Pixel 4 នាំមកមុខងារកាមេរ៉ាថ្មី ៤ ចំណុច
- 2019-10-16 04:00:51
- ចំនួនមតិ 0 | ចំនួនចែករំលែក 0
Pixel 4 នាំមកមុខងារកាមេរ៉ាថ្មី ៤ ចំណុច
ចន្លោះមិនឃើញ
កាលពីម្សិលមិញ Google បានបង្ហាញទូរសព្ទកំពូលទាំងពីររបស់ខ្លួនសម្រាប់ឆ្នាំ ២០១៩ ។ ទូរសព្ទ Pixel តែងតែទទួលបានការសរសើរពីអ្នកប្រើប្រាស់ថាជាទូរសព្ទកំពូលកាមេរ៉ាពុំមាននរណាផ្ដួលបាន។ ចំពោះម៉ូដែលថ្មីនេះ Google បានបន្ថែមកាមេរ៉ា telephoto ១ គ្រាប់ទៀត។ មុខងារកាមេរ៉ាថ្មី ដែលមាននៅលើ Pixel 4 មានដូចជា៖
Live HDR+: មុខងារនេះអនុញ្ញាតឲ្យអ្នកប្រើប្រាស់មើលឃើញផ្ទាល់នូវរូបភាព ដែលនឹងថតចេញពេលប្រើប្រាស់មុខងារ HDR+ ។ នៅលើ Pixel ចាស់ៗ ពេលយើងប្រើប្រាស់មុខងារ HDR+ រូបភាពដែលថតចេញអាចខុសពីអ្វី ដែលយើងឃើញពេលកំពុងថត។
Adjust Exposure & Shadow: កាមេរ៉ារបស់ Pixel អាចឲ្យអ្នកថែមថយ Exposure ឬ Shadow នៅលើ viewfinder មុនពេលថតរូប។
Better Portrait Mode: មុខងារព្រិលក្រោយ ឬ Portrait បានសមត្ថភាពខ្លាំងជាងមុន បន្ទាប់ពី Google បានបន្ថែម telephoto ។ នៅលើ Pixel 3 មានការប្រើប្រាស់ AI ដើម្បីកាត់មនុស្សចេញពី background ប៉ុន្តែវាពុំទាន់កាត់វត្ថុឬ សត្វបានល្អនៅឡើយទេ។ សម្រាប់ Pixel 4 ការកាត់មនុស្ស សត្វ និងវត្ថុដំណើរការល្អជាងមុន ដោយវាប្រើប្រាស់កាមេរ៉ាទាំងពីរ ដើម្បីវាស់ចម្ងាយរវាង subject និង background ។
Night Mode & Astrophotography : មុខងារថតពេលយប់ ដែលមាននៅលើ Pixel 3 ក៏មានវត្តមានដែរ ហើយមានការកែសម្រួលច្រើន ធ្វើឲ្យរូបភាពភ្លឺច្បាស់ជាងជំនាន់ចាស់។ មិនតែប៉ុណ្ណោះ កាមេរ៉ានេះមានសមត្ថភាពអាចចាប់រូបភាពផ្កាយបានទៀតផង។
ក្រៅពីមុខងារធំៗ ទាំងនេះមានការកែសម្រួលតិចតួចទៅលើ AI និង ពណ៌ពេលថតរូបផងដែរ។ Pixel 4 បានទទួលការរិះគុណជាច្រើនទៅលើការបន្ថែមកាមេរ៉ា telephoto ជាជាង ultra-wide ដែលកំពុងមាននៅលើ iPhone 11៕