អាជ្ញាធរអប្សរាបង្ហើបឈ្មោះជាងគំនូរមានស្នាដៃសិល្បៈរស់រវើកគូរនៅព្រះវិហារវត្តរាជបូណ៍
- 2019-11-27 03:26:24
- ចំនួនមតិ 0 | ចំនួនចែករំលែក 0
អាជ្ញាធរអប្សរាបង្ហើបឈ្មោះជាងគំនូរមានស្នាដៃសិល្បៈរស់រវើកគូរនៅព្រះវិហារវត្តរាជបូណ៍
ចន្លោះមិនឃើញ
អាជ្ញាធរជាតិអប្សរាបានបង្ហើបពីឈ្មោះអ្នកគូរគំនូរនៅលើជញ្ជាំងព្រះវិហារក្នុងវត្តរាជបូណ៍ក្នុងខេត្តសៀមរាប ដោយថាអ្នកទាំងពីរជាអ្នកធ្វើណាំងសម្រាប់ល្ខោនស្បែកធំផង បានជាគំនូររបស់ពួកគាត់មានទម្រង់ និងកាយវិការដូចស្បែកធំ។
អាជ្ញាធរជាតិអប្សរាបានសរសេរលើទំព័រហ្វេសប៊ុករបស់ខ្លួនថាវត្តរាជបូណ៌ជាវត្តដ៏ចំណាស់មួយក្នុងចំណោមវត្តដទៃទៀត ដែលស្ថិតនៅតាមដងស្ទឹងសៀមរាប ស្ថិតក្នុងភូមិសាស្ត្រភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ ប្រភពបន្តថាអារាមនេះមានព្រះវិហារមួយដែលមានលក្ខណៈស្ថាបត្យកម្មល្អឯក ហើយប្រហែលជាសាងសង់ឡើងក្នុងរាជ្យព្រះបាទនរោត្តម។
ប្រភពដដែលបញ្ជាក់ថា៖ «នៅលើជញ្ជាំងព្រះវិហារផ្នែកខាងក្នុងមានសិល្បៈដ៏រស់រវើកល្អវិចិត្រគឺ គំនូរបុរាណរឿង «រាមកេរ្តិ៍» ដែលជារឿងល្បីល្បាញនៅអាស៊ីអាគ្នេយ៍ គូរនៅរវាងឆ្នាំ១៩២០-១៩២៤ ដោយជាងឈ្មោះ ប៉ិល និងក្មួយរបស់គាត់ឈ្មោះ ឌិត។ ជាងគំនូរទាំង២ គឺជាជាងធ្វើណាំងសម្រាប់ល្ខោនស្បែកធំ ទើបគំនូរមានទម្រង់កាយវិការបែបដូចស្បែកធំ។ ចំណែកនៅផ្នែកខាងក្រៅមានចម្លាក់លៀនយ៉ាងរស់រវើកនៅលើទ្វារនិងបង្អួច»។
បើតាមអាជ្ញាធរជាតិអប្សរាព្រះវិហារចំណាស់នេះធ្លាប់បានជួសជុលតាំងពីសម័យអាណានិគមបារាំងមកម្ល៉េះ។ បច្ចុប្បន្ននេះ ប្រភពឲ្យដឹថាព្រះវិហារមានសភាពទ្រុឌទ្រោមដោយអន្លើ ដែលតម្រូវឱ្យមានការជួសជុលជាចាំបាច់ ដោយសារអាយុកាលនិងអាកាសធាតុជាដើម។
ដើម្បីរួមចំណែករក្សាមរតកនេះឱ្យគង់វង្សតទៅទៀត អាជ្ញាធរជាតិអប្សរាថាខ្លួនបានសហការជាមួយអ្នកជំនាញអ៊ីតាលីចាប់ផ្តើមជួសជុលផ្នែកសំខាន់ៗនៃព្រះវិហារនៅឆ្នាំ២០១៤។ សន្លឹកទ្វារ សន្លឹកបង្អួច គំនូរ និងបដិមាក្នុងវិហារជាដើម សុទ្ធតែបានជួសជុលនិងសម្អាតតាមបច្ចេកទេសដោយអ្នកអភិរក្ស។ កិច្ចការទាំងអស់នេះតែងមានព្រះទ័យយកចិត្តទុកដាក់ខ្ពស់និងការផ្តល់ឱកាសដ៏ពេញលេញអំពីព្រះមហាវិមលធម្ម ពិន សែម សិរីសុវណ្ណោ ព្រះគ្រូចៅអធិការវត្តរាជបូណ៌។ ប្រភពដដែលបញ្ជាក់៕