សំណាង អេលីណា បង្ហាញឈុត "ព្រះនាងឥន្ទ្រទេវី" ស្អាតហើយមានអត្ថន័យជ្រៅ!

2019-11-22 02:51:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា សំណាង អេលី ណា បវរកញ្ញាចក្រវាលកម្ពុជាឆ្នាំ ២០១៩ នៅព្រឹកនេះ បានបង្ហាញឈុតតំណាងជាតិ Miss Universe Cambodia 2019 ដ៏ពិសេសមួយឈុតមានឈ្មោះថា "ព្រះនាងឥន្ទ្រទេវី" ដែលមើលទៅស្អាត និងមានអត្ថន័យជ្រាលជ្រៅ។

តាមការពន្យល់របស់ អេលីណា ដែលមានភ្ជាប់ជាមួយរូបថតប៉ុន្មានសន្លឹក ព្រះនាងឥន្ទ្រទេវី គឺជាអគ្គមហេសីទី២របស់ព្រះបាទជ័យវរ្ម័នទី៧ បន្ទាប់ពីព្រះមហេសីទី១ ព្រះនាងជ័យរាជទេវី ដែលសុគតបាត់ទៅ ព្រះនាងឥន្ទ្រទេវីគឺជា មហាកវីដ៏ល្បីល្បាញនៅសតវត្សទី១៣ ហេតុនេះទើបកេរ្តិ៍ឈ្មោះព្រះនាងល្បីសុះសាយ ហើយបានក្លាយជានិមិត្តរូបនៃអក្សរសាស្ត្រខ្មែររហូតមកដល់សព្វថ្ងៃនេះ ព្រះនាងឥន្ទ្រទេវីមានគុណសម្បត្តិធំជាងគេ គឺព្រះនាងមិនចេះលោភលន់ ហើយព្រះនាងតែងតែហ្វឹកហាត់ប្រជារាស្ត្រ អោយប្រយុទ្ធ និងភាពអវិជ្ជា រំដោះខ្លួនពីភាពល្ងង់ខ្មៅ ព្រោះព្រះនាងបានចាត់ទុកថា "សត្រូវដ៏ធំបំផុតរបស់មនុស្សយើងគឺអវិជ្ជា"។

តួយ៉ាង តួអង្គអប្សរាហែហមព្រះនាងទាំង៨អង្គនោះគឺយើងចង់បង្ហាញអំពីតួអង្គមនុស្សស្រី ដែលតំណាងអោយសិរីបីប្រការគឺ ៖

១ សិរីសួស្ដីពេលព្រឹក ស្ថិតនៅលើផ្ទៃមុខ ( ជាការរៀបចំសំអាតមុខមាត់ដើម្បីអោយស្រស់ស្រាយជាមួយស្នាមញញឹម ) ២ សិរីសួស្ដីពេលថ្ងៃ ស្ថិតលើទ្រូង ( ជាការរៀបចំសំអាតកាយ ) ៣ សិរីសួស្ដីពេលយប់ ស្ថិតលើចុងជើង ( គឺជាការរៀបចំសំអាតជើងមុនពេលចូលគេង )

ដូច្នេះហើយទើប ក្រុមការងារនាងសំរេចជ្រើសរើសយកតួអង្គ ព្រះនាងឥន្ទ្រទេវី ហែហមដោយទេពអប្សរាមកធ្វើជាឈុតតំណាងជាង Miss Universe Cambodia 2019 នេះ ជាមួយអត្ថន័យថា តួអង្គព្រះនាងតំណាងអោយស្ត្រីខ្មែរដែលទៅដល់ទីណាក៏ប្រកបដោយភាពស្រស់ស្រាយ សិរីសួស្ដី និងភាពរីកចំរើន។ អេលីណា ថា ពួកនាង ក៏ចង់អោយពិភពលោកបានដឹងថាស្ត្រីកម្ពុជាមិនត្រឹមតែស្អាតនោះទេ គឺស្ត្រីកម្ពុជាមានទាំងសមត្ថភាព និងចំណេះដឹងខ្លាំងក្លាផងដែរ។

ចំពោះឈុតតំណាងជាតិក្នុងកម្មវិធី "Miss Universe 2019” នេះ អេលីណា ប្រាប់ថា មិនទាន់រចនារួចរាល់ ១០០%នោះទេ គឺបានត្រឹម ៦០% ប៉ុណ្ណោះ។ ដូច្នេះហើយ អាចនឹងនៅមានចន្លោះប្រហោងខ្លះ ហើយនាងនឹងបង្ហាញជូនជាថ្មីទៀត នៅពេលការរចនាបានស្រេចបាច់១០០%៕