ខ្មែរជួយខ្មែរ! ទ្រូម៉ាន់នីប្រកាសថែម ២ពាន់រៀលពីលើរាល់ការបរិច្ចាគទៅមន្ទីរពេទ្យគន្ធបុប្ផាតាម App របស់ខ្លួន
- 2019-12-27 04:30:51
- ចំនួនមតិ 0 | ចំនួនចែករំលែក 0
ខ្មែរជួយខ្មែរ! ទ្រូម៉ាន់នីប្រកាសថែម ២ពាន់រៀលពីលើរាល់ការបរិច្ចាគទៅមន្ទីរពេទ្យគន្ធបុប្ផាតាម App របស់ខ្លួន
ចន្លោះមិនឃើញ
កាលពីរសៀលម្សិលមិញនេះ ក្រុមហ៊ុនទ្រូម៉ាន់នី (TrueMoney) បានប្រកាសពីវត្តមានកម្មវិធីរៃអង្គាសប្រាក់ដើម្បីគាំទ្រ ប្រតិបត្តិការមន្ទីរពេទ្យគន្ធបុប្ផា តាមរយៈកម្មវិធី TrueMoney App ដោយរាល់ការបរិច្ចាគរបស់អតិថិជនថ្មីរបស់ទ្រូម៉ាននីទាំងអស់ ក្រុមហ៊ុនទ្រូម៉ាន់នីនឹងបន្ថែមចំនួន២០០០រៀលពីលើនោះភ្លាមៗដែរ។
ការប្រកាសនេះ ធ្វើឡើងក្នុងកម្មវិធី ចុះអនុស្សរណៈ នៃការយោគយល់គ្នារវាងក្រុមហ៊ុនទ្រូម៉ាន់នី និង មូលនិធិគុន្ធបុប្ផាកម្ពុជា ដែលបានប្រព្រឹត្តទៅនៅមជ្ឈមណ្ឌលព័ត៌មានរបស់មន្ទីរពេទ្យភ្នំពេញ កាលពី រសៀលថ្ងៃព្រហស្បតិ៍ ទី២៦ ធ្នូ ម្សិលមិញនេះ ក្រោយវត្តមាន ឯកឧត្ដមបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម និងប្រធានលេខាធិការដ្ឋាន មូលនិធិគន្ធបុប្ផាកម្ពុជា និង សាស្ត្រាចារ្យវេជ្ជបណ្ឌិត គី សន់ទី ប្រធានមន្ទីរគន្ធបុប្ផា និងលោក ឈន់ សកល នាយកផ្នែកទីផ្សារនៃក្រុមហ៊ុនទ្រូម៉ាន់នី (ខេមបូឌា)។
កិច្ចសហការថ្ងៃនេះ នឹងផ្ដល់ជម្រើសបន្ថែមជូនសប្បុរសជន ដែលមានបំណងបរិច្ចាគថវិកាជូនមូលនិធិគន្ធបុប្ផាកម្ពុជា ឲ្យកាន់តែងាយស្រួលតាមរយៈ សេវាផ្ទេរប្រាក់របស់ ទ្រូម៉ាន់នី នៅតាមគ្រប់ភ្នាក់ងារទាំងអស់ទូទាំងប្រទេស ឬ តាមកម្មវិធី ទ្រូម៉ាន់នី (TrueMoney App)។ នេះបើតាមលើកឡើងរបស់លោក ឈន់ សកល នាយកផ្នែកទីផ្សារនៃក្រុមហ៊ុនទ្រូម៉ាន់នី (ខេមបូឌា)។
