មហាសេដ្ឋីជប៉ុនប្រកាសរកមិត្តស្រី ហោះទៅឋានព្រះចន្ទជាមួយគ្នា

2020-01-13 07:46:08
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Yusaku Maezawa មហាសេដ្ឋីជប៉ុន ដែលនឹងជាអ្នកដំណើរដំបូងគេនៃរ៉ុកកែត SpaceX ធ្វើដំណើរហោះជុំវិញឋានព្រះចន្ទ បានចាប់ផ្ដើមយុទ្ធនាការប្លែកមួយ គឺស្វែងរកដៃគូស្រីធ្វើដំណើរជាមួយ។

តាមរយៈការផ្សព្វផ្សាយយុទ្ធនាការលើវិបសាយរបស់លោក Maezawa គឺបានបង្ហាញច្បាស់ណាស់ថា លោកមិនមែនរកត្រឹមតែមិត្តធម្មតានោះទេ ប៉ុន្តែមនុស្សពិសេសម្នាក់ដែលអាចរួមដំណើរទៅកាន់ទីអវកាសជាមួយ។ វិបសាយបានសរសេរ ៖ "គាត់ចង់ទៅកាន់កន្លែងពិសេសជាមួយមនុស្សពិសេសម្នាក់។”

វិបសាយបានធ្វើការផ្សព្វផ្សាយនូវយុទ្ធនាការនេះប្រៀបធៀបដូចជាកម្មវិធីស្វែងរកគូស្នេហ៍ដ៏ធំដុំមួយ ដែលនឹងត្រូវបង្ហាញនៅលើកម្មវិធីទូរទស្សន៍ឈ្មោះ "Full Moon Lovers” ដោយគ្រោងចាក់ផ្សាយលើសេវាកម្ម AbemeTV។ អ្នកដែលអាចចូលរួមដាក់ពាក្យបាន គឺនារីនៅលីវ ដែលមានអាយុ ២០ ឆ្នាំឡើង មានចរិតលក្ខណៈស្រស់ស្រាយ រីករាយនឹងជីវិតពេញទី និងចង់ឲ្យពិភពលោកសន្តិភាព។

រូបភាព Render នៃ Starship

លោក Maezawa និងដៃគូថ្មី អាចនឹងទៅកាន់ឋានព្រះចន្ទជាមួយគ្នាតាមរយៈការជិះរ៉ុកកែត Starship ជំនាន់ចុងក្រោយរបស់ SpaceX វាជាយានអវកាសធំដែលបង្កើតសម្រាប់នាំមនុស្សទៅកម្សាន្តនៅក្នុងលំហអាកាសឆ្ងាយៗដូចជាព្រះចន្ទ និងភពអង្គារជាដើម។ ទាក់ទងនឹងការដាក់ពាក្យអាចចូលទៅកាន់វិបសាយរបស់លោក Maezawa៕

ប្រភព៖ The Verge ប្រែសម្រួល៖ សុខហេង