សិស្សវិទ្យាល័យសម្ដេចឪ ពេញចិត្តការសម្ដែងស្នៀតពិសេសៗ នារីយកជើងកៀបកបុរស តេក្វាន់ដូ ITF
- 2019-10-26 07:38:44
- ចំនួនមតិ 0 | ចំនួនចែករំលែក 0
សិស្សវិទ្យាល័យសម្ដេចឪ ពេញចិត្តការសម្ដែងស្នៀតពិសេសៗ នារីយកជើងកៀបកបុរស តេក្វាន់ដូ ITF
ចន្លោះមិនឃើញ
សិស្សនៅវិទ្យាល័យសម្ដេចឪ ក្នុងខេត្តសៀមរាប ពេញចិត្តការសម្ដែងស្នៀតពិសេសៗរបស់ក្រុមជម្រើសរើសជាតិតេក្វាន់ដូ ITF ដែលមកបង្ហាញព្រឹកមិញនេះ ហើយកោតសរសើរពីសមត្ថភាពដែលកូនខ្មែរអាចធ្វើបាន។
សេង ស៊ុនអាន សិស្សនៃវិទ្យាល័យខាងលើនេះប្រាប់ឲ្យដឹងថា ការសម្ដែងព្រឹកមិញរបស់ក្រុមតេក្វាន់ដូ ITF គឺល្អ និងប្លែកភ្នែកមែនទែន ខណៈដែលខ្លួនមិនដែលបានមើលការបញ្ចេញក្បាច់ពិសេសៗបែបនេះពីមុនទេ។ ស្នៀតដែលយុវជនខាងរូបនេះចាប់អារម្មណ៍ជាងគេនោះ គឺឈុតនារីវ៉ៃការពារខ្លួនពីបុរស ហើយស្នៀតលោតយកជើងកៀបកសត្រូវផ្ដួល។
មូលហេតុដែល ស៊ុនអាន ចាប់អារម្មណ៍ស្នៀតដែលកីឡាការិនី ITF សម្ដែងនេះ គឺដោយសារធ្លាប់តែឃើញបុរសៗវ៉ៃគ្នា ឬសម្ដែងជាមួយគ្នា ប៉ុន្តែលើកនេះនារីៗជាអ្នកវ៉ៃបុរសទៅវិញដើម្បីការពារខ្លួនពីការធ្វើបាបនានា។
ចំណែកសិស្សសាលាសម្ដេចឪមួយរូបទៀតក៏បានលើកឡើងប្រហាក់ប្រហែលគ្នានោះដែរ ការសម្ដែងនេះជក់ចិត្តខ្លាំង ពីមុនមកធ្លាប់តែឃើញតាមទូរទស្សន៍ និងខ្សែភាពយន្តផ្សេងៗ ប៉ុន្តែលើកនេះបានឃើញផ្ទាល់ពិតជាអស្ចារ្យ។ រឹតតែអស្ចារ្យទៀតនោះ ការសម្ដែងគឺដោយកូនខ្មែរតែម្ដង។ តាមរយៈការសម្ដែងនេះ អាចបញ្ជាក់បានថា មិនថានារី ឬក៏បុរសទេគឺអាចហាត់ដើម្បីមានសមត្ថភាពការពារខ្លួនបាន។
រំលឹកដែរថា ក្រុមជម្រើសជាតិ រួមទាំងយុវជនថ្នាលរបស់សហព័ន្ធតេក្វាន់ដូ ITF កម្ពុជា បានធ្វើពិធីសម្ដែងក្បាច់គុន និងស្នៀតពិសេសៗ ការពារខ្លួន លោតទាត់ក្ដារ លោតភ្លោះ និងវ៉ៃបំបែកការ៉ូជាដើមនៅឯវិទ្យាល័យសម្ដេចឪ ក្នុងខេត្តសៀមរាប កាលពីព្រឹកថ្ងៃសៅរ៍ ទី២៦ ខែតុលា ២០១៩ នេះ៕
វីដេអូ៖