ក្រុមហ៊ុនបច្ចេកវិទ្យាមួយទៀត ចូលក្លឹបតម្លៃ ១លានលានដុល្លារ

2020-01-17 06:58:54
ចំនួនមតិ 0 | ចំនួនចែករំលែក 0

ចន្លោះមិនឃើញ

Alphabet ដែលជាក្រុមហ៊ុនមេរបស់ Google បានក្លាយជាក្រុមហ៊ុនបច្ចេកវិទ្យាបន្ទាប់ដែលមានតម្លៃលើទីផ្សារឡើងដល់ជាង ១ លានលានដុល្លារ (ទ្រីលានដុល្លារ) តាមពីក្រោយ Apple Amazon និង Microsoft។

ក្រុមហ៊ុនអាចសាងបានសមិទ្ធផលនេះរយៈពេលជាងមួយខែ ក្រោយពីស្ថាបនិក Google គឺលោក Larry Page និង Sergey Brin ចុះចេញពីតំណែងជានាយកប្រតិបត្តិ និងប្រធានក្រុមហ៊ុននៅ Alphabet។ កាលពីខែធ្នូ លោក Page បានផ្ទេរតំណែងរបស់ខ្លួនទៅឲ្យលោក Sundar Pichai ដែលធ្វើឲ្យលោកត្រូវកាន់តំណែងជានាយកប្រតិបត្តិ Google ផងនិង Alphabet ផង។

ក្រុមហ៊ុន Alphabet មានគ្រប់គ្រងជំនួញជាច្រើន រួមមាន Google, Sidewalk Labs (ផ្ដោតលើបច្ចេកវិទ្យាទីក្រុងវៃឆ្លាត), DeepMind, Google Fiber និង Verily ហើយក៏មានកាន់កាប់ Nest និង Chronicle ផងដែរ។

CNBC បានបញ្ជាក់ថា Facebook អាចជាក្រុមហ៊ុនបន្ទាប់ដែលចូលជាសមាជិកក្លឹបតម្លៃ ១ ទ្រីលានដុល្លារ ប៉ុន្តែអាចត្រូវចំណាយពេលយូរបន្តិច ដើម្បីឡើងពីតម្លៃបច្ចុប្បន្ន ៦២០ ពាន់លានដុល្លារ៕

ប្រភព៖ thenextweb ប្រែសម្រួល៖ សុខហេង