ភ្ជុំបិណ្ឌមិនបានដើរឆ្ងាយ នេះរឿង "ស្ដេចកន" បញ្ចាំងជូនទស្សនាម្ដងទៀត ឯតម្លៃ "ធូរ...!”

2019-09-23 08:22:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្មែរប្រវត្តិសាស្ត្រខ្នាតធំរឿង "ហ្លួងព្រះស្ដេចកន" ដែលទទួលបានភាពល្បីល្បាញតាំងពីឆ្នាំ២០១៧ រហូតមកដល់បច្ចុប្បន្ននោះ ត្រូវបានបង្ហើបឲ្យដឹង នឹងវិលត្រឡប់មកសារជាថ្មីក្នុងឱកាសពិធីបុណ្យភ្ជុំបិណ្ឌម្ដងទៀត ដោយផ្ដល់ជូននូវតម្លៃសំបុត្រចូលទស្សនាយ៉ាងពិសេសថែមទៀតផង។

នេះជាការជាឆ្លើយតបនឹងទៅនឹងការទទូចរបស់ទស្សនិកជន ផ្សំនឹងក្រុមការងារផលិតភាពយន្តដ៏ធំប្រចាំ ២០១៧ នេះ ចង់ចូលរួមអបអរបុណ្យប្រពៃណីជាតិរបស់ខ្មែរ គឺបុណ្យ "ភ្ជុំបិណ្ឌ" ផង ក៏ដូចផ្ដល់ជូនជាចំណងដៃដល់បងប្អូនដែលមិនមានពេលដើរឆ្ងាយក្នុងពិធីបុណ្យសាសនាដ៏របស់ខ្មែរ ដែលនឹងត្រូវឈប់សម្រាករយៈយ៉ាងវែងនេះ។ តំណាងក្រុមផលិត ថ្លែង។

តាមការបញ្ជាក់របស់ក្រុមផលិតដដែល ភាពយន្តមួយនេះ នឹងមានបញ្ចាំងជូននៅគ្រប់រោងភាពយន្ត Legend Cinema ចាប់ពីថ្ងៃទី ២៣ ខែកញ្ញានេះតទៅហើយ ហើយចំពោះតម្លៃសំបុត្រ គឺត្រឹមតែ ២ដុល្លារអាមេរិកប៉ុណ្ណោះក្នុង១សំបុត្រ។

"ហ្លួងព្រះស្ដេចកន" គឺស្នាដៃនិពន្ធយ៉ាងយកចិត្តទុកដាក់ពីសំណាក់ ឯក ឧត្តម ម៉ៅ អាយុទ្ធ ដែលលោកបានចំណាយពេលរហូតដល់ទៅ២ឆ្នាំឯណោះ ក្នុងការសាងនូវសេណារីយ៉ូកុនដ៏ធំមួយនេះឡើយ។បន្ថែមពីនេះ ក៏បានស្រូបយកការចំណាយក្នុងការផលិតយ៉ាងច្រើនមហាសាល ដែលតាមព័ត៌មានកន្លងមក ខ្ទង់១លានដុល្លារអាមេរិកឯណោះ។

ក្រុមផលិតបញ្ជាក់ថា ចេតនានៃការផលិតរឿងនេះ គឺដើម្បីធ្វើយ៉ាងណាឱ្យរឿងប្រវត្តិសាស្ត្រនេះ បានសាយភាយទៅដល់មហាជន ក៏ដូចជាក្មេងៗជំនាន់ក្រោយឱ្យបានដឹង បានយល់ពីរឿងពាក់ព័ន្ធប្រវត្តិសាស្ត្ររបស់ជាតិខ្លួន។ ដូច្នេះ សម្រាប់ទស្សនិកជនដែលមិនទាន់បានទស្សនា ក៏ដូចជាអ្នកដែលចង់ឃើញនូវគ្រប់ឈុតឆាក សិល្បៈនៃការសម្ដែង អមជាមួយនឹងការបង្ហាញក្បាច់គុនបុរាណខ្មែរ ដែលមាននៅក្នុងភាពយន្តប្រវត្តិសាស្ត្រដ៏ធំនៅក្នុងព្រះរាជាណាចក្រកម្ពុជាម្ដងទៀត គឺឱកាសពិសេសបានមកដល់ហើយ។

"ហ្លួងព្រះស្ដេចកន" ចូលរួមសម្ដែងពីតារាល្បីៗជួរមុខរបស់កម្ពុជាជាច្រើនរូប ដូចជា លោក ទេព រិនដារ៉ូ កញ្ញា ស៊ិន សក្កដា លោក រស់ សោភ័ណ្ឌ កញ្ញា ឆុំ វត្តី លោក ហេង ប៊ុនលាភ អ្នកស្រី ឌី សាវ៉េត លោក ជា សំនៀង លោក សុខ ដែន ព្រមទាំងតារាប្រុសស្រីជាច្រើននាក់ទៀត៕

អត្ថបទ៖ ទារិកា