អ្នកទៅលេងបុណ្យសមុទ្រនៅកំពតឆ្នាំនេះ កុំភ្លេចចូលមើលប្រដាល់ដណ្ដើមខ្សែក្រវាត់ពិភពលោក

2019-12-18 03:56:10
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធប្រដាល់គុនខ្មែរអន្តរជាតិ បានធ្វើសន្និសីទសារព័ត៌មានផ្លូវការម្សិលមិញនេះ ប្រកាសពីកម្មវិធីប្រកួតដណ្ដើមខ្សែក្រវាត់ពិភពលោក នៅបុណ្យសមុទ្រឆ្នាំនេះក្នុងខេត្តកំពត ចាប់ពីថ្ងៃទី២០ ដល់ទី២២ ធ្នូ ២០១៩។

ទិដ្ឋភាពម្សិលមិញ

លោក មាម រ៉ា ប្រធានសហព័ន្ធប្រដាល់គុនខ្មែរអន្តរជាតិបានឲ្យដឹងថា ជាការអបអរក្នុងពិធីបុណ្យសមុទ្រលើកទី៨ នៅឯខេត្តកំពតនេះនឹងមានការរៀបចំការប្រកួតគុនខ្មែរអន្តរជាតិរយៈពេល៣ថ្ងៃ និងមានការប្រកួតដណ្ដើមខ្សែក្រវាត់ថែមទៀតផង។ ការប្រកួតអន្តរជាតិនេះដែរ ក៏ផ្ដោតលើការផ្សព្វផ្សាយដល់អន្តរជាតិផងដែរ ដូច្នេះកម្រិតសមត្ថភាពបរទេសចូលរួម Amateur (ស្ម័គ្រចិត្ត) និង Semi-professional (ពាក់កណ្ដាលអាជីព) ប៉ុណ្ណោះ លើកលែងការប្រកួតជាមួយប្រទេសថៃនោះទេ។

ទិដ្ឋភាពម្សិលមិញ

ឯកឧត្ដម ខ្វៃ អាទិត្យា អគ្គនាយកទូរទស្សន៍អប្សរាបានឲ្យដឹងថា នេះជាលើកទី១ហើយដែលខាងស្ថានីយបានឱកាសពិសេសសហការជាមួយគណៈកម្មាធិការជាតិអូឡាំពិកកម្ពុជា និងក្រសួងទេសចរណ៍ក្នុងការផ្សព្វផ្សាយកម្មវិធីប្រដាល់អន្តរជាតិដណ្ដើមខ្សែក្រវាត់ពិភពលោកនៅបុណ្យសមុទ្រនេះ។ ជាកម្មវិធីធំដែលមានអន្តរជាតិចូលរួមរហូតជិត១០ប្រទេសបែបនេះហើយ ខាងស្ថានីយអប្សរានឹងរៀបចំឲ្យល្អ សាកសមទៅនិងកម្មវិធីនេះតែម្ដង ដូចជាមានឆាកសមរម្យ ភ្លេង សំឡេង ភ្លើងដើម្បីត្រៀមក្នុងថ្ងៃធ្វើពិធីនោះ។

ទិដ្ឋភាពម្សិលមិញ

រំលឹកដែរថា កម្មវិធីបុណ្យសមុទ្រលើកទី៨ ជុំទី២ នេះនឹងធ្វើឡើងនៅក្នុងខេត្តកំពត ចាប់ពីថ្ងៃទី២០ ដល់ទី២២ ខែធ្នូ ២០១៩។ ដោយឡែកកម្មវិធីប្រដាល់នឹងចាប់ផ្ដើមពីម៉ោង៧យប់តទៅ និងមានផ្សាយផ្ទាល់តាមទូរទស្សន៍ផងដែរ៕