Mate 30 Pro បែកធ្លាយមុខមាត់ទ្រង់ទ្រាយធំ លែងមានប៊ូតុងថែម/ថយសំឡេង

2019-09-04 09:08:46
ចំនួនមតិ 0 | ចំនួនចែករំលែក 0

ចន្លោះមិនឃើញ

Huawei បានប្រកាសថា Mate 30/30 Pro នឹងប្រកាសចេញជាផ្លូវការនៅថ្ងៃទី ១៩ ខែកញ្ញា នាទីក្រុង Munich ប្រទេសអាល្លឺម៉ង់។ ពេលនេះរូបរាងច្បាស់ការណ៍របស់ប្រភេទ Pro បានលេចចេញ ដែលចេញផ្សាយដោយ @OnLeaks សហការជាមួយ Priceboba។

តាមរូបភាពបានបង្ហាញថា Mate 30 Pro មានប្រើប្រាស់រចនាបថអេក្រង់កោងខ្លាំងនៅផ្នែកខាងមុខ ដែលគេឲ្យឈ្មោះថា "Waterfall Display” (អេក្រង់ទឹកធ្លាក់) ដែលធ្វើឲ្យមានការជម្រុះចោលនូវប៊ូតុង បិទ/បើកសំឡេង បន្សល់ទុកត្រឹមប៊ូតុង Power មួយនៅផ្នែកខាងស្ដាំ។

ផ្នែកខាងក្រោយមានស្រោបដោយកញ្ចក់ បំពាក់កាមេរ៉ាចំនួន ៤ គ្រាប់នៅក្នុងដង្គុំដែលមានរាងមូល ហើយភ្លើង LED ស្ថិតនៅក្រៅរង្វង់។ កាមេរ៉ាបួនគ្រាប់នេះរំពឹងថាមានកាមេរ៉ាមេ ៤០ MP ហើយកាមេរ៉ា Ultra-Wide ក៏មានកម្រិត ៤០ MP ដូចគ្នា។ ពីរទៀតជាកាមេរ៉ា Zoom និងកាមេរ៉ាវាស់ជម្រៅ ToF។

ទំហំអេក្រង់របស់ Mate 30 Pro គេនៅមិនទាន់ដឹងច្បាស់នៅឡើយ ប៉ុន្តែប៉ាន់ស្មានថាមានទំហំ ៦,៦ អ៊ីញ ដែលធំជាង Mate 20 Pro មានអេក្រង់ ៦,៤ អ៊ីញ។ ស្មាតហ្វូននេះនឹងមានបំពាក់ដោយឈីប Kirin 990 ដែលនឹងប្រកាសចេញនៅថ្ងៃទី ៦ ខែកញ្ញា។

Mate 30 Pro ត្រូវបានគេដឹងថាមានកម្លាំងសាកថ្មដល់ ៥៥ វ៉ាត់ (សាក Wireless ២៥ វ៉ាត់), ប្រើប្រាស់រន្ធ USB-C, មានរន្ធស្រូបសំឡេង ២, មាន IR Blaster សម្រាប់បញ្ជាឧបករណ៍អេឡិចត្រូនិកផ្សេងៗ និងគ្មានរន្ធដោតកាស 3.5 mm នោះទេ៕