រៀនចប់ PhD ផ្នែកវិស្វករ ទីបំផុតយកមេដាយមាស eSports ដំបូងបង្អស់ឲ្យម៉ាឡេស៊ី

2019-12-13 01:56:21
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Yew Weng Kean និស្សិតបញ្ចប់ថ្នាក់ PhD ផ្នែកវិស្វករអគ្គិសនី បានបង្កើតប្រវត្តិសាស្រ្តដ៏អស្ចារ្យមួយជូនប្រទេសម៉ាឡេស៊ី តាមរយៈការយកបាននូវមេដាយមាសផ្នែកកីឡាអេឡិចត្រូនិក (eSports) មុនគេបង្អស់។

នៅព្រឹត្តិការណ៍ SEA Games ឆ្នាំ ២០១៩ ដែលមានហ្វីលីពីនធ្វើជាម្ចាស់ផ្ទះ លោក Yew ដែលមានឈ្មោះក្នុងហ្គេមហៅថា 'wkyew90' បានចូលរួមប្រកួតលើវិញ្ញាសាហ្គេម Hearthstone: Heroes of Warcraft ដែលបានយកឈ្នះនៅវគ្គផ្តាច់ព្រ័ត្រក្នុងលទ្ធផល ៣-១ ទៅលើអ្នកលេងជនជាតិថៃ Werit Popan។ នេះបើតាមសារព័ត៌មាន theSunDaily បានចុះផ្សាយ។

ប្រាប់សារព័ត៌មាន New Straits Times បុរសវ័យ ២៩ ឆ្នាំនិយាយថា៖ "មេដាយមាសនេះពិតជាមានន័យខ្លាំងបំផុត តែមិនមែនសម្រាប់ខ្ញុំ ពោលគឺសម្រាប់ប្រទេសម៉ាឡេស៊ីទាំងមូលទាំងនាមខ្ញុំជាអ្នកឈ្នះជើងឯកកីឡា eSports នៅ SEA Games ដំបូងបង្អស់"។

គួររំឭកថាមានហ្គេមចំនួន ៦ វិញ្ញាសាដែលបានដាក់ឲ្យប្រកួតនៅ SEA Games ២០១៩ ដោយរួមមាន Mobile Legends: Bang Bang, Tekken 7, Starcraft II, Hearthstone, Arena of Valor និង Dota 2។ ក្រៅពីមេដាយមាសលើវិញ្ញាសាខាងលើ ក្រុមមកពីម៉ាឡេស៊ីក៏យកបានមេដាយសំរឹទ្ធមួយផ្សេងទៀតផងដែរលើការលេងហ្គេម Mobile Legends៕

អានអត្ថបទ:

ប្រភព៖ Says ប្រែសម្រួល៖ កៅ រក្សា