ក្រៅពីថ្ងៃល្អរបស់អ៊ីរ៉ង់ យប់មិញអ៊ីរ៉ាក់ក៏បានជួបរឿងពិសេសដែរ

2019-10-11 11:57:38
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់ថ្ងៃទី០៩ ខែតុលា កន្លងទៅ អ៊ីរ៉ង់បានបើកឲ្យស្ត្រីចូលមើលការប្រកួតបាល់ទាត់ដំបូងបង្អស់ក្នុងរយៈពេល ៤០ឆ្នាំ។ ស្របពេលជាមួយគ្នានេះ ប្រទេសជាប់របងគ្នាគឺ ប្រទេសអ៊ីរ៉ាក់ក៏បានជួបរឿងពិសេសមួយដែរ ដោយបានលេងប្រកួតផ្លូវការក្នុងទឹកដីរបស់ខ្លួនឯងផ្ទាល់ ជាលើកដំបូងក្នុងរយៈពេល ៨ឆ្នាំ។

លេងក្នុងកីឡដ្ឋាននៃទីក្រុង Basra ក្រុមជម្រើសជាតិបុរសរបស់អ៊ីរ៉ាក់ បានយកឈ្នះ ដែនដីហុងកុងក្នុងលទ្ធផល ២-០ នៅចំពោះមុខជនជាតិអ៊ីរ៉ាក់ និងក្នុងទឹកដីអ៊ីរ៉ាក់។

FIFA បានបញ្ជាក់ថា ទីក្រុងចំនួន ៣ របស់អ៊ីរ៉ាក់គឺ ទីក្រុង Barsa ទីក្រុង Erbil និងទីក្រុង Kabala អាចរៀបចំការប្រកួតលំដាប់ពិភពលោកបាន ខណៈរដ្ឋធានី Baghdad មិនត្រូវបានអនុញ្ញាតទេ ដោយសារតែមានការធ្វើការតវ៉ាពីសំណាក់ក្រុមប្រឆាំងរដ្ឋាភិបាល កាលពីសប្ដាហ៍មុន។

អ៊ីរ៉ាក់ត្រូវបាន FIFA ធ្វើការពិន័យជាច្រើនលើក ជាច្រើនសារហើយ។ កាលពីឆ្នាំ២០១១ អ៊ីរ៉ាក់បានលេងជម្រុះ World Cup ក្នុងទឹកដីរបស់ខ្លួនជាលើកដំបូង គិតចាប់ពីឆ្នាំ២០០១។ ប៉ុន្មានខែក្រោយមក FIFA បានធ្វើការដាក់បម្រាមអ៊ីរ៉ាក់ ដោយសារតែព្រួយបារម្ភពីសុវត្ថិភាព និងបានដោយសារតែការល្មើសបទបញ្ញត្តិសុវត្ថិភាពក្នុងប្រកួតប៉ះនឹង ហ្សកដានី។

យ៉ាងណាមិញ នៅឆ្នាំ២០១៣ បម្រាមនេះត្រូវបានលើកលែងចំពោះប្រកួតមិត្តភាព ប៉ុន្តែ ៣ខែក្រោយមក FIFA ក៏ដាក់បម្រាមទៀត ដោយសារតែអំពើហិង្សាកើតមានទូទាំងប្រទេស។

លុះឆ្នាំ២០១៧ FIFA ក៏លើកលែងបម្រាមលើប្រកួតមិត្តភាព ហើយឆ្នាំ២០១៨ FIFA អនុញ្ញាតឲ្យលេងក្នុងទីក្រុង ៣ ដែលបានរៀបរាប់ដូចខាងលើ៕

ប្រភព៖ BBC | CNN ប្រែសម្រួល៖ ហ៊ីម រស្មី