុននឹងផ្ដល់អាហារូបករណ៍ ដែលសបញ្ជាក់ឱ្យឃើញ ពីការស្រលាញ់ និងយកចិត្តទុកដាក់ពីម្ចាស់អំណោយ។
លោកថា រឿងទាំងអស់នេះហើយ ដែលជួយជំរុញឱ្យលោកមិនបោះបង់ក្តីសុបិន និងតែងតែរកវិធីជម្នះរាល់ឧបសគ្គដើម្បីឈានទៅកាន់ភាពជោគជ័យ៕