ត្មាតជាច្រើនក្បាលបានទទួលចំណីពីក្រុមអភិរក្សជីវិតសត្វស្លាបនៅស្រុកសៀមប៉ាង
- 2020-01-14 02:27:47
- ចំនួនមតិ 0 | ចំនួនចែករំលែក 0
ត្មាតជាច្រើនក្បាលបានទទួលចំណីពីក្រុមអភិរក្សជីវិតសត្វស្លាបនៅស្រុកសៀមប៉ាង
ចន្លោះមិនឃើញ
ក្រុមអង្គការអភិរក្សជីវិតសត្វស្លាបប្រចាំស្រុកសៀមប៉ាងបានផ្ដល់ចំណី អាហារក្នុងមួយខែបីដងក្នុងរដូវដែលពួកវាពងកូន ដើម្បីបន្តពូជ ដែលជាសត្វកម្រងាយរងគ្រោះ និងជិតផុតពូជចាប់ពីថ្ងៃទី ១១ដល់ ១២ ខែមករា ឆ្នាំ២០២០នេះ។
លោក អ៊ៀង សំណាង ប្រធានក្រុមអភិរក្សធនធានជីវចម្រុះអង្គការជីវិតសត្វស្លាបអន្តរជាតិប្រចាំស្រុកសៀមប៉ាងបានឱ្យដឹងថាដើម្បីអភិរក្សសត្វស្លាបនិងផ្ដល់ចំណីបន្ថែមនេះត្រូវចំណាយថវិកាក្នុងមួយខែជាង ១ ០០០ដុល្លារ ទិញគោឬក្របី ឱ្យសត្វត្មាតស៊ីក្នុងមួយខែ៣ដងជាពិសេសនៅក្នុង រដូវរំហើយដែលកំពុងពងកូន។
លោកបានបន្ថែមថា ពពួកសត្វដ៏កម្រ ទាំងនេះរស់នៅក្នុងតំបន់ព្រៃអភិរក្សបច្ចុប្បន្ននៅពេលយើងដាក់ចំណីឱ្យម្តងៗ សង្កេតឃើញមានសត្វត្មាត និងសត្វស្លាបផ្សេងៗទៀតមកស៊ីចន្លោះចាប់ពី៥០ក្បាលទៅ១០០ក្បាលតែប៉ុណ្ណោះ ក្នុងនោះមាន សត្វត្មាតត្នោត ត្មាតផេះ និងត្មាតភ្លើង ។ សត្វត្មាតទាំង៣ប្រភេទនេះ ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតនៅលើសាកលលោក ដោយសារតែចំនួនរបស់ពួកវានៅតែបន្តធ្លាក់ចុះយ៉ាងខ្លាំងគួរឲ្យព្រួយបារម្ភ។
ទៅថ្ងៃអនាគតអាជ្ញាធរស្រុកសៀមប៉ាង គ្រោងសហការជាមួយ ក្រុមអភិរក្សសត្វស្លាប នឹងរៀបចំឱ្យមានកន្លែងទស្សនាសត្វត្មាតនេះនៅពេលដាក់ចំណី សម្រាប់បម្រើឱ្យវិស័យទេសចរណ៍ ពេលភ្ញៀវជាតិនិងអន្តរជាតិមកដល់ស្រុកសៀមប៉ាងអាចចូលទៅទស្សនាបាន៕