លោកបន្តថា៖ «ដើម្បីអបអរសារដល់កិច្ចសហការថ្មីនេះ ក្រុមហ៊ុនទ្រូម៉ាន់នី បានផ្តល់កម្មវិធីពិសេសជូនសប្បុរសជនទាំងអស់ដែលបានដំឡើងកម្មវិធី ទ្រូម៉ាន់នី (TrueMoney App) រួចដាក់លុយទៅក្នុងគណនីនោះ ហើយធ្វើការបរិច្ចាគក្នុងចំនួនណាមួយ ទោះតិច ឬច្រើនក្តី ជូនមូលនិធិគន្ធបុប្ផាកម្ពុជា ក្រុមហ៊ុននឹងរួមចំណែកបរិច្ចាគចំនួន ២០០០រៀល បន្ថែមភ្លាមៗដែរ»។
ឯកឧត្ដមបណ្ឌិត ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម និងប្រធានលេខាធិការដ្ឋាន មូលនិធិគន្ធបុប្ផាកម្ពុជា បានថ្លែងអំណរគុណ គណៈគ្រប់គ្រងក្រុមហ៊ុន ទ្រូម៉ាន់នី ចំពោះកិច្ចសហការនេះថា៖ «ការចូលរួមបរិច្ចាគរបស់សប្បុរសជន ទោះតិចតួច ឬ ច្រើនក្តី ជូនដល់មូលនិធិគន្ធបុប្ផាកម្ពុជា ពិតជាមានសារសំខាន់ ក្នុងការចូលរួមគាំទ្រដល់ ការព្យាបាល និងសង្គ្រោះកុមារកម្ពុជា»។
រាល់ទឹកប្រាក់ដែលបរិច្ចាគតាមរយៈ TrueMoney នឹងត្រូវបញ្ចូលទៅក្នុងគណនីរបស់ មូលនិធិមន្ទីរពេទ្យគន្ធបុប្ផាកម្ពុជាជាស្វ័យប្រវត្តិ ដោយគ្មានការប៉ះពាល់ដោយបុគ្គលណាម្នាក់ឡើយ ដូច្នេះ ក្រុមហ៊ុនទ្រូម៉ាន់នីហ៊ានធានាយ៉ាងមុតមាំថាការបរិច្ចាគរបស់សាធារណជនពិតជាទៅដល់មន្ទីរពេទ្យគន្ធបុប្ផា និងអាចជួយសង្គ្រោះកុមារប្រាកដមែន។ លោក ឈន់ សកល តំណាងក្រុមហ៊ុនទ្រូម៉ាន់នីកម្ពុជា បានបញ្ជាក់បន្ថែម។
ទ្រូម៉ាន់នី គឺជាក្រុមហ៊ុនទំនើបកម្មដែលផ្តល់នូវសេវា ទូទាត់ចល័តនៅ អាស៊ីអាគ្នេយ៍ដែលបានធ្វើប្រតិបត្តិការក្នុងប្រទេសចំនួន៦ ក្នុងតំបន់ ដែលរួមមាន ប្រទេសកម្ពុជាផងដែរ។ ជាមួយគោលដៅ និងទស្សនៈវិស័យច្បាស់លាស់ TrueMoney បានក្លាយជាក្រុមហ៊ុនឈានមុខមួយនៅក្នុងទីផ្សារកម្ពុជាយ៉ាងឆាប់រហ័សជាមួយចំនួនភ្នាក់ច្រើនបំផុត និងអតិថិជនប្រើប្រាស់ច្រើនជាង ២លាននាក់ និងការធ្វើប្រតិបត្តិការប្រចាំខែប្រមាណជាង ៣លានប្រតិបត្តិការ។
ក្រុមហ៊ុនទ្រូម៉ាន់នី បានពង្រីកភ្នាក់ងារច្រើនជាងគេ ហើយក៏មានដៃគូសហការជាច្រើន សម្រាប់ផ្ដល់នូវសេវាទូទាត់ហិរញ្ញវត្ថុ ដែលមានភាពងាយស្រួល និងទាន់សម័យ។
សម្រាប់ព័ត៌មានបន្ថែម និងថ្មីៗ ពី ទ្រូម៉ាន់នី សូមចូលទៅកាន់ ៖