អ្នកជិតខាងចាក់ធុងបាសឮៗរំខានពេលយប់ កុំទ្រាំអីអាចដោះស្រាយបែបនេះ

2019-10-30 01:58:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាពលរដ្ឋមួយចំនួនពេលជួបជុំគ្នាបានបើកភ្លេងឬច្រៀងតាមឧបករណ៍បំពងសំឡេងក្នុងកម្រិតឮៗបង្កការរំខានដក់អ្នកជិតខាងនៅពេលរាត្រី។ ករណីនេះប្រជាពលរដ្ឋខ្លះបានជូនដំណឹងដល់សមត្ថកិច្ចដើម្បីជួយអន្តរាគមន៍ និងខ្លះទៀតទំនងជាទ្រាំស្ដាប់ទម្រាំអ្នកជិតខាងបិទដោយខ្លួនង។

(រូបភាព៖ ស្នងការដ្ឋាននគរបាលរាជធានីភ្នំពេញ)

ទោះយ៉ាងណាស្នងការដ្ឋាននគរបាលរាជធានីភ្នំពេញបានរំឭកថាប្រជាពលរដ្ឋត្រូវប្រើប្រាស់សិទ្ធិរបស់ខ្លួនឲ្យមានដែនកំណត់ និងត្រូវចេះគោរពសិទ្ធិអ្នកដទៃ។ ស្នងការដ្ឋានរាជធានីភ្នំពេញលើកឡើងដូចនេះនៅលើទំព័រហ្វេសប៊ុករបស់ខ្លួនកាលពីយប់ថ្ងៃទី២៨ ខែតុលា ឆ្នាំ២០១៩ ខណៈពេលដែលសមត្ថកិច្ចមូលដ្ឋាននៅចាក់អង្រែលើ និងប៉ុស្ដិ៍ផ្សារដេប៉ូ៣ចុះធ្វើការទាំងយប់ដើម្បីអប់រំ និងណែនាំអ្នកចាក់ធុងបាសបង្កសំឡេងរំខានដល់អ្នកជិតខាង។

ការចុះអប់រំ និងណែនាំនេះធ្វើឡើងបន្ទាប់ពីមានមតិយោបល់របស់អ្នកជិតខាងបង្ហោះចូលក្នុងផេករបស់ស្នងការដ្ឋាននគរបាលរាជធានីភ្នំពេញ។

ការផ្ញើព័ត៌មានទៅកាន់ផេកស្នងការដ្ឋាននគរបាលរាជធានីភ្នំពេញគឺឃើញថាមានវិធានការជូនពលរដ្ឋ ដូចជានៅម៉ោង៨យប់ថ្ងៃទី២៩ ខែតុលា ឆ្នាំ២០១៩ ក៏មានពលរដ្ឋសង្កាត់ទឹកថ្លាបានរាយការណ៍ទៅកាន់ស្នងការដ្ឋាននគរបាលរាជធានីដូចគ្នា ហើយសមត្ថកិច្ចក៏បានចុះមកអប់រំ និងណែនាំអ្នកចាក់ធុងបាសមានសំឡេងឮខ្លាំងបង្កការរំខានដល់អ្នកជិតខាងឲ្យបញ្ឈប់សកម្មភាពរបស់ខ្លួន។

មួយរយៈចុងក្រោយនេះការចាក់ឧបករណ៍បំពងសំឡេងឮៗនេះឃើញមានកើតឡើងច្រើនស្របពេលដែលឧបករណ៍នេះសម្បូរបែប ហើយមានតម្លៃដែលមនុស្សភាគច្រើនងាយនឹងទិញប្រើប្រាស់បាន៕

អត្ថបទ៖ ជំនោរ